१ पतरुस 2 - चितवनिया थारु1 उहेसे जम्मे खराब व्यबहार, जम्मे छलकपट, डाह हसे निना करेकेसे तनाउ रहिह। 2 भरखे जरमल छोकनिसभ नहिँया तोहरा सुद्ध आत्मिकि दुधक चाहना करिह, ताकि वकरसे तोहरा बढते जेबह हसे मुक्तिक पुरा अनुभव करबह। 3 केहकेकि प्रभु कतुरा दयगर बडसि कहलि बतवा तोहरा अनुभव करले बडह। 4 तोहरा प्रभु लघिना याइल बडह, जुने परमेस्वरक जिउते पत्थरा हखसि। जकरेके मन्सावाह काम हइने लगना कहके तिरा देलइ, परमेस्वर हुनेके महान सम्मान देवेके तहिँया चुनलसि। 5 तोहरा फेनि जिउते पत्थरा हखह। परमेस्वर तोहराके परयोग करके यापन आत्मिकि मन्दिर बनोइ बडसि, ताकि तोहरा पवितर पुजेरि भके येसु ख्रिस्टसे परमेस्वरक मन परना आत्मिकि भोग चढोह। 6 केहकेकि धरमसास्तरवामा यसके लिखाइल बडइ, “हेरह, मुइ सियोनमा एगुडा छानल हसे बहुत मोल परना कोनहरक पत्थरा बेठोइ बडहिँ। हुनेमा विस्वास करलहरा कुनहुँ फेनि लजियामा नाहिँ परतइ।” 7 उहेसे तोहरा जुने विस्वास करले बडह तोहार तहिँया त हुने बहुत मोलक बडसि, बाकि विस्वास हइने करलहरानिक तहिँया, “जुन पत्थरवाके घरवा बनोलहरा मिस्तिरियाह काम हइने लगना कहके तिरा देलइ उहे पत्थरवा मुख्य पत्थरा बनलिय।” 8 “हुने इहे पत्थरा हखसि, जुने मन्सावानिके ढुस लगोसिय, हुने इहे सिल हखसि, जाकर कारनसे मन्सावाह खससइ।” हुनुका परमेस्वरक वचन पालन हइने करलेसे ढुस लगतइ, केहकेकि हुनुकर तहिँया यसने तोकाइल रहलइ। 9 बाकि तोहरा त परमेस्वरक चुनल जनसभ, राजकिय पुजेरि, पवितर जाति हसे परमेस्वरक यपने परजासभ हखह। हुने तोहराके यन्हारिसे बलाके यचम्मक इजोरमा यनलसि, ताकि तोहरा हुनेक यचम्मक कामक घोसना करे सकह। 10 पहिला तोहरा परजा हइने रहलह, बाकि याबे तोहरा परमेस्वरक परजा भेल बडह। पहिला तोहरा परमेस्वरक दाया हइने पउले रहलह, बाकि यखना परमेस्वरक दाया पउले बडह। 11 प्रियसभ, इअ संसारमा तोहरा विदेसि हसे परदेसि नहिँया बडह। उहेसे तोहार आत्मिक चाहनाक विरोधमा लडाइ करलाहर देहियाक अभिलासासे यलग रहिह कहके मुइ बिन्ति करइ बडहिँ। 12 प्रभुमा विस्वास हइने करलहरानिक बिचा तोहरा यसल जिवन बितोइह, ताकि हुनुका तोहराके खराब काम करलाहर कहके दोस लगोले ताफेनि हुनुका तोहार यसल काम देखइ हसे परमेस्वरक न्याय करे यवइकि दिनवामा हुनेक महिमा करइ। सासक हसे मालिकसभक अदलमा रहिह 13 प्रभुक यादरक तहिँया, जम्मे मन्सावानिक हकिमवानिक अदलमा रहिह, चाहे सबसे वपरा रहलाहर राजा हखिय, 14 कि जम्मे हाकिमसभ, जकरेके रजवा खराब काम करलहरानिके दन्ड देवेके हसे यसल काम करलहरानिके बखान करेके तहिँया खटोले हखिय। 15 तोहरा यसल काम करके मुरुख मन्सावानिक मुरुख बात फदकना मुहवा बन्द करिह कहके परमेस्वरक इछा बडइ। 16 तोहरा स्वतन्तर मन्से नहिँया जिवन बितोइह। यापन स्वतन्तरताके खराब काम करेके तहिँया लाथ झिन लगोइह, बाकि परमेस्वरक दास भके यसल काम करिह। 17 जम्मे मन्सावानिके यादर करिह। ख्रिस्टमा विस्वास करलहरानिके प्रेम करिह। परमेस्वरसे डेरइह हसे रजवाके यादर करिह। 18 कमरवाह, पुरा यादरसे यापन मलिकवाक अदलमा रहिह। तोहार भलो सोचलाहर हसे दयगर मालिकसभक अदलमा मतरे हइने, बाकि निरदइ मलिकावानिक अदलमा फेनि रहिह। 19 यगर कुनहुँ परमेस्वरके विस्वास करलेसे अन्यायसे दुःख पाके कस्ट सहबह जउँ, उअ प्रसंसाक बात हखइ। 20 यगर कुनहुँ खराब काम करके पिटाइ खाके सहबह जउँ, यकरमा कथि प्रसंसाक बात भेलइ त? बाकि यसल काम करके फेनि दुःख भोगबह जउँ, परमेस्वर वकर तहिँया खुसि हखबसि। 21 यकरे तहिँया परमेस्वर तोहराके बलोले बडसि। ख्रिस्ट फेनि तोहार तहिँया दुःख भोगलसि हसे तोहार तहिँया एगुडा उदाहरन भेल बडसि, ताकि तोहरा फेनि हुनेक पइडामा बुलह। 22 हुने कबहुँ फेनि पाप हइने करलसि हसे हुनेक मुहवासे कुनहुँ छलकपटक बात हइने निकडलइ। 23 जब मन्सावाह हुनेक यपमान करलइ, हुने जवाफ हइने देलसि हसे हुने दुःख भोगइकि धम्कि हइने देलसि। बाकि धरमि परमेस्वर जुने ठिकसे न्याय करससि, हुनेमा भर परलसि। 24 हमरा पापक तहिँया मरके धारमिकताक तहिँया जिय सकुँ कहके ख्रिस्ट हमार पापसभ यापन देहियामा क्रुसवामा बोकलसि। हुनेक चोटवासे तोहरा डउल भेल बडह। 25 केहकेकि तोहरा त बगलवासे फटकल भेडासभ नहिँया रहलह, बाकि याबे त तोहरा भेडहार लघिना याइल बडह, जुने तोहार आत्माक रछा करससि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.