१ पतरुस 1 - चितवनिया थारु1 येसु ख्रिस्टक प्रेरित पतरुसवरिसे मुइ, पोन्टस, गलातिया, कापाडोकिया, एसिया हसे बिथिनिया छेतरमा परदेसि भके छाहरछिता भेलि परमेस्वरक मन्सावानिके इअ चिठिया लिखइ बडहिँ। 2 परमेस्वर पिता यापन पहिलाक योजना यनुसार जतेक जनके छानले बडसि हसे येसु ख्रिस्टक आग्या पालन करेके तके हुनेक रकतक छिटका पावेके तहिँया पवितर-आत्मासे सुद्ध बनोले बडसि। हुनुका जम्मे जनके इअ चिठिया लिखइ बडहिँ। परमेस्वरक अनुग्रह हसे सान्ति तोहारमा प्रसस्त हखइ। जिउते यासाक तहिँया परमेस्वरके प्रसंसा 3 हमार प्रभु येसु ख्रिस्टक पिता, परमेस्वरक प्रसंसा हखइ। हुनेक महान दायासे हमरा लउठा जनम पउले बडहुँ, केहकेकि हुने येसु ख्रिस्टके मरलिसे जिउतोलसि, उहेसे हमरा फेनि हुनेसाङे जियबहुँ कहके हमार जिउते यासा बडइ। 4 परमेस्वर तोहार तहिँया स्वरगमा कबहुँ हइने नास हखना, कबहुँ हइने बिगडाना हसे कबहुँ हइने झमलइना उतराधिकार रखले बडसि। 5 तोहरा विस्वास करलेसे परमेस्वर यापन सक्तिसे तोहराके मुक्तिक तहिँया सुरछित रखले बडसि। उअ मुक्ति तोहार तहिँया तयार कराइल बडइ हसे याखिर समयमा परकट हतइ। 6 यकरमा तोहरा आनन्दित बडह। हखेके त, यखनि तोहराके किहो समयक तहिँया परिछाक कारनसे बहुत खलिक कस्ट भोगे परइ बडइ। 7 इअ परिछासभ यसइ ताकि तोहार विस्वास जुन यागिसे खरइना नास भके जइना सोनसे मुल्यवान बडइ कहके परमान देसइ, उअ येसु ख्रिस्ट परकट हखइकि प्रसंसा, महिमा तके यादरक योग्य हतइ। 8 तोहरा हुनेके हइने देखले बडह, ताफेनि हुनेके प्रेम करसह। तोहरा हुनेके यखनि हइने देखसह, बाकि हुनेमा विस्वास करसह हसे बयान करे हइने सकना महान गउरवमय आनन्दमा खुसि हखइ बडह, 9 केहकेकि तोहरा हुनेमा विस्वास करलेसे तोहरा मुक्ति पउसह। 10 तोहार पउलि इअ मुक्तिक बारेमा अगमवक्तावाह खाँ डउलसे खोजले हसे छानबिन करले रहलइ तके परमेस्वर तोहराके देना उअ अनुग्रहक बारेमा हुनुका पहिलासे अगमवाडि करले रहलइ। 11 हुनुकरमा भेलि ख्रिस्टक आत्मा, ख्रिस्ट दुःख भोगबसि हसे पाछेसे हुने कस्के महान यादर पउबसि कहके हुनुकाके पहिलासे देखा देलसि। तब हुनुका इअ कहिया हसे कस्के हतइ कहके जाने खोजलइ। 12 अगमवक्तावाह यापन हइने, बाकि तोहार सेवा करइ बडइ कहलि बतवा परमेस्वर हुनुकाके परकट करदेले रहलसि। इअ बतवा स्वरगसे पठावल पवितर-आत्माक सक्तिसे सुसमाचार सुनोलहरानिसे यखनि तोहराके घोसना कराइल बडइ। इअ जम्मे बतवा स्वरगदुतवाह फेनि बुझे खोजसइ। पवितर जिवन जिएके बोलावट 13 उहेसे यापन-यापन मनवाके तयार पारिह, ठिकसे विचार करिह हसे येसु ख्रिस्ट परकट हखइकि देना अनुग्रहमा पुरा यासा रखिह। 14 परमेस्वरक आग्या पालन करलाहर सन्तान हखिह हसे पहिला अन्जानमा करल दुस्ट अभिलासामा झिन लगिह। 15 तोहराके बलोलहरा परमेस्वर जसने पवितर बडसि, तोहरा फेनि यापन जम्मे रहनसहनमा पवितर हखिह। 16 केहकेकि धरमसास्तरवामा यसके लिखाइल बडइ, “तोहरा पवितर हखिह, केहकेकि मुइ पवितर बडहिँ।” 17 जुन परमेस्वर हरेक मन्सेके यापन-यापन काम यनुसार पछपात हइने करके न्याय करससि, यगर तोहरा हुनेके पिता कहसह जउँ, तोहरा धरतियामा परदेसि भके रहइकलइ हुनेक डरमा रहके जिवन बितोइह। 18 परमेस्वर तोहराके मोल तिरके पिता-पुरखासे चलते याइल व्यरथक चालचलनसे छुटकारा देले हखसि कहलि बतवा तोहरा जनसह। इअ मोल सोन कि चाँनि नहिँया नास हखना चिजुसे हइने तिराइल हखइ, 19 बाकि निरदोस हसे दाग हइने भेल परमेस्वरक पाठा ख्रिस्टक बहुत मोल परना रकतसे तोहरा किनाइल हखह। 20 परमेस्वर संसार सिरिस्टि करलिसे यागा हुनेके छानले रहलसि, बाकि तोहार तहिँया इअ याखिर समयमा हुनेके परकट करलसि। 21 हुनेसे तोहरा परमेस्वरमा विस्वास करलह। परमेस्वर ख्रिस्टके मृत्युसे जिउतोलसि हसे महिमा देलसि। उहेसे तोहरा परमेस्वरमा विस्वास हसे यासा करले बडह। 22 यापन ददेर-भाइके सदि प्रेम करेके तहिँया तोहरा सत्य पालन करके पापसे सुद्ध भेल बडह, उहेसे तोहरा एक-दोसरि जनके हृदयसे यसल प्रेम करिह। 23 तोहरा विनासि बियासे हइने, बरु अबिनासि परमेस्वरक जिउते हसे कबहुँ हइने नास हखना वचनसे लउठा जनम पउले बडह। 24 केहकेकि धरमसास्तरवामा यसके लिखाइल बडइ, “जम्मे मन्सावाह घाँस जसने हखइ हसे हुनुकर देखसारि फेनि घाँसक फुला नहिँया हखइ, जसने घसवा झमलेसइ हसे फुलवा झरसइ, 25 बाकि प्रभुक वचन सबदिन रहसइ।” तोहराके परचार करलि सुसमाचारक वचन इहे हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.