१ युहन्ना 5 - चितवनिया थारुपरमेस्वरक पुतरमा विस्वास 1 येसुजि मुक्ति देलाहर ख्रिस्ट हखसि कहके विस्वास करलाहर हरेक जन परमेस्वरक सन्तान हखइ। जुने पिताके प्रेम करसिय उअ हुनेक सन्तानसभके फेनि प्रेम करसिय। 2 जब हमरा परमेस्वरके प्रेम करबहुँ हसे हुनेक आग्यासभ पालन करबहुँ, तब यकरेसे हमार थाह हतइ कि, हमरा परमेस्वरक सन्तानके प्रेम करसहुँ। 3 परमेस्वरके प्रेम करेके कहले हुनेक आग्यासभ पालन करेके हखइ। हुनेक आग्यासभ हमार तहिँया गारह हइने बडइ। 4 जुने परमेस्वरक सन्तान हखिय, उअ संसारके जितसिय। हमार विस्वाससे हमरा संसारके जितसहुँ। 5 कुने संसारके जिते सकबिय त? जुने येसुजिके परमेस्वरक पुतर कहके विस्वास करसिय, उहे मतरे संसारके जितसिय। येसु ख्रिस्टक साछिसभ 6 येसु ख्रिस्ट पानिसे हसे रकतसे यलसि। हुने पानिसे मतरे हइने बाकि पानि हसे रकतसे यलसि। इअ सत्य हखइ कहके पवितर-आत्मा साछि बडसि, केहकेकि पवितर-आत्मा सत्य बडसि। 7 तिन गो साछिसभ बडइ: 8 पवितर-आत्मा, पानि हसे रकत। इअ तिनु एगुडे बातमा साछि हसइ। 9 हमरा मन्सेसभक गवाहि स्विकार करसहुँ, बाकि परमेस्वरक देलि गवाहि त वकरसे झन महान बडइ। हुने यापन पुतरक बारेमा गवाहि देले बडसि। 10 जुने परमेस्वरक पुतरमा विस्वास करसिय, वकर हृदयमा इअ बतवाक गवाहि रहसइ। परमेस्वरमा विस्वास हइने करलहरा हुनेके झुठा ठहरोसिय, केहकेकि परमेस्वर यापन पुतरक बारेमा देलि साछिमा उअ विस्वास हइने करसिय। 11 साछि इअ हखइ कि, परमेस्वर हमराके अनन्त जिवन देले बडसि हसे इअ जिवन हुनेक पुतरमा बडइ। 12 जाकरसाङे परमेस्वरक पुतर बडसि, वकरसाङे जिवन बडइ हसे जाकरसाङे हुनेक पुतर हइने बडसि वकरसाङे जिवन हइने बडइ। अनन्त जिवनक निस्चयता 13 तोहरा परमेस्वरक पुतरक नाउँमा विस्वास करलेसे मुइ इअ चिठिया लिखइ बडहिँ, ताकि तोहरा अनन्त जिवन पउले बडह कहके जाने सकह। 14 हमार त परमेस्वरक यागा पुरा याट बडइ, केहकेकि यगर हमरा परमेस्वरक इछा यनुसार किहो मङबहुँ जउँ, हुने हमार परथाना सुनबसि। 15 हमरा परथानामा जथि मङले फेनि हुने सुनससि कहके हमार थाह बडइ, हुनेसाङे हमरा जथि मङले बडहुँ, उअ पउले बडहुँ कहके हमरा निस्चित बडहुँ। 16 कुनहुँ विस्वासिके पाप करइकि देखबिय हसे उअ पपवा नरकलइ नाहिँ पुगोबिय जउँ, वकर तहिँया परमेस्वरसाङे परथाना करदिय हसे हुने वकरेके जिवन देबसि। नरकमा पुगोना पाप फेनि बडइ। बाकि तोहराके यकर तहिँया परथाना कर देह कहके मुइ नाहिँ कहबहिँ। 17 जम्मे दुस्ट काम पाप हखइ, बाकि यसनुक पाप फेनि बडइ, जुन पपवा नरकलइ हइने पुगोसइ। 18 हमार थाह बडइ कि, परमेस्वरक सन्तान पाप करइ हइने रहसइ, केहकेकि परमेस्वरक पुतर वकरेके बचोससि हसे सइतनवा वकरेके छुए हइने सकिय। 19 हमरा परमेस्वरक सन्तान हखहुँ कहके हमार थाह बडइ हसे जम्मे संसार सइतानक अदलमा बडइ। 20 हमार थाह बडइ कि, परमेस्वरक पुतर यासकल बडसि हसे सत्य परमेस्वरके चिने सकुँ कहके हमराके हुने समझ सक्ति देले बडसि। हमरा येसु ख्रिस्टमा भेलेसे सत्य परमेस्वरमा बडहुँ। हुनेहिँ सत्य परमेस्वर हसे अनन्त जिवन हखसि। 21 मोर सोगोलि छोकनियाह, तोहार हृदयमा परमेस्वरक ठउरि लेना जम्मे चिजुसे तोहरा यलग रहिह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.