१ युहन्ना 4 - चितवनिया थारुसत्य हसे झुठा अगमवक्ता 1 प्रियसभ, मुइ परमेस्वरक आत्मासे फदकइ बडहिँ कहके कहलाहर हरेक जनके विस्वास झिन करिह। बाकि हुनुका परमेस्वरसे याइल हखइ कि हइने कहके हुनुकर जाँच करिह। केहकेकि बहुत जन झुठा अगमवक्तासभ इअ संसारमा निकडल बडइ। 2 यकरेसे तोहरा इअ परमेस्वरक आत्मा हखिय कहके चिनसह: हरेक जन जुने येसु ख्रिस्ट मन्से भके यलसि कहके स्विकार करबिय, वकरमा परमेस्वरक आत्मा बडसि। 3 येसुजि परमेस्वरसे याइल हखसि कहके स्विकार हइने करलाहर हरेक जन परमेस्वरवरिसे हइने, बाकि उअ ख्रिस्ट विरोधि आत्मा हखिय। उअ यबिय कहके तोहरा सुनले बडह हसे उअ इअ संसारमा यासकल बडिय। 4 मोर सोगोलि छोकनियासभ, तोहरा परमेस्वरक हखह। तोहरा झुठा अगमवक्तावानिके जितले बडह, केहकेकि तोहारमा भेलि पवितर-आत्मा संसारमा भेलि आत्मासे महान बडसि। 5 हुनुका संसारक हखइ, उहेसे हुनुका संसारक बात करसइ हसे संसारक मन्सावाह हुनुकर बतवा सुनसइ। 6 बाकि हमरा त परमेस्वरक हखहुँ। जुने परमेस्वरके चिनले बडिय, उअ हमार बात सुनसिय। जुने परमेस्वरक हइने हखिय, उअ हमार बात हइने सुनसिय। यकरेसे हमरा काकरमा सत्य आत्मा हसे झुठा आत्मा बडइ कहके चिनबहुँ। परमेस्वरक प्रेम हसे हमार प्रेम 7 प्रियसभ, हमरा एक-दोसरि जनके प्रेम करु, केहकेकि प्रेम परमेस्वरसे यसइ। जुने प्रेम करसिय उअ परमेस्वरक सन्तान हखिय हसे उअ परमेस्वरके चिनसिय। 8 जुने प्रेम हइने करसिय, उअ परमेस्वरके हइने चिनसिय, केहकेकि परमेस्वर प्रेम हखसि। 9 परमेस्वर हमराके यसके प्रेम देखोलसि कि, हुनेक पुतरसे हमरा जिवन पावे सकुँ कहके हुने यापन एक मतरे पुतरके संसारमा पठोलसि। 10 सदि प्रेम कहले इअ हखइ कि, हमरा परमेस्वरके प्रेम हइने करले बडहुँ, बाकि परमेस्वर हमराके प्रेम करलसि हसे हमार पापक भोग हखेके तहिँया यापन पुतरके पठोलसि। 11 प्रियसभ, यगर परमेस्वर हमराके खाँ प्रेम करले बडसि जउँ, हमरा फेनि एक-दोसरि जनके प्रेम करे परतइ। 12 परमेस्वरके कुनहुँ फेनि कबहुँ हइने देखले बडइ। यगर हमरा एक-दोसरि जनके प्रेम करबहुँ जउँ, हुने हमारमा बास करबसि हसे हुनेक प्रेम हमारमा सिद्ध हतइ। 13 हुने हमराके यापन पवितर-आत्मा देलेसे हमरा इअ जनसहुँ कि, हमरा परमेस्वरमा रहसहुँ हसे हुने हमारमा रहससि। 14 हमरा इअ देखले बडहुँ हसे साछि देबहुँ कि, पिता यापन पुतरके संसारक मुक्तिदाता हखेके तहिँया पठोले बडसि। 15 जुने येसुजिके परमेस्वरक पुतर कहके स्विकार करबिय, परमेस्वर वकरमा रहससि हसे उअ हुनेमा रहसिय। 16 परमेस्वर हमराके प्रेम करससि कहके हमार थाह बडइ हसे हुनेक प्रेममा हमार पुरा भरोसा बडइ। परमेस्वर प्रेम हखसि, जुने प्रेममा रहसइ उअ परमेस्वरमा रहसिय हसे परमेस्वर वकरमा रहससि। 17 यसने हमार प्रेम सिद्ध हखते जेतइ हसे न्यायक दिनवामा हमरा डेराए नाहिँ परतइ। केहकेकि हुने जसने बडसि, हमरा फेनि इअ संसारमा वसने बडहुँ। 18 प्रेममा डर हइने रहसइ, बाकि सिद्ध प्रेम डरके होटादेसिय। केहकेकि डरक सम्बन्ध त दन्डसे हसइ हसे जुने डेरेसिय उअ प्रेममा सिद्ध हइने हसिय। 19 परमेस्वर पहिला हमराके प्रेम करलेसे हमरा फेनि प्रेम करसहुँ। 20 यगर कुनहुँ, “मुइ परमेस्वरके प्रेम करसहिँ” कहतइ, बाकि याको विस्वासिसभके घिना करबिय जउँ उअ झुठा हखिय। केहकेकि जुने देखलि विस्वासिके प्रेम करे नाहिँ सकबिय जउँ हइने देखलि परमेस्वरके उअ कस्के प्रेम करे सकबिय त? 21 हुने हमराके इअ आग्या देले बडसि, जुने परमेस्वरके प्रेम करसिय, उअ याको विस्वासिसभके फेनि प्रेम करे परतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.