१ युहन्ना 3 - चितवनिया थारु1 हेरह, परमेस्वर पिता हमराके कतुरा बहुत प्रेम करले बडसि, यहवाँलइ कि हमरा परमेस्वरक सन्तानसभ कहाइल हखहुँ! हसे हमरा सदियो हुनेक सन्तान हखहुँ! संसारक मन्सावाह परमेस्वरके हइने चिनलेसे हमराके फेनि हइने चिनसइ। 2 प्रियसभ, यखनि हमरा परमेस्वरक सन्तान हखहुँ। हमरा कथि हखबहुँ कहके हमराके थाह हइने दियाइल बडइ। बाकि ख्रिस्ट यइलेपर हमरा फेनि हुनेक नहिँया हखबहुँ कहके जनसहुँ, केहकेकि हुने जसने बडसि हमरा हुनेके वसने देखबहुँ। 3 ख्रिस्टमा इअ यासा करलहरा जम्मे जन हुने पवितर भेल नहिँया यपनहिँके सुद्ध बनोसइ। 4 जुने पाप करसिय उअ परमेस्वरक व्यवस्था-भङ करसिय, केहकेकि व्यवस्था-भङ करलहिँ पाप हखइ। 5 येसुजि हमार पाप लिगाएके तहिँया यलसि कहके तोहार थाह बडइ हसे हुनेमा पाप हइने बडइ। 6 जुने ख्रिस्टमा रहसिय उअ पाप हइने करसिय। बाकि जुने पाप करइ रहसिय न त उअ हुनेके देखले बडिय न चिनले बडिय। 7 मोर सोगोलि छोकनियाह, कुनहुँ फेनि तोहराके झिन छकावे सकइ। जुने ठिक काम करसइ उअ धरमि रहसइ, जसने ख्रिस्ट धरमि बडसि। 8 जुने पाप करइ रहसिय उअ मन्सावा सइतानक हखिय। केहकेकि सइतनवा सुरुहिँसे पाप करते यवइ बडिय। सइतनवाक कमवा नास करेके तहिँया परमेस्वरक पुतर यलसि। 9 जुने परमेस्वरक सन्तान रहसइ, उअ पाप हइने करइ रहसिय, केहकेकि परमेस्वरक स्वभाव वकरमा रहसइ। उअ परमेस्वरक सन्तान भेलेसे पाप करइरहे नाहिँ सकबिय। 10 यकरेसे परमेस्वरक सन्तान हसे सइतानक सन्तान हखइ कहके चिने सकेसइ। ठिक काम हइने करलाहर हसे एक-दोसरि जनके प्रेम हइने करलाहर मन्से परमेस्वरक सन्तान हइने हखइ। एक-दोसरि जनके प्रेम करिह 11 तोहार सुरुहिँसे सुनलि समाद इअ हखइ, तोहरा एक-दोसरि जनके प्रेम करे परतइ। 12 हमरा कयिन नहिँया नाहिँ हखुँ, जुने सइतानक मन्से रहलिय हसे यापन भयवाके मारलिय। उअ यापन भयवाके केहके मारलिय? केहकेकि वकर कमवा दुस्ट रहलइ हसे वकर भयवाक कमवा धरमि रहलइ। 13 प्रियसभ, यगर संसारक मन्सावाह तोहराके घिना करतइ जउँ, तोहरा यचम्म झिन मनिह। 14 हमरा एक-दोसरि जनके प्रेम करलेसे, हमरा मृत्युके छाडके जिवनमा सरसकल बडहुँ कहके हमार थाह बडइ। जुने प्रेम हइने करसइ, उअ मृत्युमा रहसिय। 15 जुने याको विस्वासिसभके घिना करसिय, उअ हत्यारा हखिय हसे हत्यारासाङे अनन्त जिवन हइने रहसइ कहके तोहार थाह बडइ। 16 प्रेम कथि हखइ कहके हमरा यकरेसे जनसहुँ कि, येसु ख्रिस्ट हमार सटहामा मरलसि। उहेसे हमरा एक-दोसरि जनक तहिँया मरेके तयार हखे परतइ। 17 यगर ककरो लघिना संसारक धन-सम्पति बडइ, उअ याको विस्वासिसभके खाँचोमा परल देखके फेनि दाया नाहिँ करबिय जउँ, परमेस्वरक प्रेम वकरमा कस्के रहतइ? 18 मोर सोगोलि छोकनियाह, हमरा बतवा हसे मुहवासे मतरे प्रेम नाहिँ करु, हमार प्रेम सदि हखे परतइ। यसनुक प्रेम कामसे देखार हसइ। 19 यकरेसे हमरा सत्य यनुसार जिवन बितोलहर मन्से हखहुँ कहके थाह हसइ हसे यसने परमेस्वरक यागा हमरा यापन हृदयके उत्साह देवे सकबहुँ। 20 यगर हमार हृदय हमराके दोसि ठहरोबिय जउँ, हमरा जनसहुँ कि परमेस्वर हमार हृदयसे महान बडसि हसे हुने जम्मे चिजु जनससि। 21 प्रियसभ, यगर हमार हृदय हमराके दोसि नाहिँ ठहरोबिय जउँ, परमेस्वरक यागा जायके हमरा याट करे सकबहुँ, 22 हसे हमरा जथि मङसहुँ उअ हुनेसे पउसहुँ, केहकेकि हमरा हुनेक आग्या पालन करसहुँ तके हुनेक मन परना काम करसहुँ। 23 हुनेक आग्या इअ हखइ कि, हमरा हुनेक पुतर येसु ख्रिस्टक नाउँमा विस्वास करेके हसे हुनेक देलि आग्या यनुसार हमरा एक-दोसरि जनके प्रेम करेके हखइ। 24 जुने परमेस्वरक आग्यासभ पालन करसइ, हुनुका जम्मे जन हुनेमा रहसइ हसे हुने हुनुकरमा रहससि। हमारमा हुने बास करससि कहके हमरा जनसहुँ, केहकेकि हुने हमराके पवितर-आत्मा देले बडसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.