१ युहन्ना 2 - चितवनिया थारु1 मोर सोगोलि छोकनियाह, तोहरा पाप झिन करिह कहके मुइ इअ बतवा तोहराके लिखइ बडहिँ। बाकि यगर कुनहुँ पाप करतइ जउँ, हमारवरि पितासे बिन्ति करलाहर एक जन धरमि जन बडसि। हुने येसु ख्रिस्ट हखसि। 2 हुने हमराके पापक दन्डसे बचावेके तहिँया भोग हखसि हसे हमार पापक तहिँया मतरे हइने, बाकि संसारक जम्मे मन्सावानिक पापक तहिँया भोग हखसि। 3 यगर हमरा परमेस्वरक आग्या पालन करबहुँ जउँ, हमरा हुनेके सदियो चिनले बडहुँ कहके थाह हसइ। 4 यगर कुनहुँ “मुइ हुनेके चिनसहिँ” कहबिय, बाकि हुनेक आग्या पालन नाहिँ करबिय जउँ, उअ झुठा हखिय हसे वकर मनवामा सत्य हइने रहसइ। 5 बाकि जुने परमेस्वरक वचन पालन करसिय, उअ परमेस्वरके पुरा प्रेम करसिय। हमरा हुनेमा बडहुँ कहके यकरेसे निस्चित हसहुँ: 6 जुने परमेस्वरमा रहसहिँ कहके कहसिय, उअ येसुजिक नहिँया जिन्गि जियपरतइ। 7 प्रियसभ, मुइ तोहराके कुनहुँ लउठा आग्या हइने बरु उहे पुरनि आग्या लिखइ बडहिँ, जुन सुरुहिँसे तोहारसाङे चलते याइल रहलइ। इअ पुरनि आग्या तोहार सुनलि वचनवाहिँ हखइ। 8 ताफेनि मोर लिखलि आग्या लउठा आग्या हखइ। यकर सत्य ख्रिस्टमा हसे तोहारमा देखा परल बडइ, केहकेकि यन्हारि हेरइते जाइबडिय हसे सदि ज्योति पहिनहिँसे चम्कइ बडइ। 9 जुने मुइ इजोरमा बडइ कहके कहतइ, बाकि विस्वासि भयवाके घिना करतइ जउँ, उअ यखना फेनि यन्हारिमा बडिय। 10 जुने विस्वासि भयवाके प्रेम करसिय, उअ इजोरमा रहसिय तके याको जनके पाप करे नाहिँ लगोबिय। 11 बाकि जुने विस्वासि भयवाके घिना करसिय, उअ यन्हारिमा रहसिय हसे यन्हारिमा बुलसिय। उअ कहवाँ जाइबडिय कहके वकर हइने थाह रहसइ, केहकेकि यन्हारि वकरेके यान्हर बनोले रहसिय। 12 मोर सोगोलि छोकनियाह, मुइ तोहराके इअ लिखइ बडहिँ, केहकेकि येसु ख्रिस्टसे तोहार पाप छमा भेल बडइ। 13 अइ बाबासभ, मुइ तोहराके लिखइ बडहिँ, केहकेकि जुने सुरुहिँसे बडसि हुनेके तोहरा चिनले बडह। अरे ढोठनियावाह, मुइ तोहराके लिखइ बडहिँ, केहकेकि तोहरा दुस्ट सइतनवाके जितले बडह। मोर सोगोलि छोकनियाह, मुइ तोहराके लिखइ बडहिँ, केहकेकि तोहरा परमेस्वर पिताके चिनले बडह। 14 अइ बाबासभ, मुइ तोहराके लिखइ बडहिँ, केहकेकि जुने सुरुहिँसे बडसि हुनेके तोहरा चिनले बडह। अरे ढोठनियावाह, मुइ तोहराके लिखइ बडहिँ, केहकेकि तोहरा बरियार बडह हसे परमेस्वरक वचन तोहार हृदयमा भेलेसे तोहरा दुस्ट सइतनवाके जितले बडह। संसारके प्रेम झिन करिह 15 संसार हसे संसारमा भेलि कुनहुँ फेनि चिजुसभके प्रेम झिन करिह। यगर कुनहुँ मन्से संसारके प्रेम करतइ जउँ उअ परमेस्वरके प्रेम हइने करसिय। 16 केहकेकि संसारमा भेलि जम्मे चिजुसभ कहले देहियाक खोजलि खराब चिजु, यखियाक देखलि चिजुवा पावेके लालच करेके हसे यापन धन-सम्पतिमा घमन्ड करेके हखइ। इअ जम्मे पितासे हइने याइल हखइ बाकि संसारसे यसइ। 17 संसार हसे संसारक मन्सावाक खराब चाहना करलि इछा बितके जेतइ, बाकि परमेस्वरक इछा पुरा करलाहर चाहिँ सबदिनक तहिँया रहतइ। ख्रिस्ट-विरोधियानिक बारेमा चेतवनि 18 मोर सोगोलि छोकनियाह, इअ याखिर समय हखइ। ख्रिस्ट विरोधि यवइ बडइ कहके तोहरा सुनले बडह। तोहार सुनलि यनुसार बहुत जन ख्रिस्ट-विरोधिसभ यासकल बडइ। यकरेसे हमरा जनसहुँ कि, इअ याखिर समय हखइ। 19 हुनुका हमार मन्डलियासे निकडके गेलइ, वास्तवमा हुनुका हमार दाफाक मन्से हइने रहलइ। यगर हुनुका हमार दाफाक मन्से हतिय त हमरेसाङे रहतिय। हुनुका हमार हइने रहलइ कहके परमानित करेके तहिँया हमराके छाडके गेलइ। 20 बाकि ख्रिस्ट तोहराके पवितर-आत्मा देले बडसि हसे तोहरा जम्मे जन सत्य बात जनसह। 21 तोहरा सत्य बात हइने जनलेसे मुइ हइने लिखले, बाकि सत्य बात जनलेसे हसे वकरसे झुठा बात हइने यसइ कहके तोहरा जनलेसे मुइ लिखले बडहिँ। 22 झुठा कुने हखिय? जुने येसुजि ख्रिस्ट हखसि कहके इन्कार करसिय उअ झुठा हखिय। जुने पिता हसे पुतरके इन्कार करसिय ख्रिस्ट विरोधि उहे हखिय। 23 जुने पुतरके इन्कार करसिय, उअ पितासाङे हइने रहसिय। बाकि जुने पुतरके स्विकार करसिय वकरमा पिता फेनि रहससि। 24 जुन सिछा तोहरा सुरुहिँसे सुनले बडह, उअ तोहार मनवामा रहइ। यगर सुरुहिँसे सुनलि उअ सिछा तोहार मनवामा रहतइ जउँ, तोहरा पुतर हसे पितामा रहबह। 25 हुने हमराके एगुडा चिजु देबहिँ कहके प्रतिग्या करले बडसि, उअ अनन्त जिवन हखइ। 26 मुइ इअ जम्मे बतवा तोहराके छल करलहरानिक बारेमा लिखइ बडहिँ। 27 तोहराके कुनहुँ फेनि सिखावे नाहिँ परतइ, केहकेकि ख्रिस्ट तोहराके पवितर-आत्मा देले बडसि। बाकि हुनेक देलि पवितर-आत्मा तोहराके जम्मे बतवाक बारेमा सिखोबसि। इअ सिखोलि बतवा सत्य बडइ झुठा हइने। जसने हुने तोहराके सिखोले बडसि, वसने तोहरा ख्रिस्टमा रहिह। परमेस्वरक छोकनिसभ 28 मोर सोगोलि छोकनियाह, हुने फिरके यवइकि, हमार सहास हखइ हसे हमरा हुनेक यागा लाज माने झिनपरइ कहके परमेस्वरमा रहिह। 29 हुने धरमि बडसि कहके तोहार थाह बडइ। उहेसे तोहरा जाने परतइ कि, जुने ठिक काम करसइ हुनुका जम्मे जन परमेस्वरसे जरमल रहसइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.