१ कोरिन्थि 9 - चितवनिया थारुप्रेरितक अधिकार 1 कथि मुइ स्वतन्तर हइने बडहिँ त? कथि मुइ प्रेरित हइने हखहि त? कथि मुइ हमार प्रभु येसुजिके हइने देखले बडहिँ त? कथि तोहराहिँ प्रभुमा मोर करल कामक परिनाम हइने हखह त? 2 मुइ याको जनक तहिँया प्रेरित हइने भेले ताफेनि कमसे-कम तोहार तहिँया त हखहि, केहकेकि मुइ प्रभुक एक जन प्रेरित हखहि कहके तोहराहिँ परमान हखह। 3 मोर विरोधमा दोस लगोलहरानिके मोर जवाफ इहे हखइ, 4 कथि हमार करलि कमवाक तहिँया हमरा खाए-पिएके खरचा पावेके अधिकार हइने बडइ त? 5 कथि याको प्रेरितवानिक नहिँया, प्रभुक भयवाह कि पतरुस नहिँया हमार फेनि यापन विस्वासि जनि लेके बुलेके अधिकार हइने बडइ त? 6 कथि बारनाबास हसे मुइ मतरे पेटवा पालेके तहिँया काम करे परतइ त? 7 यापन खरचमा कुने सिपाहिक काम करबिय त? कथि अंङगुरवा रोपलाहरा अंङगुर खाए नाहिँ पउबिय? कथि बगलवा हेरचाह करलाहर यउनियवा पसुवाक दुध खाए नाहिँ पउबिय? 8 कथि मुइ इअ बतवा मन्सेक हिसाबसे कहइ बडहिँ? कथि व्यवस्था फेनि इहे बतवा हइने कहसिय त? 9 केहकेकि मोसाक व्यवस्थामा यसके लिखाइल बडइ, “दउरि करइकि गोरुवाक मुहवामा तोबडा झिन लगोइह।” कथि परमेस्वर इअ बतवा गोरुवानिक तहिँया मतरे कहले बडसि? 10 कथि हुने इअ हमार तहिँया हइने कहले हखसि त? हँ, इअ बतवा हमरे तहिँया कहाइल हखइ, केहकेकि खेतवा जोतलाहरा किहो यासा राखके जोतसिय हसे दउरि करलहरा किहो पउबहि कहके दउरि करसिय। 11 यगर हमरा तोहार बिचा आत्मिक बिया बोउले बडहुँ हसे हमरा तोहारसे किहो चिजु लेबहुँ जउँ, कथि उअ तोहार तहिँया बहुत भेलइ त? 12 यगर याको परचार करलहरा फेनि तोहारसे हक दाबि करसइ जउँ, कथि हुनुकरसे हमार झन बढता हक हइने बडइ त? बाकि हमरा इअ हक हइने चलोलहुँ हसे ख्रिस्टक बारेमा सुसमाचार सुनोइकि किहो बाधा नाहिँ पारु कहके हमरा जम्मे बतवा सहलहुँ। 13 कथि तोहार हइने थाह बडइ कि, मन्दिरवामा काम करलहरा मन्दिरवामा यनलि चिजुवासे पलेसइ हसे वेदियामा काम करलहरा भोग चढोलिसे बखरा पउसइ? 14 वसने करके सुसमाचार परचार करलहरा फेनि सुसमाचार परचार करना कामसे जिन्गिक गुजारा चलोइ कहके प्रभुक आग्या बडइ। 15 बाकि मुइ कबहुँ फेनि कुनहुँ हक हइने चलोले बडहिँ, कि मोर तहिँया यसनुक करह कहके फेनि मुइ इअ हइने लिखले हखहि। तोहारसे किहो हइने लेके सुसमाचार परचार करना बिसय नहिँया घमन्ड करना बातसे कुनहुँ मोरके वंचित करलिसे त बरु मरेके यसल हतिय। 16 यगर मुइ सुसमाचार परचार करबहिँ जउँ, वकरमा घमन्ड करेके मोर किहो कारन हइने बडइ, केहकेकि इअ मुइ करहि परतइ। यगर मुइ सुसमाचार परचार नाहिँ करबहिँ जउँ, मोरके धिकार बडइ। 17 यगर मुइ इअ कमवा यापन इछासे करबहिँ जउँ, मुइ पावे परना बनिहारि पउतहिँ। यगर मोर इछासे इअ कमवा नाहिँ करबहिँ फेनि परमेस्वर मोरके देलि जिम्मेवारि मतरे मुइ पुरा करइ बडहिँ। 18 तब मोर बनिहारि कथि हखइ त? इअ हखइ कि, मुइ सुसमाचार परचार करइकि मोर काममा किहो हक दाबि नाहिँ करके वसहि सुसमाचार परचार करते रहुँ। 19 केहकेकि मुइ जम्मे मन्सावानिसे स्वतन्तर भेले ताफेनि बहुत जनके ख्रिस्टमा याने सकुँ कहके जम्मे जनक तहिँया मुइ यपनहिँके कमारा बनोलहिँ। 20 यहुदियानिक बिचा काम करइ हुनुका ख्रिस्टमा विस्वास करइ कहके मुइ यहुदि नहिँया बनलहिँ। मोसाक देलि व्यवस्थाक अदलमा रहलहराह ख्रिस्टमा विस्वास करइ कहके मुइ व्यवस्थाक अदलमा हइने रहके फेनि व्यवस्थाक अदलमा रहल नहिँया भेलहिँ। 21 जब मुइ व्यवस्था हइने मनलाहर अयहुदियानिक बिचा रहलहिँ, हुनुका ख्रिस्टमा विस्वास करइ कहके मुइ व्यवस्था हइने मनलाहर नहिँया भेलहिँ। यकर मतलब इअ हइने कि, मुइ परमेस्वरक व्यवस्था हइने मनसहि, बरु मुइ त ख्रिस्टक व्यवस्थाक अदलमा बडहिँ। 22 कमजोर मन्सेसभक बिचा काम करइकि हुनुका ख्रिस्टमा विस्वास करइ कहके मुइ कमजोरसभ नहिँया भेलहिँ। मुइ जसने कतेक जनके बचावे सकहि कहके जम्मे जनक तहिँया जम्मे खलिक मन्से बनलहिँ। 23 मुइ सुसमाचार फइलावेके तहिँया आसिसक भागिदार हखे सकुँ कहके मुइ इअ जम्मे करसहिँ। 24 कथि तोहार हइने थाह बडइ, दउडमा भाग लेलहरवाह जम्मे जन दगुरसइ, बाकि पुरस्कार एक जन मतरे पउसइ? उहेसे पुरस्कार पावेके तहिँया दगुरिह। 25 खेलमा भाग लेलहरवाह जम्मे बिसयमा यपनहिँके यापन वंसमा राखे परतइ। हुनुका नास भके जइना मकुट पावेके तहिँया यसके करसइ, बाकि हमरा कबहुँ हइने नास हखना मकुट पावेके तहिँया यसके करसहुँ। 26 उहेसे मुइ बिना उदेस्यक हइने दगुरसहिँ। मुइ बयरवामा मुक्का हानलाहर मन्से नहिँया हइने हानसहि। 27 बाकि मुइ यापन देहियाके तह लगाके यापन वंसमा रखसहि, ताकि मुइ याको जनके परचार करइकि मुइ योग्य नाहिँ ठहरबहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.