१ कोरिन्‍थि 8 - चितवनिया थारु

मुरतियानिके चढावल खइना चिजु

¹ याबे मुइ मुरतियानिके चढोलि खइना चिजुवाक बारेमा कहबहिँ। हमार थाह बडइ कि, “हमार जम्‍मे जनसाङे ग्‍यान बडइ।” बाकि ग्‍यान मन्‍सेके घमन्‍डि बनोसिय हसे प्रेम विस्‍वासिसभके बरियार बनोसिय।

² यगर कुनहुँ “मुइ किहो जनले बडहिँ” कहके सोचसिय, वास्‍तवमा उअ जतेक जानेके हखइ, उअ उतुरा हइने जनले रहसिय।

³ बाकि कुनहुँ परमेस्‍वरके प्रेम करसइ जउँ, परमेस्‍वर वकरेके चिनससि।

⁴ उहेसे, मुरतियानिके चढोलि खइना चिजुवा खाए मिलतइ कि नाहिँ कहलि बारेमा हमरा जनसहुँ कि, “इअ संसारमा मुरति कहल किहो फेनि हइने बडइ” हसे “एक परमेस्‍वर बाहेक याको कुनहुँ फेनि हइने बडइ।”

⁵ स्‍वरगमा हखइ कि धरतियामा हखइ, नाउँ मतरेक देवि-देवतासभ बडइ हसे कतेक जन यसनुक बहुत देवि-देवता हसे प्रभुसभके पुजा करसइ।

⁶ बाकि हमार थाह बडइ कि, एगुडा मतरे परमेस्‍वर पिता बडसि, हुनेहिँ जम्‍मे चिजु सिरिस्‍टि करले बडसि हसे हमरा हुनेक तहिँया जियसहुँ। हमार थाह बडइ कि, एगुडे मतरे प्रभु, येसु ख्रिस्‍ट बडसि हसे हुनेसे जम्‍मे चिजु सिरिस्‍टि भेलइ तके हुनेहिँसे हमरा जियसहुँ।

⁷ बाकि जम्‍मे जन इअ बतवा हइने जनसइ। कतेक जनक पहिला मुरति पुजा करेके बानि भेलेसे, हुनुका यखना फेनि वसनुक खइना चिजुवा खइले “सदियो मुरतियाके चढोलि खइना चिजुवा खाइ बडहुँ” कहके ठानसइ। हुनुकर मनवामा यसनुक गलत विचार यइलेसे उअ खइनवा चिजुवासे “मुइ असुद्ध भेलहिँ” कहके ठानसइ।

⁸ बाकि खइनवा चिजुवा हमराके परमेस्‍वरक लजिके नाहिँ लिगबिय। हमरा नाहिँ खेबहु जउँ किहो हानि नाहिँ हतइ हसे खइले फेनि किहो लाभ नाहिँ हतइ।

⁹ बाकि तोहरा चेतले रहिह, तोहरा जथि पउले उहे खाएके स्‍वतन्‍तरतासे विस्‍वासमा कमजोर भेलहरवानिक तहिँया ठकरक कारन झिन हखइ।

¹⁰ यगर कुनहुँ कमजोर विस्‍वासिक जाकर मनवामा यसनुक गलत विचार यसइ, उअ तोहार नहिँया ग्‍यान भेल मन्‍सेके मन्‍दिरवामा मुरतियाके चढोलि खइना चिजुवा खाइकि देखबिय जउँ, कथि उअ फेनि मुरतियाके चढोलि खइनवा चिजुवा खाएके याट नाहिँ करबिय त?

¹¹ यसनुक कमजोर विस्‍वासि तोर ग्‍यानक कारनसे नास हखबिय, जाकर तहिँया ख्रिस्‍ट मरलसि।

¹² यसके तोहरा कमजोर विस्‍वासि भयवानिक विरोधमा पाप करइ हसे हुनुकर मनवाके चोट पुगाके, तोहरा ख्रिस्‍टक विरोधमा पाप करसह।

¹³ उहेसे, यगर मोर खइना चिजुवा मोर भयवाके पापमा पारबिय जउँ, मोर कारनसे उअ पापमा झिन परिय कहके मुइ कबहुँ फेनि मासु नाहिँ खेबहिँ।