१ कोरिन्थि 7 - चितवनिया थारुबियाहक बारेमा सिछा 1 तोहरा “मरदाना मन्से जनिसाङे देहिक सम्बन्ध नाहिँ रखले यसल हखइ” कहके मोरके यापन चिठियामा लिखलि बिसयक बारेमा मुइ इअ कहबहिँ कि, 2 तोहार बिचा बहुत अनइतिक काम हखलेसे हरेक मरदानाक यपने जनि हखइ हसे हरेक जनिक फेनि यपने मरद हखइ। 3 मरदावा यापन जनियावासाङे देहिक सम्बन्ध राखे परतइ हसे जनियावा फेनि यापन मरदावासाङे देहिक सम्बन्ध राखे परतइ। 4 केहकेकि जनियावाक यापन देहियामा यापन अधिकार हइने बडइ, बाकि वकर मरदावाक रहसइ, वसने मरदावाक यापन देहियामा यापन अधिकार हइने बडइ, बाकि वकर जनियावाक बडइ। 5 मरद हसे जनि एक-दोसरि जनके देहिक सम्बन्धसे यलग झिन रखिह। परथानामा समय बितावे सकह कहके किहो जुनक तहिँया तोहरा सहमतिमा यलग रहले फेनि फेरि एकसाङे रहिह, नत तोहरा यपनहिँके यापन वसमा राखे नाहिँ सकबह हसे सइतनवा तोहराके परिछामा पारबिय। 6 इअ बतवा मुइ तोहराके आग्याक रुपमा हइने, बाकि अनुमतिक रुपमा कहइ बडहिँ। 7 हखेके त जम्मे जन मोर नहिँया रहइ कहके मोर इछा बडइ, बाकि हरेक मन्से परमेस्वरसे विसेस वरदान पउले बडइ, एक जन एक खलिक वरदान, दोसरि जन दोसरे खलिक वरदान। 8 याबे मुइ बियाह हइने भेलिनके हसे विधुवानिके इअ कहबहिँ कि, तोहरा बियाह हइने करके मोर नहिँया रहले यसल हखइ। 9 बाकि हुनुका यपनहिँके यापन वसमा राखे नाहिँ सकतइ जउँ हुनुका बियाह करइ, केहकेकि मनवा थामे हइने सकलिसे त बियाह करले यसल हखइ। 10 याबे बियाह करलि मन्सावानिके मुइ इअ आग्या देइ बडहिँ, इअ मोर हइने, बाकि प्रभुक आग्या हखइ। जनियावा यापन मरदावाके झिन छडिय। 11 यगर जनियावा यापन मरदावाके छडबिय जउँ उअ बियाह झिन करिय, बरु यापन मरदावासाङे मिलापमा यइय हसे मरदावा फेनि यापन जनियावाके झिन छडिय। 12 याको जनके मुइ इअ कहबहिँ, यगर ककरो ख्रिस्टमा विस्वास हइने करल जनि बडइ हसे उअ यापन मरदावासाङे रहे खोजबिय जउँ, उअ यापन जनियावाके झिन छडिय। (इअ मोर आग्या हखइ, प्रभुक हइने।) 13 यगर ककरो ख्रिस्टमा विस्वास हइने करल मरद बडइ हसे उअ यापन जनियावासाङे रहे खोजबिय जउँ, उअ यापन मरदावाके झिन छडिय। 14 केहकेकि विस्वास हइने करलाहर मरद विस्वास करलाहर यापन जनियावाक कारनसे सुद्ध हसइ हसे विस्वास हइने करलाहर जनि विस्वास करलाहर यापन मरदावाक कारनसे सुद्ध हसइ, नत तोहार बेटवा-बेटिया असुद्ध हतिय, बाकि याबे हुनुका पवितर बडइ। 15 बाकि विस्वास हइने करलाहर मरद कि जनि छुटियाके रहे खोजतइ जउँ, हुनुका छुटियाके रहे सकतइ। यसनुक अवस्थामा विस्वास करल मरद कि जनि बियाहक बन्धनमा नाहिँ रहतइ, केहकेकि परमेस्वर हमराके सान्तिक जिवन बितावेके तहिँया बलोले हखसि। 16 हेरहि जनिनिया, तोर कथि थाह! हखे सकतइ तोर कारनसे तोर मरदावा उद्धार पावे सकबिय कि? हेरहि मरदनवा, तोर कथि थाह! हखे सकतइ तोर कारनसे तोर जनियावा उद्धार पावे सकबिय कि? 17 प्रभु जकरेके जसने खटोले बडसि हसे जकरेके जसनुक अवस्थामा परमेस्वर बलोले बडसि, उअ उहे यनुसार जिए परतइ। जम्मे मन्डलियानिक तहिँया मोर नियम इहे हखइ। 18 यगर कुनहुँ खतना भेल मन्सेके परमेस्वर बलोले बडसि जउँ, उअ खतना झिन मेटइय। यगर कुनहुँ खतना हइने भेल मन्सेके परमेस्वर बलोले बडसि जउँ, उअ खतना झिन करिय। 19 केहकेकि खतना करके कि नाहिँ करके किहो फरक हइने बडइ, बाकि परमेस्वरक आग्या पालन करेके मुख्य बात हखइ। 20 परमेस्वर जसनुक अवस्थामा बलोले बडसि, उअ अवस्थामा हरेक मन्से रहइ। 21 कथि परमेस्वर तोरके बलोइकि तुइ कमारा रहलहि? यगर रहलहि जउँ चिन्ता झिन करसि, बाकि स्वतन्तर हखेके मउका पउबहि जउँ स्वतन्तर हखबे करसि। 22 केहकेकि प्रभु बलोइकि जुने कमारा रहलिय, उअ प्रभुक स्वतन्तर मन्से भेल बडिय। वसने करके प्रभु बलोइकि जुने स्वतन्तर मन्से रहलिय, उअ ख्रिस्टक कमारा भेल बडिय। 23 परमेस्वर तोहराके मोल तिरके किनले बडसि, उहेसे मन्सावानिक कमारा झिन बनिह। 24 प्रियसभ, परमेस्वर तोहराके बलोइकि तोहरा जसनुक अवस्थामा रहलह, उहे अवस्थामा परमेस्वरसाङे रहिह। 25 याबे यखनिलइ बियाह हइने करलहरानिक बारेमा हुनुकर तहिँया प्रभुसे मुइ किहो फेनि आग्या हइने पउले बडहिँ, बाकि प्रभुक दायासे मुइ एक जन विस्वासयोग्य मन्से भेलेसे तोहराके इअ सल्लाह देबहिँ। 26 यखनिक संकटके विचार करइकि मोर यसनुक लगइ बडइ कि, जुने जसनुक अवस्थामा बडइ, उअ उहेमा रहले यसल हतइ। 27 यगर तोर जनि बडइ जउँ, यापन जनियावासे छुटियाके झिन रहसि। यगर तोर जनि हइने बडइ जउँ, बियाह करे झिन खोजसि। 28 बाकि तुइ बियाह करले फेनि उअ पाप हइने हखइ। वसने करके कुवारि-कन्या बियाह करले फेनि उअ पाप हइने करसिय। ताफेनि बियाह करलहराक इअ संसारमा झन्झट हतइ हसे मुइ तोहराके यकरसे बचावे चाहसहिँ। 29 प्रियसभ, मोर कहे खोजलि बतवा इअ हखइ कि, समय इचिके बडइ, उहेसे जनि भेलहरवाह जनि हइने भेल नहिँया रहइ। 30 सोक करलहरा सोक हइने करलाहर नहिँया हखइ हसे खुसि हखलहरा खुसि हइने भेल नहिँया हखइ। किनमेल करलहरा यापनसाङे किहो हइने भेल नहिँया रहइ। 31 जुने संसारक चिजुसभक लेनदेन करसइ, हुनुका वकरमा किहो चासो हइने भेल नहिँया करइ, केहकेकि संसारक यखनिक रुप बितके जेतइ। 32 तोहरा जिवनक बारेमा चिन्ता झिन करिह कहके मुइ चाहसहिँ। बियाह हइने करल मन्से प्रभुके कस्के खुसि पारु कहके प्रभुक बिसयमा चिन्ता करसिय। 33 बाकि बियाह करलि मन्सावा यापन जनियावाके कस्के खुसि पारु कहके संसारक चिजुक चिन्ता करसिय। 34 यसनुक मन्सेक मन दुन्हुवरि बटाइल रहसइ। बियाह हइने करल जनियानि कि कुवारि-कन्या, देहिया हसे आत्मा दुन्हुमा कस्के पवितर रहहि कहके प्रभुक बिसयमा ध्यान देसिय, बाकि बियाह भेलि जनियानि यापन मरदावाके कस्के खुसि पारु कहके संसारक चिजुसभमा ध्यान देसिय। 35 इअ बतवा मुइ तोहार भलाइक तहिँया कहइ बडहिँ, तोहराके वसनुक करेकेसे रोके खोजइ हइने, बाकि तोहरा यसल काम करते जाह हसे पुरा मनसे प्रभुक सेवा करे सकह कहके कहे खोजइ हखहि। 36 कुनहुँ मङनि भेल जोडि बियाह नाहिँ करेके निरनय लेल अवस्थामा, यगर उअ मन्सावा मुइ कुवारि-कन्यासाङे उचित व्यबहार हइने करइ बडहिँ कहके सोचसिय हसे यापन मनवा थामे नाहिँ सकके बियाह करे परतइ कहके सोचबिय जउँ, हुनुका बियाह करे सकतइ। इअ पाप नाहिँ हतइ। 37 बाकि उअ मन्सावा यापन मनवामा बियाह नाहिँ करबहिँ कहके पाका करले बडिय हसे करकापमा हइने परल बडिय, बाकि यापन मनवाके थामके राखे सकबिय, उअ मन्सावा कुवारि-कन्याके बियाह नाहिँ करबहि कहके निरनय करले फेनि ठिके हखइ। 38 उहेसे जुने यापनसाङे मङनि भेलि कुवारि-कन्याके बियाह करबिय, उअ यसल करसिय, बाकि जुने बियाह नाहिँ करबिय उअ झन यसल करबिय। 39 मरदावा जियइलइ जनियावा वकरसाङे बियाहक बन्धनमा रहसिय, यगर वकर मरदावा मरबिय जउँ, उअ यापन मन लागल मन्सेसाङे बियाह करे सकबिय, बाकि उअ मन्सावा विस्वासि हखे परतइ। 40 बाकि मोर विचार इअ हखइ कि, उअ फेरि बियाह नाहिँ करके रहबिय जउँ झन खुसि हखबिय हसे मोर लगसइ कि, मुइ इअ सल्लाह परमेस्वरक आत्मासे देइ बडहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.