१ कोरिन्थि 6 - चितवनिया थारुविस्वासिसभक बिचा मुदामामिला 1 यगर तोहारमधे एक जन विस्वासिक दोसरि विस्वासिसाङे झगडा भेल बडइ जउँ, कथि उअ मुदा फइसलाक तहिँया विस्वासिसभ लघिना नाहिँ जाके संसारिक न्यायधिसक लघिना जायके याट करबिय त? 2 कथि परमेस्वरक पवितर जनसभ संसारक न्याय करे परतइ कहके तोहार थाह हइने बडइ? यगर तोहरा संसारक न्याय करबह जउँ, कथि यसनुक झिन-झिन बातसभ तोहरा मिलावे नाहिँ सकबह त? 3 हमरा स्वरगदुतवानिक न्याय करबहुँ कहके कथि तोहार हइने थाह बडइ? वसके भेले इअ जिवनक साधारन बातसभ मिलावेके कथि गारह बडइ त? 4 यगर तोहारमा यसनुक झगडा बडइ जउँ, केहके तोहरा न्यायक तहिँया परमेस्वरके हइने चिनलाहर लघिना जेबह? जकरेके मन्डलिया किहो मोलक हइने ठानसइ। 5 मुइ तोहराके लजियामा पारेके तहिँया इअ कहले बडहिँ। कथि तोहार बिचा एक जन फेनि बुद्धियार मन्से हइने बडइ, जुने ददेर-भाइक बिचा झगडा हखइकि मिलावे सकबिय? 6 बाकि एक जन भाइ दोसरि भयवासाङे झगडा करके न्यायक तहिँया परमेस्वरके हइने चिनलहराक अदालतमा लिगसिय। 7 तोहरा एक-दोसरि जनक विरोधमा अदालतमा मुदा लडसह जउँ, तोहार हार भेसकल बडइ। अदालतमा गेलिसे बरु सहेके डउल हखइ हसे कुनहुँ तोरके ठगके किहो लिगले बडिय जउँ, वकर विरोधमा अदालत नाहिँ जाके ठगइलहिँ डउल हखइ। 8 बाकि तोहरा त यपनहिँ याको विस्वासिसभके अन्याय करसह हसे ठगसह। 9 कथि अधरमि मन्सावाह परमेस्वरक राज भितरा पेसे नाहिँ पउतइ कहके तोहार थाह हइने बडइ? यपनहिँके धोखा झिन दिह, केहकेकि अनइतिक काम करलाहर, मुरति पुजा करलाहर, धुचुड करलाहर, पुरुसगामिसभ, मरदाना मन्सेसभ मरदनवानिसाङे हइने डउल काम करलाहर, 10 ठगलहराह, लोभियाह, मोदहरियावाह, निना करलहरा हसे लुटलाहराह परमेस्वरक राज भितरा पेसे नाहिँ सकतइ। 11 तोहरा कतेक जन यसने रहलह, बाकि हमार प्रभु येसु ख्रिस्टक नाउँमा हसे पवितर-आत्मासे तोहरा पापसे धवाइल बडह, सुद्ध भेल बडह तके परमेस्वरक यागा धरमि ठहराइल बडह। धुचुडसे यलग रहिह 12 तोहारमधे कुनहुँ कहे सकबह, “मुइ जथि चाहबहिँ उअ करे सकबहि,” बाकि जम्मे चिजुवा तोहार भलाइ नाहिँ करबिय। “मुइ जथि चाहबहिँ उअ करे सकबहि,” बाकि मुइ कुनहुँ चिजुक कमारा नाहिँ हखबहिँ। 13 तोहारमधे कुनहुँ कहे सकबह, “खइनवा चिजुवा पेटवाक तहिँया हसे पेटवा खइनवा चिजुवाक तहिँया हखइ,” बाकि परमेस्वर दुन्हुँके नास करबसि। मन्सावाक देहिया धुचुडक तहिँया हइने, बाकि प्रभुक तहिँया हखइ हसे प्रभु देहियाक मालिक हखसि। 14 परमेस्वर यापन सक्तिसे प्रभुके मरलिसे जिउतोलसि हसे हुने यापन सक्तिसे हमराके फेनि जियोबसि। 15 तोहार देहिया ख्रिस्टक देहिक यङगसभ हखइ कहके कथि तोहार हइने थाह बडइ त? कथि मुइ ख्रिस्टक देहियाक यङगसभ लेके वेस्यावानिक यङगसाङे मिला देउ? इअ कबहुँ फेनि झिन हखइ! 16 वेस्या लघिना गेलहरवा वेस्यासे एके देहि हसइ कहके कथि तोहार हइने थाह बडइ? धरमसास्तरवामा यसके लिखाइल बडइ, “हुनुका दुन्हु जन एगुडे देहि हतइ।” 17 बाकि जुने प्रभुसाङे एक हसइ, उअ हुनेसाङे आत्मामा एक हसइ। 18 धुचुडसे तनाउ रहिह। धुचुड पाप करइकि देहियाके जसनुक हइने डउल असर परसइ, याको कुनहुँ खलिक पाप करइकि देहियामा वसनुक असर हइने परसइ, बाकि धुचुड करलहरा यापन देहियाक विरुद्धमा पाप करसइ। 19 कथि तोहार देहिया पवितर-आत्माक मन्दिर हखइ कहके हइने थाह बडइ? परमेस्वरक देलि पवितर-आत्मा तोहार देहिया भितरा बास करससि हसे तोहरा यपनहिँ फेनि यापन हइने हखह। 20 परमेस्वर तोहराके मोल तिरके किनले हखसि। उहेसे तोहरा यापन देहियासे परमेस्वरक यादर करिह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.