१ कोरिन्थि 5 - चितवनिया थारुधुचुडक बारेमा 1 तोहार बिचा धुचुड बडइ कहके सुनइ बडहिँ, यसनुक धुचुड त ख्रिस्टमा विस्वास हइने करल मन्सेसभ फेनि हइने करसइ, केहकेकि तोहारमधे कुनहुँ एक जन यापन मइघवा महतरियाके धरले बडह। 2 तोहरा त घमन्ड करसह! तोहरा बरु सोक करके वसनुक काम करलाहर मन्सेके त तोहार बिचासे निकडा देवेके रहलइ। 3 मुइ तोहारसाङे देहियामा नाहिँ भेले फेनि मोर मनवा त तोहरेसाङे बडइ। मुइ तोहारसाङे भेल नहिँया यसनुक काम करलहराक न्याय करसकले बडहिँ। 4 तोहरा हमार प्रभु येसुक नाउँमा जामा हखइकि मोर मनवा तोहारसाङे रहसइ हसे प्रभु येसुक सक्ति फेनि वहवाँ हसइ। 5 वकर देहियाक पापि स्वभाव नास हखइ कहके उअ मन्सावाके सइतनवाक हथवामा सप देवे परतइ, ताकि प्रभु येसुक न्यायक दिनवामा वकर आत्मा बचइ। 6 तोहार करलि घमन्ड ठिक हइने बडइ। पिठवामा इचिका खमिर मिझरोइकि जम्मे पिठवामा असर परसइ कहके कथि तोहार हइने थाह बडइ? 7 तोहरा त खमिर हइने भेल मन्से हखह, उहेसे लउठा पिठाक गोलरा हखेके तहिँया पुरनि खमिरवा निकडा देह, केहकेकि हमार निस्तार-पाबनिक पाठा ख्रिस्ट भोग हखसकल बडसि। 8 उहेसे हमरा खराबि हसे दुस्टताक पुरान खमिरसे बनल रोटि खाके निस्तार-पाबनि नाहिँ मनाउ, बाकि खमिर हइने मिझराइल, सुद्ध तके सत्यताक रोटिसे निस्तार-पाबनि मनाउ। 9 मुइ तोहराके धुचुडसभसाङे सङगत झिन करिह कहके चिठि लिखले रहलहिँ। 10 यकर यरथ तोहरा धुचुड करलहरा, लोभ करलहरा, ठगलहरा हसे मुरति पुजा करलहरा, ख्रिस्टके विस्वास हइने करलहरानिसाङे सङगत झिन करिह कहके त हइने कहले हखहि। हुनुकरसे यलग रहे चाहबह जउँ तोहरा संसारसे निकडके जाए परतइ। 11 बाकि यसनुक मन्सेसाङे सङगत झिन करिह कहके मुइ तोहराके लिखलहिँ, जुने यपनहिँके मुइ विस्वासि हखहि कहके धुचुड करलाहर, लोभ करलाहर, मुरति पुजा करलाहर, निना करलाहर, मोदहरिया हसे ठगहर हसइ। यसनुक मन्सेसभसाङे त सङहि बइठके फेनि झिन खइह। 12 केहकेकि मन्डलियाक बाहराक मन्सावानिके न्याय करेके मोर काम हइने हखइ। कथि तोहरा मन्डलियामा वसनुक काम करलहरानिक न्याय करे नाहिँ परतइ त? 13 परमेस्वर बाहराक मन्सावानिके न्याय करबसि। धरमसास्तरवामा यसके लिखाइल बडइ, “तोहरा यापन बिचासे दुस्ट मन्सेके निकडा दिह।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.