१ कोरिन्थि 4 - चितवनिया थारुख्रिस्टक सेवकसभ 1 उहेसे तोहरा हमराके ख्रिस्टक सेवक हसे परमेस्वरक रहस्यक बात सिखावेके जिम्मा पावल मन्से सम्झे परतइ। 2 जिम्मा पावल मन्सेसभ विस्वासयोग्य हखे परसइ। 3 बाकि तोहरा कि कुनहुँ अदालतसे मोर इन्साफ हखले, मोर तहिँया खाँ झिनिक बात हखइ। मुइ फेनि यापन इन्साफ यपनहिँ हइने करसहिँ। 4 मोर यापन दोस मोर हइने थाह बडइ, बाकि मुइ निरदोस बडहिँ कहके इअ परमानित नाहिँ करबिय। मोर न्याय करलाहर त प्रभुजि बडसि। 5 उहेसे प्रभुजि नाहिँ यवइलइ ककरो न्याय झिन करिह। याबे यन्हारिमा लोकाइल चिजुके हुने इजोरमा यनबसि हसे मन्सावाक हृदयक विचारसभ परकट करदेबसि। तब जम्मे जन परमेस्वरसे पावे परना यापन प्रसंसा पउतइ। 6 प्रियसभ, मुइ यापन हसे अपोल्लोसक उदाहरन देके तोहार तहिँया इअ जम्मे बतवा लिखइ बडहिँ, ताकि “लिखलि वचनवासे बाहरा झिन जइह” कहके धरमसास्तरवामा लिखइलि वचन यनुसार जिएके हमारसे सिखह। तोहरा एक जनक पछक लेके दोसरे जनक विरोध करके घमन्डि झिन हखिय। 7 केहकेकि कुने तोहराके याको जनसे महान बनोसइ? कथि तोहारसाङे जथि बडइ उअ परमेस्वर हइने देले हखसि त? यगर तोहरा उअ पउले बडह जउँ, केहके तोहरा हइने पउले नहिँया घमन्ड करसह? 8 चाहि लगना जम्मे चिजु तोहरा पासकले बडह। तोहरा त धनि भेसकल बडह। तोहरा राजा बनल बडह। वसके भेले हमरा कुने हखहुँ त? तोहरा सदियो राज करले रहतह त, हमरा फेनि तोहारसाङे राज करतहुँ! 9 केहकेकि मोर यसनुक लगसइ कि, परमेस्वर हमरा प्रेरितवानिके विजय-जुलुसमा बुललाहर लडाइमा हरके मृत्यु दन्ड पउलहरानि नहिँया सबसे पाछा रखले बडसि। हमरा संसारमा, स्वरगदुतसभ हसे मन्सावानिक यागा तमासा भेल बडहुँ। 10 हमरा ख्रिस्टक सेवक भेलेसे मन्सावाह हमराके मुरुख सम्झसइ, बाकि तोहरा त ख्रिस्टमा बुद्धियार बडह। हमरा कमजोर बडहुँ, बाकि तोहरा बरियार बडह। मन्सावाह तोहराके यादर करसइ, बाकि हमराके यादर हइने करसइ। 11 यखनिलइ हमरा भुखाइल हसे पियासल बडहुँ, फाटल-चिटल लुगा पेहरले बडहुँ, हमरा पिटाइ खइले बडहुँ हसे हमार घर हइने बडइ। 12 हमरा यपने हथवासे काम करके मेहनत करसहुँ। हमरा यपमानित हखइकि यासिरवाद देसहुँ हसे सतोइकि हमरा सहसहुँ। 13 हमार बदनाम हखइकि मयारसे जवाफ देसहुँ। यखनिलइ हमरा संसारक घुर हसे फुहर फकना थहुरा नहिँया भेल बडहुँ। 14 तोहराके लजियामा पारेके हइने, बाकि मोर यपने सोगावल छोकनि नहिँया तोहराके चेतवनि देवेके तहिँया इअ बतवा मुइ लिखइ बडहिँ। 15 येसु ख्रिस्टक बारेमा सिखावेके तोहार दस हजार सिछकसभ भेले फेनि तोहार बहुत बाबा त हइने बडइ। बाकि सुसमाचार सुनाके येसु ख्रिस्टमा मुइ तोहार बाबा भेल बडहिँ। 16 उहेसे मोर देखासिखि करिह कहके मुइ तोहराके बिन्ति करइ बडहिँ। 17 उहेसे मुइ तोहार लघिना तिमोथिके पठोले बडहिँ। उअ प्रभुमा मोर सोगावल हसे विस्वासयोग्य बेटा हखिय। मुइ जम्मे ठउरियामा हसे हरेक मन्डलिमा सिखोलि नहिँया ख्रिस्टमा मोर जिन्गि कस्नुक रहलइ कहके उअ तोहराके कहबिय। 18 मुइ तोहार लघिना नाहिँ यबहिँ सोचके तोहरा कतेक जन घमन्डि भेल बडह। 19 यगर प्रभुक इछा हतइ जउँ, मुइ तोहार लघिना हलहालि यबहिँ हसे उअ घमन्डि मन्सावानिक बतवा मतरे हइने, बाकि हुनुकर सक्ति चाहिँ कथि हखइ उअ पाता लगोबहिँ। 20 केहकेकि परमेस्वरक राज बातमा हइने, बाकि सक्तिमा देखार हसइ। 21 तोहरा कथि चाहसह? मुइ तोहार लघिना अनुसासनक छडि लेले याउ कि, प्रेम हसे नम्र आत्मासे याउ? |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.