१ कोरिन्थि 3 - चितवनिया थारुपरमेस्वरक सेवकसभ 1 प्रियसभ, तोहारसाङे फदकइकि पवितर-आत्मा पवलि मन्सावानिसाङे फदकइ नहिँया मुइ फदके हइने सकलहि, बाकि मुइ त तोहारसाङे संसारिक स्वभाव यनुसार चललाहर मन्सेसभसाङे नहिँया फदकलहिँ कि ख्रिस्टमा भरखे विस्वास करल झिनिक छोकनिसभसाङे फदकइ नहिँया फदकलहिँ। 2 मुइ तोहराके दुध पियोलहिँ, यन्न त हइने खियोलहिँ, केहकेकि तोहरा वकर तहिँया तयार हइने रहलह हसे यखना फेनि तयार हइने बडह। 3 केहकेकि तोहरा यखना फेनि पापि स्वभावक मन्से नहिँया जिवन बितोसह। यगर तोहार बिचा डाह हसे झगडा बडइ जउँ, कथि तोहरा पापि स्वभावक मन्से हइने हखह त हसे तोहरा यखनि फेनि पापि स्वभावक मन्से नहिँया व्यबहार हइने करसह त? 4 केहकेकि एक जन “मुइ पावलक” हसे दोसरि जन “मुइ अपोल्लोसक” कहके कहसह जउँ, तोहरा संसारिक मन्से नहिँया हइने भेलह त? 5 अपोल्लोस कुने हखिय? पावल कुने हखिय? हमरा त परमेस्वरक खटावल सेवकसभ मतरे हखहुँ, जाकरसे तोहरा विस्वास करलह। प्रभुक खटोलि कमवा मतरे हमरा करले बडहुँ। 6 मुइ रोपलहिँ, अपोल्लोस पानि बरोलिय, बाकि परमेस्वर बढोलसि। 7 उहेसे रोपलहरा कि पानि बरोलहरा किहो फेनि हइने हखइ, बाकि परमेस्वर मतरे बडसि, जुने वकरेके बढोससि। 8 रोपलहरा हसे पानि बरोलहरा बराबर हखइ तके हरेक जन यापन-यापन मेहनत यनुसारक बनिहारि पउबह। 9 केहकेकि हमरा परमेस्वरक काम करलाहर हखहुँ हसे तोहरा परमेस्वरक खेत तके घर हखह। 10 परमेस्वरक देल अनुग्रहसे, मुइ घर बनावे जनलाहर सलारि मिस्तिरि नहिँया जग बेठोलहिँ हसे दोसरि जन वकर वपरा घर बनोइ बडइ। वकर वपरा बनोते गेलहरवा हरेक जन कस्के बनोइ बडहिँ कहके ध्यान देवे परतइ। 11 केहकेकि परमेस्वरक बेठावल जग जुने येसु ख्रिस्ट हखसि, उअ जग बाहेक याको कुनहुँ फेनि दोसर जग बेठावे नाहिँ सकतइ। 12 कुनहुँ मन्से इअ जगवा वपरा सोन, चाँनि, बहुत मोल परना पत्थरा, काठ, खर कि पोरासे घर बनावे सकतइ, 13 बाकि हरेक जनक काम परमेस्वर न्यायक दिनवामा परकट करदेबसि हसे कुने कसनुक काम करले बडिय कहके यगिया जचबिय। 14 यगर कुनहुँ मन्सावाक उअ जगवा वपरा करलि कमवा रहतइ जउँ, उअ इनाम पउबिय। 15 यगर कुनहुँ मन्सावाक कमवा जरके नास हतइ जउँ, उअ मन्सावा यापन इनाम गुमोबिय। उअ मन्सावा त यपनहिँ बचबिय, बाकि यागिसे जरते-जरते नहिँया बचबिय। 16 तोहरा परमेस्वरक मन्दिर हखह हसे परमेस्वरक आत्मा तोहारमा बास करससि कहके कथि तोहार थाह हइने बडइ? 17 यगर कुनहुँ परमेस्वरक मन्दिरके नास करतइ जउँ, परमेस्वर वकरेके फेनि नास करबसि। केहकेकि परमेस्वरक मन्दिर पवितर हसइ हसे उअ मन्दिर तोहराहिँ हखह। 18 कुनहुँ यपनहिँके धोखा झिन दिय। यगर कुनहुँ इअ संसारक हिसाबसे यपनहिँके बुद्धियार सम्झसिय जउँ, उअ यसल रुपमा बुद्धियार हखेके तहिँया यपनहिँके मुरुख बनोइ। 19 केहकेकि मन्सेक बुद्धि परमेस्वरक यागा मुरुख हखइ। जसने धरमसास्तरवामा लिखाइल बडइ, “हुने बुद्धियारि मन्सावानिके हुनुकर चतुराइमा पकडबसि।” 20 फेरि दोसरे ठउरियामा यसके लिखाइल बडइ, “बुद्धियारि मन्सावानिक विचार काम हइने लगना कहके परमप्रभु जनससि।” 21 उहेसे कुनहुँ फेनि मन्सेक वपरा घमन्ड झिन करइ। केहकेकि जम्मे चिजु तोहरे हखइ, 22 चाहे पावल हखइ कि अपोल्लोस हखइ कि पतरुस हखइ, चाहे संसार हखइ कि जिवन हखइ कि मृत्यु हखइ, चाहे यखनिक समय हखइ कि भविस्य हखइ उअ जम्मे तोहरे हखइ, 23 तोहरा ख्रिस्टक हखह तके ख्रिस्ट परमेस्वरक हखसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.