१ कोरिन्थि 2 - चितवनिया थारुक्रुसमा भोग भेल ख्रिस्ट 1 प्रियसभ, मुइ तोहार लघिना परमेस्वरक बारेमा गवाहि देवे यवइकि, मुइ जबड-जबड बातसभ करके मन्सेक बुद्धिक धाक हइने देखोलहिँ। 2 केहकेकि तोहारसाङे रहइकि येसु ख्रिस्ट हसे हुनेक क्रुसवामा टङलि बतवा बाहेक याको किहो बात नाहिँ फदकेके मुइ निरनय करले रहलहिँ। 3 मुइ सुरुमा तोहार लघिना यवइकि कमजोर, डर हसे खाँ दुलदुलइते यलहिँ। 4 मुइ सिछा देइकि हसे परचार करइकि घत लगना बुद्धिक जबड-जबड बातसभ हइने करलहिँ, बाकि पवितर-आत्माक सक्तिक परमान देके मुइ परचार करलहिँ, 5 ताकि तोहार विस्वास मन्सावानिक बुद्धिमा हइने, बाकि परमेस्वरक सक्तिमा भर परइ। पवितर-आत्माक बुद्धि 6 ताफेनि परिपाका भेलि विस्वासिसभक बिचा हमरा बुद्धिक बात करसहुँ, बाकि इअ जुगवाक बुद्धि कि इअ जुगवाक सासकसभक बुद्धि हइने, जुन बितके जेतइ। 7 बरु हमरा रहस्यमा लोकाइल परमेस्वरक बुद्धिसे बनावल योजनाक बात करसहुँ। इअ योजना त हमरा यादर पाओ कहके सिरिस्टि करलिसे पहिला हुने तोकले रहलसि। 8 इअ जुगवाक कुनहुँ फेनि सासक परमेस्वरक योजनाके बुझे हइने सकलइ। यगर हुनुका बुझले रहतिय त, यादर पावेके योग्यक प्रभुके क्रुसमा नाहिँ टङतिय। 9 बाकि धरमसास्तरवामा यसके लिखाइल बडइ, “मन्सावानिक कबहुँ हइने देखल हसे कबहुँ हइने सुनल तके मनवामा कबहुँ हइने सोचल बातसभ, परमेस्वर हुनेके प्रेम करलहरानिक तहिँया तयार पारले बडसि।” 10 बाकि परमेस्वर हमार तहिँया पवितर-आत्मासे उअ बतवा परकट करले बडसि। केहकेकि पवितर-आत्मा जम्मे चिजु खोजससि, यहवाँलइ कि, परमेस्वरक गहिरसे गहिर बातसभ फेनि खोजससि। 11 केहकेकि मन्सावाक भितरा भेलि वकर यपने आत्मा बाहेक मन्सावाक विचार कुने बुझसइ? वसने करके परमेस्वरक विचार हुनेक आत्मा बाहेक याको कुनहुँ फेनि बुझे नाहिँ सकतइ। 12 हमरा संसारक आत्मा हइने पउले बडहुँ, बाकि परमेस्वरक आत्मा पउले बडहुँ, ताकि हुने हमराके जथि खुसिसे देले बडसि उअ बुझे सकुँ। 13 जुन बतवा हमरा फदकसहुँ, उअ बतवा मन्सावानिक बुद्धिसे सिखावल बातसभ हइने, बरु पवितर-आत्माक सिखोलि बतवा फदकसहुँ हसे पवितर-आत्मा पवलि मन्सावानिके आत्मिक सत्य बातसभक यरथ खोल देसहुँ। 14 जुन मन्सावामा परमेस्वरक आत्मा हइने बडइ, उअ परमेस्वरक आत्मासे जथि याइल बडइ उअ गरहन नाहिँ करबिय। केहकेकि यसनुक बातसभ वकर तहिँया मुरुख बात हसइ। इअ बतवा परमेस्वरक आत्मासे मतरे बुझे सकेसइ। 15 जुन मन्सावामा परमेस्वरक आत्मा बडइ, उअ जम्मे चिजु ठिकसे जाँच करसिय, बाकि वकरेके कुनहुँ फेनि जाँचे नाहिँ सकतइ। 16 जसने धरमसास्तरवामा लिखाइल बडइ, “कुने प्रभुक मनवाके जनले बडइ? हुनेके कुने सिखावे सकतइ?” बाकि हमारसाङे त ख्रिस्टक मनक सोच-विचार बडइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.