१ कोरिन्थि 16 - चितवनिया थारुपरमेस्वरक जनक तहिँया भेटि 1 याबे परमेस्वरक जनसभक तहिँया भेटि जामा करेके बारेमा मुइ गलातियाक मन्डलियानिके जथि कहले बडहिँ तोहरा फेनि वसने करिह। 2 हरेक हप्ताक पहिला दिन तोहरा जम्मे जन यापन-यापन कमाइ यनुसार किहो छुटियाके जामा करइरहिह, ताकि मुइ तोहार लघिना यवइकि भेटि जामा करे झिनपरइ। 3 मुइ यइलेपर, तोहार उठोलि भेटिया यरुसलेममा लिगेके तहिँया तोहार योग्य ठानलि मन्सावाके मुइ सिफारिस करके पठोबहि। 4 यगर मुइ फेनि जायके तोहार ठिक लगतइ जउँ, हुनुका मोरसाङे जाए सकतइ। व्यक्तिगत बिन्ति 5 मुइ माकेडोनिया छेतरक यातरा पुरा करलेपर तोहराके भेटघाट करे यबहिँ, केहकेकि मुइ माकेडोनिया भके जाइ बडहिँ। 6 सकभर मुइ तोहार लघिना किहो दिन रहबहिँ कि, हखे सकतइ जम्मे जाडक समय बितावे सकबहि। वकरपाछा मुइ जहवाँ गेले फेनि तोहरा मोर यातराक बन्दबस्त करे सकबह। 7 मुइ तोहारसाङे एघरिक भेटघाट करे हइने चाहइ बडहिँ। यगर प्रभुक इछा हतइ जउँ, किहो समय तोहारसाङे बितावेके यासा करले बडहिँ। 8 बाकि मुइ पेन्तिकोसक पबनिक दिनलइ एफिसस सहरवामा रहबहिँ। 9 मोर विरोध करलाहर बहुत जन वहवाँ भेले फेनि प्रभुक महान काम करेके तहिँया डउल मउका मिलल बडइ। 10 तिमोथि तोहार लघिना यइलेपर, वकरेके कुनहुँ खलिक गारह हखे झिन दिह, केहकेकि उअ फेनि मोर नहिँया प्रभुक काम करइ बडिय। 11 उहेसे कुनहुँ फेनि वकरेके हेला झिन करइ, बाकि सान्तिसे वकरेके बिदा करिह, ताकि उअ मोर लघिना यइय, केहकेकि मुइ याको विस्वासि भयवानिसाङे वकरेके इसियाइ बडहिँ। 12 मुइ भाइ अपोल्लोसके याको भयवानिसाङे तोहार लघिना जाहि कहके बिन्ति करलहिँ, बाकि यखनि तोहार लघिना यावेके वकर इछा हइने बडइ। जब उअ मउका पउबिय, तखनहिँ उअ तोहार लघिना यबिय। 13 चेतले रहके विस्वासमा डटके रहिह। सहासि भके बरियार हखिह। 14 जम्मे काम प्रेमसे करिह। 15 स्तिफनस हसे वकर घर-परिवार अखइया छेतरमा सबसे पहिला विस्वास करलाहर मन्सेसभ हखइ हसे हुनुका परमेस्वरक जनसभक सेवा करेके तहिँया यपनहिँके समरपन करले बडइ कहके तोहार थाह बडइ। उहेसे, भयवाह, मुइ तोहराके बिन्ति करके इअ कहइ बडहिँ कि, 16 तोहरा यसनुक मन्सेसभक हसे हुनुकरसाङे सेवा तके मेहनत करलहरा मन्सावानिक अदलमा रहिह। 17 स्तिफनस, फोरटुनाटस हसे अखाइकस यहवाँ यइलेसे मुइ खाँ खुसि भेलहिँ, केहकेकि तोहरा यहवाँ हइने भेलेसे जथि कमि रहलइ उअ हुनुका पुरा करदेलइ। 18 हुनुका मोर हसे तोहार मनवाके फेनि उत्साहित बनोले बडइ। उहेसे यसनुक मन्सेके तोहरा यादर करे परतइ। अन्तिम अभिवादन 19 एसिया छेतरमा भेलि मन्डलियाह तोहराके अभिवादन पठोले बडइ। अकिलास हसे प्रिस्का तके हुनुकर घरवामा भेलि जम्मे विस्वासियवाह प्रभुमा तोहराके हारदिक अभिवादन पठोले बडइ। 20 यहवाँक जम्मे भयवाह तोहराके अभिवादन पठोले बडइ। तोहरा फेनि एक-दोसरि जनके पवितर प्रेमसे अभिवादन करिह। 21 मुइ पावल इअ अभिवादन यपने हथवासे लिखइ बडहिँ। 22 यगर कुनहुँ प्रभुके प्रेम नाहिँ करतइ जउँ, उअ सरापित हखइ। हे हमार प्रभुजि, यवहुँ! 23 प्रभु येसु ख्रिस्टक अनुग्रह तोहारसाङे रहइ। 24 ख्रिस्ट येसुमा मोर प्रेम तोहार जम्मे जनसाङे रहइ। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.