१ कोरिन्थि 15 - चितवनिया थारुख्रिस्ट मरलिसे जिउतलसि 1 प्रियसभ, याबे मुइ तोहार लघिना जुन सुसमाचार परचार करलहिँ हसे जुन सुसमाचार तोहरा गरहन करलह तके उहे विस्वासमा तोहरा डटके बडह, वकर बारेमा याबे मुइ तोहराके याद करावे चाहबहिँ। 2 यगर तोहरा वकरमा डटके रहबह जउँ, मोर परचार करलि सुसमाचारसे तोहरा उद्धार पवइ बडह, नत तोहार करलि विस्वास व्यरथ बडइ। 3 मुइ जथि पउलहिँ उहे सबसे मुख्य बिसयक रुपमा तोहराके देलहिँ। उअ इअ हखइ कि, धरमसास्तर यनुसार ख्रिस्ट हमार पापक तहिँया मरलसि, 4 हुने गडेलसि हसे धरमसास्तर यनुसार तिसरि दिनवामा परमेस्वर हुनेके जिउतोले बडसि। 5 हुने केफास हसे वकरपाछा बारह जन प्रेरितवानिक लघिना देखा परलसि। 6 वकरपाछा हुने पाँच सयसे बढि विस्वासिसभक लघिना एके चोटि देखा परलसि। हुनुकरमधे कतेक जन मरसकले, ताफेनि बहुत जन यखना फेनि जिउते बडइ। 7 वकरपाछा हुने याकुब हसे जम्मे प्रेरितवानिक लघिना देखा परलसि। 8 सबसे पाछा प्रभु मोर लघिना फेनि देखा परलसि, मानोकि मुइ जरमेके जुन हइने पुगल एगुडा छोकनि हखहि। 9 प्रेरितसभमधे मुइ यपनहिँके सबसे निच सम्झसहिँ हसे मुइ प्रेरित कहेके लाइक फेनि हइने बडहिँ, केहकेकि मुइ परमेस्वरक मन्डलियाके सतोलहिँ। 10 बाकि मुइ जथि बडहिँ, परमेस्वरक अनुग्रहसे बडहिँ। हुने मोरके करलि अनुग्रह व्यरथमा हइने भेलइ। मुइ याको प्रेरितवानिसे बढि मेहनत करलहिँ, ताफेनि मुइ हइने, मोरसाङे भेलि परमेस्वरक अनुग्रह काम करले हखिय। 11 उहेसे चाहे मुइ हखहि कि चाहे याको प्रेरितसभ हखइ, हमरा जथि परचार करसहुँ, तोहरा उहे विस्वास करलह। परमेस्वर मरलि मन्सावानिके जिउतोलसि 12 हमरा परमेस्वर ख्रिस्टके जिउतोलसि कहके परचार करसहुँ हसे तोहार बिचा कतेक मन्सेसभ मन्से मरलिसे हइने जिउतसइ कहके कहतइ जउँ कस्के बात मिललइ? 13 यगर मरलि मन्सावानिक पुनरुत्थान नाहिँ हतइ जउँ, वसके भेले त ख्रिस्ट फेनि मरलिसे हइने जिउताइल बडसि। 14 यगर ख्रिस्ट मरलिसे हइने जिउताइल हखसि जउँ, हमार करलि परचार फेनि व्यरथ बडइ हसे तोहार विस्वास फेनि व्यरथ बडइ। 15 यतुरा मतरे हइने, हमरा परमेस्वरक बारेमा झुठा बात फदकलहर नहिँया भेलहुँ, केहकेकि परमेस्वर ख्रिस्टके जिउतोलसि कहके हमरा साछि देले बडहुँ। बाकि यगर मरलि मन्सावाह नाहिँ जियतिय जउँ, परमेस्वर फेनि ख्रिस्टके हइने जिउतोले बडसि। 16 यगर मरलि मन्सावाह नाहिँ जियतिय जउँ, ख्रिस्ट फेनि मरलिसे हइने जिउतेलसि। 17 यगर ख्रिस्ट मरलिसे हइने जिउतल बडसि जउँ, तोहार विस्वास फेनि व्यरथ बडइ हसे तोहरा यखनिलइ यापन पापमा बडह। 18 वसके भेले त ख्रिस्टमा विस्वास करके मरलि मन्सावाह फेनि त नास भेल बडइ। 19 यगर हमरा इअ जिवनक तहिँया मतरे ख्रिस्टमा यासा करले बडहुँ जउँ, हमार दासा जम्मे मन्सावानिसे फेनि खाँ खराब बडइ। 20 बाकि वास्तवमा, ख्रिस्ट मरलहरानि तहिँया सबसे पहिला जिउतइलेसे याको मरलिसभ फेनि जिउतोबसि कहके हुनेहिँ परमान हखसि। 21 केहकेकि जसने एक जन मन्सेक कारनसे जम्मे जन मरे परलइ, वसने एक जन मन्सेक कारनसे मरलि मन्सावाके फेनि परमेस्वर जिउतोबसि। 22 केहकेकि आदमक वंसमा भेलि जम्मे मन्सावाह मरसइ, वसने ख्रिस्टमा विस्वास करलहरा जम्मे मन्सावाह बचतइ। 23 बाकि हरेक जन यापन-यापन पलहामा जिउततइ। सबसे पहिला ख्रिस्ट हसे ख्रिस्ट यइलेपर हुनेमा विस्वास करलहरा जिउततइ। 24 वकरपाछा संसारक याखिर जुन यतइ, तखनहिँ हुने जम्मे सासन, जम्मे अधिकार हसे सक्तिके नास करके यापन राज परमेस्वर पिताके सपदेबसि। 25 केहकेकि ख्रिस्ट यापन जम्मे सतरुवानिके हराके यापन टङवातर नाहिँ पारइलइ हुने राज करे परतइ। 26 सबसे पाछा नास हखलाहर सतरु मृत्यु हखिय। 27 केहकेकि धरमसास्तरवामा यसके लिखाइल बडइ, “परमेस्वर जम्मे चिजुवा ख्रिस्टक टङवातर पारदेले बडसि।” बाकि इअ स्पस्ट बडइ कि “जम्मे चिजु” कहले परमेस्वर यपनहिँ वकर अदलमा हइने बडसि, केहकेकि हुनेहिँ जम्मे चिजु ख्रिस्टक अदलमा पारदेले बडसि। 28 जब जम्मे चिजु ख्रिस्टक अदलमा रखेतइ, तब जुन परमेस्वर जम्मे चिजु यापन पुतरक अदलमा रखबसि, हुनेक पुतर ख्रिस्ट यपनहिँ फेनि हुनेक अदलमा रहबसि। यसने परमेस्वर जम्मे चिजुवाक सरबेसरबा हखबसि। 29 यगर मरलि मन्सावाह नाहिँ जिउतेतइ जउँ, मरलि मन्सावानिक सम्झनामा बप्तिस्मा लेलहरवा मन्सावानिक कथि हतइ त? यगर मरलि मन्सावाह नाहिँ जिउततइ जउँ, मन्सावाह हुनुकर तहिँया केहके बप्तिस्मा लेतइ त? 30 हमरा केहके यापन जिवनके घर-घराहे खतरामा पारेके? 31 प्रियसभ, तोहार हसे प्रभु येसु ख्रिस्टमा भेलि गरवसे मुइ इअ कहे सकबहि कि, मुइ दिन-दिन मरेके तयार बडहिँ। 32 मन्सेक हिसाबसे कहइकि, एफिसस सहरवामा मुइ जनावरसभ नहिँया मन्सेसभसाङे लडाइ करके मोर कथि फाइदा भेलइ त? यगर मरलि मन्सावाह नाहिँ जिउतेतइ जउँ, “यउह, हमरा खाउ हसे पिउ, केहकेकि यनदिने त हमरा मरबे करबहुँ।” 33 यसनुक चिजुसभक धोखामा झिन परिह, केहकेकि “खराब सङतसे यसल चरितरके बिगडा देसइ।” 34 होसमा यउह हसे पाप झिन करिह, केहकेकि तोहरा कतेक जन त परमेस्वरके चिनले हइने बडह। तोहराके लजियामा पारेके तहिँया मुइ इअ कहइ बडहिँ। जिउते भेल देहि 35 बाकि कुनहुँ यसके पुछे सकतइ, “मरलि मन्सावानिके परमेस्वर कस्के जिउतोबसि? हुनुका कसनुक देहि लेके यतइ?” 36 कसनुक मुरुख बात पुछइ बडह! तोहरा जथि छिटसह, उअ सरियाके मतरे जमसइ। 37 तोहरा गोहुँ कि याको कुनहुँ यन्न छिटइकि बिया मतरे छिटसह, बाढल जइसा त हइने रोपसह। 38 बाकि परमेस्वर यापन इछा यनुसार उअ बियवाके रुप देबसि। हरेक खलिक बियाके यलग-यलग खलिक डाठ बनोबसि। 39 जम्मे प्रनिसभक देहि एके खलिक हइने रहसइ। मन्सेक देहि एक खलिक, जनवरवानिक देहि दोसरे खलिक, चेरयानिक हसे मछरियानिक देहि दोसरे खलिक रहसइ। 40 यकसवामा भेलि बेरियावा, जोन्हवा हसे तरगनसभक यापन सुन्दर रुप बडइ तके धरतियामा भेलि मन्सावानि, पसुसभ, चेरयानिक यापन सुन्दर रुप बडइ, बाकि यकसवा हसे धरतियामा भेलि जम्मेक यापन रुप हसइ। 41 बेरियवाक चहकार एक खलिक, जोन्हवाक चहकार दोसरे खलिक हसे तरगनसभक चहकार दोसरे खलिक रहसइ, केहकेकि एगुडा तरगनक चहकार दोसरि तरगनवाक चहकारिसे फरक हसइ। 42 मरलि मन्सावाक पुनरुत्थान फेनि यसने हतइ। देहिया गडाइकि नास हसइ, बाकि जिइ उठइकि, उअ नास नाहिँ हतइ। 43 देहिया अनादर अवस्थामा गडेतइ, बाकि यादर अवस्थामा उअ जियबिय। इअ कमजोरमा गडेतइ, बाकि सक्तिमा जियबिय। 44 संसारमा भेल देहि गडेतइ, बाकि जिउते हखइकि स्वरगिय देहि भके जिउते हतइ। संसारमा हमार देहि भेल नहिँया स्वरगिय देहि फेनि हतइ। 45 जसने धरमसास्तरवामा लिखाइल बडइ, “पहिला मन्से आदम जिउते प्रानि भेलिय।” बाकि अन्तिम आदम जिवन देलाहर आत्मा भेलिय। 46 पहिला स्वरगिय देहि हइने यलिय, बाकि संसारमा भेल देहि यलिय हसे वकरपाछा स्वरगिय देहि यलिय। 47 पहिला मन्सावा आदम धरतियाक मटियासे बनलिय, बाकि दोसरो मन्सावा ख्रिस्ट स्वरगसे यलसि। 48 धरतियाक मन्सावाह माटिसे बनल पहिला मन्से नहिँया हसइ हसे स्वरगक मन्सेसभ स्वरगसे याइल मन्से नहिँया हसइ। 49 जसने हमरा माटिक मन्सेक रुप धारन करले बडहुँ, वसने हमरा एक दिन स्वरगक मन्सेक रुप धारन करबहुँ। 50 प्रियसभ, मुइ तोहराके इअ कहबहिँ, संसारमा भेल देहि परमेस्वरक राज अधिकार करे नाहिँ सकतइ। नास हखना हमार देहि कबहुँ हइने नास हखना देहिक अधिकार करे नाहिँ सकतइ। 51 सुनह! मुइ एगुडा रहस्यक बात कहबहिँ, हमरा जम्मे जन नाहिँ मरबहुँ, बाकि जम्मे जनक रुप बदलेतइ। 52 इअ याखिर जुनवामा धुतुहाक यवाज बजतेकि, एकिघर, यखियाक झिमकाइमा हतइ, केहकेकि तखनहिँ धुतुहाक यवाज सुनेतइ हसे मरलि जम्मे मन्सावाह कबहुँ नाहिँ मरना करके जिउते भके उठतइ तके हमरा जम्मे जन बदलेबहुँ। 53 केहकेकि हमार नास हखना देहि नास हइने हखना देहिक रुपमा बदलेतइ हसे मरके जइना देहि कबहुँ हइने मरना देहिक रुपमा बदलेतइ। 54 जब नास हखना देहि नास हइने हखना देहिमा हसे मरके जइना देहि कबहुँ हइने मरना देहिक रुपमा बदलेतइ, तब “मृत्यु, हरलिय तके जित पुरा भेलइ” कहके धरमसास्तरवामा लिखइलि इअ वचनवा पुरा हतइ। 55 “अरे मृत्यु, तोर जित कहवाँ बडइ? अरे मृत्यु तोर खिलवा कहवाँ?” 56 मृत्युक खिल पाप हखइ हसे पापक सक्ति व्यवस्थासे महसुस हसइ। 57 बाकि परमेस्वरक धन्यवाद हखइ, केहकेकि हुने हमार प्रभु येसु ख्रिस्टसे हमराके विजय देससि। 58 उहेसे मोर प्रिय भयवाह, विस्वासमा बरियार हसे यटल रहिह। प्रभुक काममा सबदिन बढते जइह, केहकेकि तोहरा जनसह कि, प्रभुक तहिँया तोहार करलि मेहनत व्यरथमा नाहिँ जेतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.