१ कोरिन्थि 14 - चितवनिया थारुअगमवाडि हसे हइने बुझ्ना अन्यभासाक वरदान 1 प्रेम करना बातमा लागल रहिह हसे आत्मिक वरदानसभ पावेके खाँ इछा करे परतइ, विसेस करके अगमवाडिक वरदान पावेके इछा करिह। 2 केहकेकि जुने हइने बुझ्ना अन्य भासा फदकसिय, उअ मन्सावानिसाङे हइने फदकसिय, बाकि परमेस्वरसाङे फदकसिय। उअ कथि फदकइ बडिय कहके कुनहुँ फेनि हइने बुझसइ। उअ परमेस्वरक आत्मासे रहस्यक बातसभ फदकसिय। 3 बाकि जुने अगमवाडि फदकसिय, उअ दोसरे जनके आत्मिकि रुपमा बरियार बनोसिय हसे उत्साह तके सान्ति देसिय। 4 जुने हइने बुझ्ना अन्य भासा फदकसिय, उअ यपनेके आत्मिकि भलाइ करोसिय, बाकि जुने अगमवाडि फदकसिय, उअ मन्डलियाक विस्वासिसभक आत्मिकि रुपमा बरियार बनोसिय। 5 तोहरा जम्मे जन हइने बुझ्ना अन्य भासा फदकह कहके मुइ चाहसहिँ, बाकि वकरसे याको बढता तोहरा अगमवाडि फदकह कहके मुइ चाहसहिँ। हइने बुझ्ना अन्य भासामा फदकलेसे फेनि अगमवाडि फदकेके जबड बात हखइ, केहकेकि हइने बुझ्ना अन्य भासामा फदकलि बातक यरथ खोल देलाहर मन्से बडइ जउँ, मतरे इअ मन्डलियाक विस्वासिसभके आत्मिकि रुपमा बरियार बनोसिय। 6 उहेसे प्रियसभ, मुइ तोहार बिचा हखइकि हइने बुझ्ना अन्य भासा फदकबहिँ जउँ, तोहार कथि फाइदा भेलइ त? परमेस्वरक जनावल बात कि ग्यान कि अगमवाडि कि सिछा नाहिँ देबहिँ जउँ, तोहार कथि फाइदा पुगोबिय। 7 बाँसि कि विडा जसने प्रान हइने भेल बाजासभक धुन एगुडे निस्कतइ जउँ, कथि बजइ बडइ कहके कुने कहे सकबिय त? 8 यगर धुतुहासे स्पस्ट यवाज नाहिँ यतइ जउँ, कुने लडाइक तहिँया तयार हतइ? 9 वसने करके तोहार फदकलि भसवा मन्सावाह नाहिँ बुझतइ जउँ, तोहरा कथि फदकइ बडह कहके हुनुका कस्के बुझतइ त? तोहरा त हावामा फदकइ नहिँया हतइ। 10 संसारमा बहुत खलिक भासासभ बडइ। उअ कुनहुँ फेनि यरथहिन हइने बडइ। 11 यगर मुइ ककरो फदकलि भसवा नाहिँ बुझबहिँ जउँ, वकर तहिँया मुइ विदेसि नहिँया भेलहिँ हसे उअ फदकेलहरा मोर तहिँया विदेसि नहिँया हखबिय। 12 यसनेकरके तोहरा आत्मिकि वरदानसभक तहिँया खाँ इछा करलेसे, उअ वरदानसभ याको बहुत चलोइह, जुन मन्डलियाक विस्वासिसभके आत्मिकि रुपमा बरियार बनोसिय। 13 उहेसे जुने हइने बुझ्ना अन्य भासा फदकसिय, वकर यरथ खोलना वरदानक तहिँया उअ परथाना करिय। 14 यगर मुइ हइने बुझ्ना अन्य भासामा परथाना करबहिँ जउँ, मोर आत्मा परथाना करसिय, बाकि मुइ कथि कहइ बडहिँ उअ हइने बुझसहि। 15 याबे मुइ कथि करेके त? मुइ आत्मासे हइने बुझ्ना अन्य भासामा परथाना करबहिँ। मुइ आत्मासे हइने बुझ्ना अन्य भासामा स्तुति-गान करबहिँ हसे मनसे फेनि स्तुति-गान करबहिँ। 16 यगर तोहरा हइने बुझ्ना अन्य भासामा धन्यवाद देइ बडह, तब तोहार बतवा हइने बुझलाहर मन्से तोहार धन्यवादमा सहमति जनोइकि कस्के “आमेन” कहबिय त? केहकेकि तोहार कहलि बतवा उअ हइने बुझसिय। 17 तुइ परमेस्वरके डउलसे धन्यवाद देले फेनि, इअ याको जनके निरमान नाहिँ करबिय। 18 मुइ परमेस्वरके धन्यवाद देसहिँ, केहकेकि मुइ तोहार जम्मे जनसे बहुत हइने बुझ्ना अन्य भासामा फदकसहिँ। 19 बाकि मन्डलियामा मुइ दस हजार सबद हइने बुझ्ना अन्य भासामा फदकलेसे, बरु याको जन मोर बतवा बुझइ कहके पाँच गो सबद फदके चाहसहिँ। 20 प्रियसभ, तोहार सोच-विचार छोकनि नहिँया झिन हखइ। बरु खराबक बिसयमा छोकनि नहिँया किहो फेनि हइने जनलाहर हखह हसे तोहार सोच-विचार पाका मन्से नहिँया हखइ। 21 धरमसास्तरवामा लिखाइल बडइ, “मुइ याको जातिक मन्सावानिक भासामा हसे विदेसिसभक मुहवासे इअ मन्सावानिसाङे फदकबहिँ, ताफेनि हुनुका मोर बतवा नाहिँ सुनतइ” कहके परमप्रभु कहससि। 22 हइने बुझ्ना अन्य भासामा फदकेके कहले विस्वास हइने करलहरानिक तहिँया परमान हइने, बाकि विस्वास हइने करलहरानिक तहिँया हखइ। जबकि अगमवाडि विस्वास हइने करलहरानिक तहिँया हइने, बाकि विस्वास करलहरानिक तहिँया परमान हखइ। 23 जब मन्डलियामा जम्मे जन जामा भके हइने बुझ्ना अन्य भासामा फदकतइ हसे यगर तोहार बतवा हइने बुझलाहर मन्से कि कतेक विस्वास हइने करलहरा वहवाँ यतइ जउँ, कथि हुनुका तोहराके पगलाइल कहके नाहिँ कहतइ त? 24 बाकि तोहरा जम्मे जन अगमवाडि फदकइकि, जब विस्वास हइने करलाहर कि बतवा हइने बुझलाहर मन्से मन्डलियामा यतइ जउँ, तोहार फदकलि बतवासे हुनुका यापन पाप थाह पउतइ हसे यपनहिँके दोसि पउतइ। 25 हुनुकर हृदयक गुप्त बात परकट हतइ हसे हुनुका ओन्हगातके “तोहार बिचा सदियो परमेस्वर बडसि” कहके स्विकार करते परमेस्वरक आराधना करतइ। मन्डलिमा जामा हखेके समयक नियम 26 प्रियसभ, याबे हमरा कथि कहेके त? जब तोहरा जामा हसह, तब तोहरा कुनहुँ भजन गउबह, कुनहुँ परमेस्वरक जनावल बात घोसना करबह, कुनहुँ हइने बुझ्ना अन्य भासा फदकबह हसे कुनहुँ वकर यरथ खोल देबह। इअ जम्मे बतवाह मन्डलियाके आत्मिकि रुपमा बरियार बनोसिय। 27 यगर कुनहुँ हइने बुझ्ना अन्य भासा फदकतइ जउँ, दु जन कि बढिमा तिन जन पलहा-पलहि करके फदकइ हसे एक जन वकर यरथ खोल देवे परतइ। 28 बाकि यरथ खोललाहर कुनहुँ मन्से नाहिँ हतइ जउँ, हइने बुझ्ना अन्य भासामा फदकलहर मन्से मन्डलियामा चुप लागके रहे परतइ हसे उअ यापन मनसे तके परमेस्वरसाङे फदकिय। 29 यसने अगमवाडि फेनि दु कि तिन जन फदकइ हसे याको जन उअ ठिक हखइ कि हइने कहके जचइ। 30 यगर कुनहुँ मन्से अगमवाडि फदकइ बडिय हसे तखनहिँ दोसरे मन्सेके परमेस्वरक जनावल बात हतइ जउँ, जुन मन्सावा पहिला फदकइ रहलिय उअ चुप रहिय। 31 तोहरा जम्मे जन पलहा-पलहि अगमवाडि फदके सकबह, ताकि जम्मे जन सिखतइ हसे उत्साह पउतइ। 32 अगमवाडि फदकेलहरानिक आत्मा अगमवक्तावानिक अदलमा रहसइ। 33 केहकेकि परमेस्वर गोजमोज पारलाहर परमेस्वर हइने हखसि, बाकि सान्तिक परमेस्वर हखसि। जसने परमेस्वरक जनसभक जम्मे मन्डलियासभमा बडइ, 34 जनिनियाह मन्डलियाहमा चुप रहे परतइ। हुनुकाके फदकेके अनुमति हइने बडइ, बाकि व्यवस्थाक कहलि नहिँया हुनुका अदलमा रहे परतइ। 35 यगर हुनुका किहो बातक बारेमा बुझे चाहतइ जउँ, हुनुका घरवामा यापन मरदावाके पुछइ, केहकेकि मन्डलियामा जनिनियाह फदकेके त लाजक बात हखइ। 36 कथि परमेस्वरक वचन तोहारसे सुरु भेल हखइ? कि तोहार लघिना मतरे इअ याइल हखइ? 37 यगर कुनहुँ यपनहिँके अगमवाडि फदकलहर कि पवितर-आत्मासे चलसहिँ कहके सम्झतइ जउँ, उअ मोर लिखलि बतवा प्रभुक आग्या हखइ कहके स्विकार करिय। 38 यगर उअ इअ बतवाक वास्ता नाहिँ करबिय जउँ, वकर बातक फेनि वास्ता नाहिँ करेतइ। 39 उहेसे मोर प्रियसभ, अगमवाडि फदकेके तहिँया खाँ इछा करिह, बाकि हइने बुझ्ना अन्य भासा फदकेके ककरहुँके फेनि झिन रोकिह। 40 बाकि जम्मे काम ठिकसे हसे व्यवस्थित रुपसे करे परतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.