१ कोरिन्थि 13 - चितवनिया थारुसबसे महान प्रेम 1 यगर मुइ मन्सावानिक हसे स्वरगदुतवानिक हइने बुझ्ना अन्य भासामा फदकले ताफेनि मुइ प्रेम नाहिँ करबहिँ जउँ, मुइ हाला करलाहर पितरिक घन्टि कि झाइ-झाइ बजलाहर झालि मतरे हखबहिँ। 2 यगर मोरसाङे अगमवाडि फदकेके वरदान बडइ हसे जम्मे रहस्य तके जम्मे खलिक ग्यान बुझे सकसहिँ हसे मोरसाङे पहाड होटावे सकेके पुरा विस्वास भेले ताफेनि मुइ प्रेम नाहिँ करबहिँ जउँ, मुइ किहो फेनि हइने हखहि। 3 यगर मुइ यापन जम्मे सम्पतिया गरिबवानिके बाँट देबहि हसे यापन देहियाके जरावेके तहिँया देले ताफेनि मुइ प्रेम नाहिँ करबहिँ जउँ, मोर किहो फाइदा नाहिँ हतइ। 4 प्रेम करलाहर मन्से सहसिय हसे दाया करसिय। प्रेम करलाहर मन्से डाह हइने करसिय, यपनहिँके जबड हइने बनोसिय हसे घमन्ड हइने करसिय। 5 प्रेम करलाहर मन्से खराब व्यबहार हइने करसिय कि यापन बारेमा मतरे हइने सोचसिय, प्रेम करलाहर मन्से हलहालि हइने खिसियसिय कि याको जनक करलि खराब कामक हिसाब हइने रखसिय। 6 प्रेम करलाहर मन्से अन्यायमा आनन्द हइने करसिय, बाकि सत्य बातमा आनन्द करसिय। 7 प्रेम करलाहर मन्से जम्मे बातमा धिरज रखसिय, जम्मे बातमा विस्वास करसिय, जम्मे बातमा यासा रखसिय हसे जम्मे बातमा डटके रहसिय। 8 अगमवाडि त हेरेतइ, हइने बुझ्ना अन्यभासाक वरदान यन्त हतइ, कि ग्यान सकेतइ, बाकि प्रेम करना बात कबहुँ फेनि नाहिँ वरेतइ। 9 केहकेकि हमार ग्यान हसे अगमवाडि अधुरा बडइ। 10 बाकि जब जम्मे चिजु पुरा हखेके समय यतइ, तब हमार अधुरा ग्यान हसे हमार फदकलि अधुरा अगमवाडिक यन्त हतइ। 11 जब मुइ छोकनि रहलहिँ, तब छोकनि नहिँया फदकहिँ, छोकनि नहिँया विचार करहि हसे छोकनि नहिँया तरक करहि। बाकि जब मुइ ढोठनिया भेलहिँ, तब छोकनिक चाल छाडदेलहिँ। 12 यखना हमरा यइनावामा धुनरार देखसहुँ, बाकि उअ समयमा हमरा मुहा-मुहिँ देखबहुँ। यखनि मुइ अधुरा बात मतरे जनसहिँ, बाकि उअ समयमा परमेस्वर मोर बारेमा जम्मे बतवा जनले नहिँया, मुइ फेनि जम्मे बतवा जनबहिँ। 13 याबे विस्वास, यासा हसे प्रेम करना बात, इअ तिन गो रहतइ, बाकि उअ मधेसे महान प्रेम करेके हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.