१ कोरिन्थि 12 - चितवनिया थारुआत्मिक वरदानसभ 1 प्रियसभ, पवितर-आत्माक देलि वरदानसभक बारेमा तोहरा अन्जान रहह कहके मोर इछा हइने बडइ। 2 तोहार थाह बडइ कि, प्रभुमा विस्वास करलिसे यागा तोहरा कुनहुँ न कुनहुँ तरिकासे बहकके फदके हइने सकलाहर मुरतिसभक पुजा करह। 3 उहेसे तोहरा इअ बतवा बुझिह कि, परमेस्वरक आत्माक यगुवाइमा चललाहर कुनहुँ फेनि “येसु सरापित हखिय” कहके हइने कहसइ हसे पवितर-आत्माक यगुवाइसे मतरे कुनहुँ फेनि “येसुहिँ प्रभु हखसि” कहके स्विकार करे सकतइ। 4 पवितर-आत्माक वरदानसभ खलिक-खलिक बडइ, बाकि वरदान देलाहर पवितर-आत्मा एक जन मतरे बडसि। 5 सेवकाइ खलिक-खलिक बडइ, बाकि एक प्रभुके सेवा करसहुँ। 6 कामसभ खलिक-खलिक बडइ, बाकि हमार हरेक जनक जिवनमा काम करना सक्ति त उहे परमेस्वर देससि। 7 जम्मे जनक डउल हखइ कहके हरेक मन्सेके पवितर-आत्माक वरदान दियाइल बडइ। 8 पवितर-आत्मा ककरहुँके बुद्धिक बात फदकेके हसे उहे पवितर-आत्मा ककरहुँके ग्यानक बात फदकेके वरदान देससि। 9 उहे पवितर-आत्मा ककरहुँके विस्वास करेके वरदान देससि। उहे पवितर-आत्मा ककरहुँके मनियइलि मन्सावानिके डउल बनावेके वरदान देससि। 10 ककरहुँके यचम्मक काम करेके, ककरहुँके अगमवाडि फदकेके, ककरहुँके आत्मा छुटियावेके, ककरहुँके खलिक-खलिक हइने जानल भासासभ फदकेके हसे ककरहुँके उअ भासासभक यरथ खोलेके वरदान देससि। 11 इअ जम्मे उहे एक पवितर-आत्माक काम हखइ। हुने यापन इछा यनुसार हरेक जनके फरक-फरक वरदान देससि। एक देहि, बहुत यङगसभ 12 जसने देहि एक बडइ हसे वकर बहुत यङगसभ बडइ, बाकि फरक-फरक यङगसभ मिलके एगुडा पुरा देहि बनसइ। ख्रिस्टक देहिया फेनि वसने बडइ। 13 हमरा विस्वासिसभ फेनि एक देहि नहिँया बडहुँ, केहकेकि एक पवितर-आत्मासे हमरा जम्मे जन बप्तिस्मा पउले बडहुँ। हमरा यहुदि भेले फेनि, अयहुदि भेले फेनि, बहरिया भेले फेनि हसे स्वतन्तर भेले फेनि, हमरा जम्मे जनके एक पवितर-आत्मा दियलइ। 14 केहकेकि हमार देहिया एगुडे यङगसे हइने बनल बडइ, बाकि बहुत यङग मिलके बनल बडइ। 15 यगर टङवा “मुइ त हाथ हइने हखहि, उहेसे मुइ देहियाक यङग हइने हखहि” कहके कहबिय जउँ, कथि उअ देहियाक यङग नाहिँ हखबिय त? 16 हसे कनवा “मुइ याखि हइने हखहि, उहेसे मुइ देहियाक यङग हइने हखहि” कहके कहबिय जउँ, कथि उअ देहियाक यङग नाहिँ हखबिय त? 17 यगर जम्मे देहिया याखि भेले कथिसे सुनेके? यगर जम्मे देहिया कान भेले कथिसे सुङहेके त? 18 बाकि परमेस्वर यापन इछा यनुसार देहियामा हरेक यङगके मिलाके राखदेले बडसि। 19 यगर एगुडे यङग जम्मे देहिया भरि भेले जउँ देहि नाहिँ हतिय। 20 बाकि यङगसभ बहुत भेले ताफेनि देहि त एगुडे बडइ। 21 यखिया हथवाके “मोरके तोर चाहिँ हइने बडइ” कहे नाहिँ सकबिय। वसने करके मुडिया टङवाके “मोरके तोर चाहिँ हइने बडइ” कहे नाहिँ सकबिय। 22 बरु कमजोर देखारि देहियाक यङगसभ झन आवस्यक हसइ। 23 देहियाक जुन यङगसभ हमरा कम यादरक योग्य कहके सोचसहुँ, वकरेके बढता यादर देसहुँ। हमरा देखावे हइने मिलना यङगसभके डउलसे लोकोसहुँ। 24 जबकि हमरा देखावे मिलना यङगसभके वास्ता करे नाहिँ परतइ। बाकि कमजोर यङगके बहुत यादर देवे परे जोकर परमेस्वर हमार देहियाक जम्मे यङग मिलाके रखले बडसि, 25 ताकि देहियामा फुट झिन हखइ हसे देहियाक यङगसभ एक-दोसरि यङगके बराबर वास्ता करइ। 26 यगर एगुडा यङगक कस्ट हतइ जउँ, वकरसाङे जम्मे यङगसभ कस्ट पउतइ। यगर एगुडा यङगक यादर हतइ जउँ, देहियाक जम्मे यङग वकरेसाङे आनन्द मनोतइ। 27 तोहरा जम्मे जन ख्रिस्टक देहि नहिँया हखह हसे तोहरा हरेक जन उअ देहियाक एक-एक यङग हखह। 28 परमेस्वर मन्डलियामा पहिला प्रेरित, दोसरि अगमवक्ता, तिसरि सिछक, यचम्मक काम करलाहर हसे मनियइलि मन्सावानिके डउल बनावेके वरदान पावल मन्से, मदत करलाहर, प्रसासन चलोलहर, हइने बुझ्ना अन्य भासा फदकलहर मन्सेसभके नियुक्त करले बडसि। 29 कथि जम्मे जन प्रेरितसभ हखइ? कथि जम्मे जन अगमवक्तासभ हखइ? कथि जम्मे जन सिछकसभ हखइ? कथि जम्मे जन यचम्मक कामसभ करसइ? 30 कथि जम्मे जन मनियइलि मन्सावाके डउल बनावेके वरदान पउले रहसइ? कथि जम्मे जन हइने बुझ्ना अन्य भासा फदकसइ? कथि जम्मे जन हइने बुझ्ना अन्यभासाक यरथ खोले सकतइ त? 31 तोहरा सबसे उतम वरदानसभ पावेके कोसिस करिह। याबे मुइ तोहराके उतम वरदान परयोग करना तरिकाक बारेमा कहबहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.