१ कोरिन्थि 11 - चितवनिया थारु1 मुइ ख्रिस्टक देखासिखि करल नहिँया, तोहरा मोर देखासिखि करिह। मुडिया झापेके बारेमा निरदेसन 2 मुइ तोहार बखान करसहिँ, केहकेकि तोहरा जम्मे चिजुवामा मोरके सम्झसह हसे मुइ तोहराके देलि सिछा पालन करसह। 3 बाकि तोहरा इअ बुझह कहके मोर इछा बडइ कि, हरेक मरदानाक प्रमुख ख्रिस्ट हखसि, जनिक प्रमुख वकर मरदवा हखिय हसे ख्रिस्टक प्रमुख परमेस्वर हखसि। 4 कुनहुँ मरदाना मन्से यापन मुडिया झापके परथाना करसिय कि अगमवाडि फदकबिय जउँ, उअ ख्रिस्टक यपमान करसिय। 5 बाकि मुडिया हइने झापके परथाना करलाहर कि अगमवाडि फदकेलहर जनि यापन मरदावाक यपमान करसिय, केहकेकि इअ त वकर तहिँया केसवा खउरल नहिँया हखइ। 6 यगर कुनहुँ जनि यापन मुडिया झापके परथाना नाहिँ करबिय जउँ, बरु उअ यापन केसवा कटिय। जनिक तहिँया केसवा काटेके कि खउरेके लाजक बात भेलेसे, उअ यापन मुडिया झपिय। 7 मरदाना मन्से यापन मुडिया झापे हइने बनसइ, केहकेकि उअ परमेस्वरक स्वरुप हसे गउरव हखिय, बाकि जनि यापन मरदावाक गउरव हखिय। 8 केहकेकि मरदाना जनिसे हइने बनल हखइ, बाकि जनियानि मरदानासे बनल हखिय। 9 मरदावा जनियावाक तहिँया बनल हइने हखिय, बाकि जनियावा मरदावाक तहिँया बनल हखिय। 10 उहेसे स्वरगदुतवानिक यागा जनियावा यापन मरदावाक अदलमा बडहिँ कहके देखावेके तहिँया यापन मुडवा झापे परतइ। 11 ताफेनि प्रभुमा जनि मरदानासे स्वतन्तर हइने बडिय हसे मरदावा फेनि जनियावासे स्वतन्तर हइने बडिय। 12 इअ सदियो हखइ कि, पहिलो जनियानि मरदानासे बनलिय, बाकि हरेक मरदाना मन्से जनियानिसे जरमलइ हसे जम्मे चिजु परमेस्वरसे यसइ। 13 तोहरा यपनहिँ विचार करह त, कथि जनियानि मन्से यापन मुडवा नाहिँ झापके परमेस्वरके परथाना करले सोभा देतइ त? 14 कथि मरदाना मन्से नमहर केस पालेके वकर तहिँया लाजक बात हखइ कहके जम्मे जनक हइने थाह बडइ त? 15 बाकि जनियानिक तहिँया नमहर केस गउरवक बात हइने हखइ त? केहकेकि नमहर केस मुडिया झापेके तहिँया वकरेके दियाइल हखइ। 16 यगर कुनहुँ यकर बारेमा ठोरा-बोलि करे चाहतइ त, मुइ इअ कहबहिँ कि, हमार इअ बाहेक याको दोसर चलन हइने बडइ, नत परमेस्वरक याको मन्डलियाहमा बडइ। प्रभु-भोज ( मति २६:२६-२९ ; मरकुस १४:२२-२५ ; लुका २२:१४-२० ) 17 याबे मुइ इअ निरदेसन देइकि तोहार बखान नाहिँ करबहिँ, केहकेकि जब तोहरा एक ठउरिमा जामा हसह, वहवाँ यसलसे फेनि खराब हखइ बडइ। 18 पहिला बात इअ हखइ कि, जब तोहरा सङगतिक तहिँया जामा हसह, तोहार बिचा फुट हसइ कहके मुइ सुनले बडहिँ हसे किहो मतरामा मुइ उअ बतवा विस्वास फेनि करसहिँ। 19 तोहारमधे फुट यावेके जरुरि बडइ, ताकि परमेस्वरसे मंजुरि पावल यसल मन्सेसभक पहिचान हखे सकइ! 20 जुन रितिसे तोहरा जेउना खाएके तहिँया जामा हसह, वकरेके प्रभु-भोज कहे नाहिँ सकेतइ। 21 केहकेकि तोहरा यापन यनलि खइनवा चिजुवा यपने सुरमा खाए लगसह, कुनहुँ भुखले रहसइ हसे कतेक जन मातल रहसइ। 22 कथि खाए-पिएके तहिँया तोहार यपने घर हइने बडइ? कि कथि तोहरा परमेस्वरक मन्डलियाके हेला करसह हसे किहो हइने भेलहरवानिके लजियामा पारसह? यकर बारेमा मुइ तोहराके कथि कहबहिँ त? यकर तहिँया त, मुइ कबहुँ फेनि तोहार बखान नाहिँ करबहिँ। 23 केहकेकि प्रभुसे मुइ जथि पउलहिँ, उअ तोहराके सप देलहिँ। जुन राति हुने पकडाय जाइरहलसि, उहे राति येसुजि हथवामा रोटिया लेलसि, 24 हसे परमेस्वरके धन्यवाद देके रोटिया खडोते कहलसि, “इअ तोहार तहिँया दियाइल मोर देहि हखइ, मोर सम्झनामा इअ करते रहिह।” 25 वसने करके रोटिया खासकलेपर हुने कचोरवा लेके यसके कहलसि, “इअ कचोरवामा परमेस्वर हसे मन्सेक बिचा सम्बन्ध स्थापित करना मोर रकत बडइ। जहिया-जहिया तोहरा इअ पियबह, मोर सम्झनामा इअ करते रहिह।” 26 यसने जहिया-जहिया तोहरा रोटिया खेबह हसे इअ कचोरवासे पियबह, प्रभुजि नाहिँ यवइलइ हुनेक मृत्युक परचार करसह। 27 बाकि जुने अयोग्य रितिसे प्रभुक रोटि खेबिय हसे हुनेक कचोरवासे पियबिय, उअ मन्सावा प्रभुक देहियाक हसे रकतवा अपवितर बनोलेसे दोसि ठहरबिय। 28 उहेसे इअ रोटिया खइलि हसे कचोरवासे पियलिसे यागा हरेक मन्से पहिला यपनहिँके जचिय। 29 केहकेकि जुन मन्सावा प्रभुक देहियाके यादर हइने देके इअ रोटिया खेबिय हसे कचोरवासे पियबिय जउँ, यापनमा दन्ड यनबिय। 30 उहेसे तोहारमधे बहुत जन कमजोर हसे रोगि बडह तके कतेक जन मरसकल बडह। 31 बाकि यगर हमरा यपनहिँके ठिकसे जचबहुँ जउँ, हमरा दन्ड नाहिँ पउबहुँ। 32 जब प्रभु हमार न्याय करससि, तब हुने हमराके अनुसासनक तहिँया करससि, ताकि संसारक मन्सावानिसाङे हमरा फेनि दोसि नाहिँ ठहरु। 33 उहेसे मोर प्रियसभ, जब तोहरा प्रभु-भोज खाएके तहिँया जामा हसह, तोहरा एक-दोसरि जनके इसियइह। 34 यगर कुनहुँ भुखाइल बडइ जउँ, उअ घरवामा खइय, ताकि तोहरा जामा हखइकि दोसि नाहिँ ठहरबह। याको बतवाक बारेमा मुइ तोहार लघिना यवइकि निरदेसन देबहि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.