१ कोरिन्थि 10 - चितवनिया थारुइस्राएलक इतिहाससे चेतवनि 1 प्रियसभ, तोहरा इअ बतवा जनह कहके मुइ चाहबहिँ कि, हमार पुरखावानिके बदरिया मिस्र देससे पइडा देखोते लिगलिय हसे हुनुका जम्मे जन समुनदरवाक बिचासे पार करके गेलइ। 2 बदरिया हुनुकाके पइडा देखोते लिगलिय हसे हुनुका समुनदरवाक बिचा हखते मोसाक पाछा लगलइ तके इअ हुनुका बप्तिस्मा लेल नहिँया भेलइ। 3 हुनुका जम्मे जन परमेस्वरक यचम्मसे जुटावल जेउना खेलइ, 4 हसे हुनुका जम्मे जन एगुडे आत्मिकि पानि पिलइ, केहकेकि हुनुकर सङहि-सङहि गेलहर आत्मिकि सिलसे निकडल पानि पिलइ हसे उअ सिल ख्रिस्ट रहलसि। 5 बाकि हुनुकर बहुत जनसे परमेस्वर खुसि हइने भेलसि हसे हुनुका उराठ-ठउरियामा नास भेलइ। 6 हमरा फेनि हुनुकर नहिँया खराब इछा नाहिँ राखु कहके इअ जम्मे घटनवा हमार चेतवनिक तहिँया हखइ। 7 हुनुकर कतेक जनक करलि नहिँया तोहरा मुरति पुजा झिन करिह। जसने धरमसास्तरवामा लिखाइल बडइ, “मन्सावाह भोजमा खाए-पिए बेठलइ हसे अनइति तरिकासे मोजमाजा करे लगलइ।” 8 हुनुकर कतेक जनक करलि नहिँया हमरा धुचुड करे नाहिँ बनतइ। हुनुका धुचुड करलेसे एक दिनमा तेइस हजार जन मरलइ। 9 हमरा ख्रिस्टके जाँचे नाहिँ बनतइ, जसने हुनुकरमधे कतेक जन करलइ हसे सपवानिसे नास भेलइ। 10 हमरा गनगन करे नाहिँ बनतइ, जसने हुनुकरमधे कतेक जन करलइ हसे मृत्युक दुतवा हुनुकाके नास करलिय। 11 हमार चेतवनिक तहिँया इअ जम्मे घटनवा हुनुकरमा घटलइ, बाकि इअ बतवा हमरा याखिर दिनवामा जियलहरानिके सिखावेके तहिँया धरमसास्तरवामा लिखाइल बडइ। 12 उहेसे, जुने मुइ डटके बडहिँ कहके सोचसिय, उअ चेतले रहिय, ताकि उअ झिन गिरिय। 13 मन्सेक तहिँया जुन खलिक परिछा यसइ, उअ बाहेक तोहार जिवनमा याको परिछा हइने याइल बडइ। बाकि परमेस्वर विस्वासयोग्य बडसि, जुने तोहराके सहे हइने सके जोकर परिछामा परे नाहिँ देबसि, बाकि हुने परिछासे बाहरा निकडेके पइडा फेनि बनादेबसि, ताकि तोहरा उअ सहे सकह। मुरतियाके चढोलि चिजुवा झिन खइह 14 उहेसे मोर प्रिय भयवाह, मुरति पुजासे तनाउ रहिह। 15 तोहराके ग्यानि मन्से समझके मुइ कहबहिँ। मोर कहलि बतवा तोहरा यपनहिँ विचार करिह। 16 जब प्रभु-भोजक कचोरवा लेके हमरा परमेस्वरके धन्यवाद देसहुँ, कथि उअ कचोरवासे पियइकि हमरा ख्रिस्टक रकतवामा सहभागि हइने हसहुँ त? कथि खडोलि रोटिया खाइकि हमरा ख्रिस्टक देहियामा सहभागि हइने हसहुँ त? 17 केहकेकि रोटि एगुडे बडइ हसे हमरा बहुत जन भेले ताफेनि एगुडे देहि नहिँया हखहुँ, केहकेकि हमरा एगुडे रोटिसे खेसहुँ। 18 इस्राएलि मन्सावानिक बारेमा विचार करह। जुने वेदियामा भोग चढोलि चिजुवा खेसइ, कथि हुनुका वेदियामा परमेस्वरके पुजेरियाक करलि सेवामा सहभागि हइने हसइ त? 19 मुइ कथि कहइ बडहिँ त? कथि मुरतियाके चढोलि खइना चिजुवाक किहो महत्व बडइ कि मुरतियाक किहो महत्व बडइ? 20 मुइ कहे खोजइ बात इअ हखइ कि, परमेस्वरके हइने चिनलहराह जथि भोग चढोसइ, हुनुका परमेस्वरके हइने चढाके भुतवानिके चढोसइ। तोहरा भुतवानिसाङे सहभागि हखह कहके मुइ हइने चाहसहिँ। 21 तोहरा प्रभुक कचोरवासे हसे भुतवानिक कचोरवा दुन्हुसे पिए नाहिँ सकबह। तोहरा प्रभुक टेबुलवा हसे भुतवानिक टेबुलवा दुन्हुँसे खाए नाहिँ सकबह। 22 कथि हमरा प्रभुके डाहि बनोइ बडहुँ? कथि हमरा हुनेसे बरियार बडहुँ? विस्वासिसभक स्वतन्तरता 23 तोहरा कहसह, “जम्मे चिजु करे बनसइ,” बाकि जम्मे चिजुवा भलाइ हइने करसिय। “जम्मे चिजु करे बनसइ,” बाकि जम्मे चिजुवा फाइदा हइने करसिय। 24 कुनहुँ फेनि यापन भलाइ झिन खोजइ, बरु दोसरि जनक भलाइ खोजइ। 25 मासुक दोकानमा जथि बेचेसइ, मनवामा सक नाहिँ यानके किहो प्रस्न झिन पुछके खइह, 26 केहकेकि “धरतिया हसे वकरमा भेलि जम्मे चिजुवा परमप्रभुक हखइ।” 27 यगर कुनहुँ प्रभुके विस्वास हइने करल मन्से तोहराके खाएके नेउतबिय हसे तोहार जायके मन लगतइ जउँ, जइह तके तोहार यागा जथि चिजु रखाइल बडइ, मनवामा सक नाहिँ यानके किहो प्रस्न झिन पुछके खइह। 28 बाकि कुनहुँ “इअ त मुरतिक चढावल चिजु हखइ” कहके कहबिय जउँ, उअ करलहरा मन्सावाक खातिर हसे मनवामा सक झिन यवइ कहके झिन खइह। 29 मोर कहलि बतवा तोर मनवाक तहिँया हइने, बाकि उअ कहलहरा मन्सावाक मनवाक तहिँया कहले हखहि। तोहरा कहे सकबह, “मोर स्वतन्तरताके दोसरे जनक मनवाके केहके जाँचे देवेके? 30 यगर मुइ परमेस्वरके धन्यवाद देके खाइ बडहिँ जउँ, धन्यवाद देके खइलि चिजुवामा केहके याको जन मोर निना करेके?” 31 उहेसे चाहे तोहरा खाह, पिह कि जथि करह, जम्मे परमेस्वरक यादरक तहिँया करिह। 32 तोहरा न यहुदियानिक, न ग्रिक मन्सावानिक, कि परमेस्वरक मन्डलियाक तहिँया बाधा देना काम झिन करिह। 33 जसने मुइ फेनि यपनहिँके खुसि पारना काम हइने करके जम्मे काममा याको जनके फाइदा करे खोजसहि, ताकि बहुत जन उद्धार पावे सकइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.