१ कोरिन्थि 1 - चितवनिया थारु1 परमेस्वरक इछासे येसु ख्रिस्टक प्रेरित हखेके बलावल मुइ पावल हसे हमार भाइ सोस्थेनसवरिसे, 2 कोरिन्थ सहरवामा भेलि परमेस्वरक मन्डलियाक विस्वासिसभ, जुने ख्रिस्ट येसुमा पवितर बनावल बडइ हसे हुनेक पवितर जन हखेके तहिँया बलोलिसभ तके चारिवरसे जुने प्रभु येसुके परथाना करसइ, उअ जम्मे जनके इअ चिठिया लिखइ बडहुँ। हुनेहिँ हुनुकर हसे हमार जम्मे जनक प्रभु हखसि। 3 हमार परमेस्वर पिता हसे प्रभु येसु ख्रिस्टवरिसे तोहराके अनुग्रह तके सान्ति मिलइ। पावल परमेस्वरके धन्यवाद देसिय 4 मुइ तोहार तहिँया परमेस्वरके सबदिन धन्यवाद देसहिँ, केहकेकि ख्रिस्ट येसुमा तोहरा परमेस्वरसे अनुग्रह पउले बडह। 5 केहकेकि परमेस्वर तोहराके ख्रिस्टमा तोहार मन्डलियामा जम्मे खलिक आसिस देले बडसि। खास करके जम्मे खलिक फदकेके सक्ति हसे बुझ्ना ग्यान पउले बडह। 6 यसने ख्रिस्टक बारेमा हमार कहलि बतवा सत्य हखइ कहके वकरेसे परमेस्वर तोहारमा परमानित करलसि। 7 ताकि हमार प्रभु येसु ख्रिस्ट फेरि यबसि कहके पइडा हेरइकि तोहारमा कुनहुँ फेनि आत्मिकि वरदानक कमि झिन हखइ। 8 हमार प्रभु येसु ख्रिस्ट यइलि दिनवामा तोहरा निरदोस हखह कहके हुने तोहराके याखिरलइ विस्वासमा बरियार बनोबसि। 9 परमेस्वर विस्वासयोग्य बडसि हसे हुनेहिँ यापन पुतर हमार प्रभु येसु ख्रिस्टसाङे सङगतिक तहिँया तोहराके बलोलसि। मन्डलियामा फुट 10 प्रियसभ, मुइ तोहराके प्रभु येसु ख्रिस्टक नाउँमा बिन्ति करइ बडहिँ कि, तोहरा जम्मे जन एक-दोसरि जनसाङे सहमत हखिह हसे तोहार बिचा फुट झिन हखइ, बरु तोहरा एके मनक तके एके उदेस्यक हखह। 11 प्रियसभ, तोहार बिचा झगडा बडइ कहके क्लोएक परिवारसे मुइ समाद पउले बडहिँ। 12 यकरसे मुइ इअ बुझले बडहिँ कि, तोहार मधेसे कुनहुँ, “मुइ पावलक”, कुनहुँ “अपोल्लोसक”, कुनहुँ “मुइ पतरुसक” हसे कुनहुँ “मुइ ख्रिस्टक हखहि” कहके कहसह। 13 कथि ख्रिस्ट दाफा-दाफामा बटाइल बडसि? कथि पावल तोहार पापक तहिँया क्रुसवामा टङेलिय? कथि तोहरा पावलक नाउँमा बप्तिस्मा लेलह? 14 मुइ परमेस्वरके धन्यवाद देबहिँ कि, तोहार मधेसे क्रिस्पस हसे गायस बाहेक याको ककरहुँके फेनि मुइ बप्तिस्मा हइने देले बडहिँ। 15 उहेसे मोर नाउँमा तोहरा बप्तिस्मा लेले बडह कहके कुनहुँ फेनि कहे नाहिँ सकबह। 16 हँ, मुइ स्तिफनसक परिवारके बप्तिस्मा देलहिँ। यकर बाहेक, मुइ ककरहुँके बप्तिस्मा देलहिँ कहके मोर थाह हइने बडइ। 17 केहकेकि ख्रिस्ट मोरके बप्तिस्मा देवेके हइने, बरु हुने मोरके सुसमाचार परचार करेके तहिँया पठोले हखसि। मुइ परचार करइकि मन्सेक चलाख बातसे हइने फदकलहिँ, नत ख्रिस्टक क्रुसक सक्ति व्यरथ हतिय। ख्रिस्ट परमेस्वरक सक्ति हसे ग्यान 18 क्रुसमा ख्रिस्टके भोग चढोलि समाद नास हखलहरानिक तहिँया मुरुख बात हखइ, बाकि हमरा उद्धार पउलहरानिक तहिँया इअ परमेस्वरक सक्ति हखइ। 19 केहकेकि धरमसास्तरवामा यसके लिखाइल बडइ, “मुइ बुद्धियारि मन्सावानिक बुद्धिया नास पारबहिँ हसे चतुरानिक चतुराइ विफल पारबहिँ।” 20 बुद्धियारि मन्सावाह कहवाँ बडइ त? व्यवस्थाक-गुरु कहवाँ बडइ? इअ जुगवाक चतुराइसे फदके जनलहरा कहवाँ बडइ? कथि परमेस्वर इअ संसारक बुद्धिके मुरुख हइने बनोलसि? 21 संसारक मन्सावाह यापन बुद्धिसे परमेस्वरके चिने नाहिँ सकतइ कहके हुने यापन बुद्धिमानि योजना यनुसार हमार परचार करलि मुरुख बतवाहिँसे विस्वास करलहरानिके बचावे चाहलसि। 22 यहुदि मन्सावाह परमानक तहिँया स्वरगसे यचम्मक काम हेरे खोजसइ हसे ग्रिक मन्सावाह बुद्धिक बात सुने खोजसइ। 23 बाकि हमरा क्रुसमा टङइलि ख्रिस्टक बारेमा परचार करसहुँ, जुन यहुदि मन्सावानिक तहिँया यपमानक बात हसे अयहुदियानिक तहिँया मुरुख बात भेलइ। 24 बाकि परमेस्वरक बलोलि यहुदि हसे ग्रिक मन्सावानिक तहिँया ख्रिस्टसे परमेस्वरक सक्ति हसे परमेस्वरक बुद्धि हखसि। 25 केहकेकि परमेस्वरक मुरुख बात मन्सावानिक बुद्धिसे महान बडइ हसे परमेस्वरक कमजोरि फेनि मन्सावानिक बोलसे खाँ सक्तिसालि बडइ। 26 प्रियसभ, परमेस्वर तोहराके बलोइकि, तोहरा कसनुक रहलह? उअ विचार करह। इअ संसारक मन्सावानिक विचारमा तोहरा बहुत जन बुद्धियार हइने रहलह। बहुत जन सक्तिसालि हइने रहलह हसे बहुत जन जबडे खानदानमा हइने जरमल रहलह। 27 बाकि बुद्धियारि मन्सावानिके लजियामा पारेके तहिँया परमेस्वर संसारक मुरुख ठहरोलहरानिके छानलसि हसे सक्तिसालि मन्सावानिके लजियामा पारेके तहिँया कमजोर ठहरोलरानिके छानलसि। 28 संसारमा यपनेके महान ठहरोलहरानिके व्यरथ बनावेके तहिँया परमेस्वर संसारमा हेला भेलि हसे तुच्छ ठहरोलहरानिके छानलसि, 29 ताकि परमेस्वरक यागा कुनहुँ फेनि घमन्ड झिन करइ। 30 परमेस्वरक कारनसे तोहरा ख्रिस्ट येसुमा बडह, परमेस्वर ख्रिस्ट येसुके हमार तहिँया बुद्धि बनोले बडसि। हुनेहिँ हमराके परमेस्वरक यागा ठिक ठहरोले बडसि, हुने हमराके परमेस्वरक पवितर जन बनोले बडसि हसे पापसे छुटकारा देलसि। 31 उहेसे धरमसास्तरवामा यसके लिखाइल बडइ, “यगर कुनहुँ घमन्ड करतइ जउँ प्रभुक करलि कमवामा घमन्ड करइ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.