نامَه تیتوسیرا 3 - کتاب مقدس به زبان تالشي - گویش مرکزی

هر چاکه کاریرا آمادَ بِبَه

¹ اَوون یاد آرَفن کن حاکیمِن و صاحیب منصَبون فِرمون ببون، و هر چاکَه کاری اَنجوم دوعِه را آمادَ ببون؛

² هیچ کَمی بدی نِواجِن، ژِژِ نِکَرِن، آرام ببون و گِردِ آدَمونَّه با اَدَب رفتار بکَن.

³ اِمی خونه کن اَمه نی، ایی زمان نافَم و نافِرمون و گومراه بیمون، همه مودیل هواهَوس و خَشیون وَزییَربیمون؛ و کینَه کا و زِرَ بردِ کا زندَگی اَکَریمون. مردوم اَمکا بیزار بینَه و اَمه نی یَندِ کا.

⁴ ولی وقتی چَمَه نیجات اَدَرَ خدا مِربانی، و چَی موحبت اینسانونرا دیار آبَه،

⁵ اَ اَمَش نیجات دوعَه. اِم نیجات چَمَه چاکَه کارونی خونِه کن صالِح بِه دلَکا اَنجوم دوعَمون بَه خاطِر نِبَه، بَسکَم چَی اِشتَن رحمَتی خونِه و اَ شوشتِه ایی راه کا بَه کن چَی واسیطنَه خدا موقدسَه روح، اَمَش تازَ تولد و تازَ زندَگی دوعَشَه؛

⁶ کن خدا هَه موقدسه روح چَمه نیجات اَدَر، عیسای مسیح واسیطنَه فِرَوون چَمه سَردِرِ ویکردِش،

⁷ تا چَی فِیضینه صالح بَحیساب بِرَم، و طبق اَ اومیدی کن زیرونَه زندَگیرا بَداشتیمون، واریثِن آبَم.

⁸ اِم گَفیَه کن بَبی بَی ایتماد کردِ و تِکا بَپیمه کن اِم چییون سَردِرِ ایصرار بداری، تا اَیِنی کن خداشون ایمان وَردیَه، هوش ببون کن بَشتن چاکَه کاریرا وقف بکَن. اِمِن گِردیرا چاکه و مِفَتَه.

⁹ ولی جنگِستِه و ژِژِ ایی کن نافَم گیریکا اَ و بونجوقونکا و خَرا خِله اِنی کن شریعتی خونه اَ، رَت آب، اِمی خونه کن اِمِن دَدار و بی اَرزشین.

¹⁰ اَ کن جدایی دَرَفند ایی کَرَ، و چَی به دوملَه دِوومین کرَ را هوشدار بدَ، و چَی بَه دوملَه بَینه دِ شِه آمِه مکه.

¹¹ چیرا کن بَموستیشه اِنتَرَ آدَم گناخکارَ و فاسید آبَه یَه. هَه اِشتَن، اِشتَن محکوم بَکَی.

آخِرین نَصیحتِن و سلامن

¹² هته کن آرتماسی یا تیخیکوسی اِشتِه وَر عَندِمه، تا بَشاشَه تقلا بکه کن خَیلی زو چمن وَر شهر نیکوپولیسی را بای، اِمی خونه کن بَپیمه زمِستونیرا اَ جِگاکا بومونم.

¹³ تا اَ جِگایی کن بَشاشَه، زیناسِه وکیل و آپولوسی چَوون اَ سفریکا آرَس، هواسِر ببو تا اَیِن چیی ایی کم مدارِن.

¹⁴ بَرزِن چَمَه مردوم آموج بیگِن کن احتیاجون رَفع کردِرا بَشتن چاکَه کارون اَنجوم دوعِه وقف بکَن و بی بَرَ مبون.

¹⁵ اَیِنی کن مِنَه دِرِ اینَه، گِرد تِرا سلام دَرِن. اَیِنیرا کن اَمَشون ایمانی دلَکا رَی بَداشتین سلام آدَ. فیض شمَه گِردینَه دَرِ ببو.