نامَه تیتوسیرا 2 - کتاب مقدس به زبان تالشي - گویش مرکزی

درستَه تعلیمی آموج بدَ

¹ ولی تِه دِرِستَه تعلیمی طبق، آموج بِدَ.

² پیرَ آدَمِن هوش ببون و با وقار ببون و اِشتَن نفسی ناری بیگِن و ایمان و موحبَت و آمبست مندِ کا دِرِست رفتار بکَن.

³ پیرَ ژِنن نی پی اِشتَن حورمتی غَم بَرِن، ایفتیرا نِژَنِن و وِر شراو هِنتِه، بندَ آنِبون، اَیِن پی هر چیی ایی کن چاکَه آموج بدَرِن،

⁴ تا جوانَه ژِنون آموج بدَن کن اِشتَن شو و اِشتَن خِردَنون رَی بِدارِن.

⁵ و اِشتَن نفسی نَه بیگِن و پاجا ببون و کدبانو و مِربان و اِشتَن شو فِرمون ببون، تا خدا کلام، بَد واتِه مبو.

⁶ هنتَه نی جوانَه مِردون نی دیم پِنَه تا اِشتَن نفسی نَه بیگِن.

⁷ تِه اِشتَن گردِ چییونکا چاکَه کارون خونه سرمشق بب. اِشتَن آموجیکا صاف صادیق و با وَقار بب،

⁸ و اِشتِه گفِن اَنه دِرست ببو کن کَسی مشا عَیبی چَی سَر پِنَرِ، تا وقتی کن زِرَبَرا اِن مَشان اَمکا بدی ویندِ، شرمندَ آبون.

⁹ وَزییَرون تشویق اَکَن کن هر چیی ایکا بی اِمکن اِشتَن اَربابونَّه گَه بَه گَه بِدَرِن چَوون فِرمون ببون و اَوون راضی غَم بَرن،

¹⁰ پِمَتارِن، بَسکم اِشتَن چاکَه ایمانی کامیل آمونِن تا هر چیی ایی دلَکا چَمه نیجات اَدَر، خدا آموجی خاص گیری، قشگینَه آمونِن.

¹¹ اِمی خونه کن خدا فیض اَیر آبیَه، اَ فیضی کن آدَمون گِردی نیجات آرَدا،

¹² و اَمه آموج دَرِ کن بی دینی و دِنیا هوا هَوَسون آهَرزَم، اِشتَن نفسی نَاری بیگِرَم و صالِح بِه و دیندارینَه اِم زَمونَکا زندَگی بکَرم،

¹³ و چَمَه اَ مِبارَکه اومیدی مونتظیر بومونَم، یعنی چَمَه عَظیمه خدا و چَمَه نیجات اَدَر عیسای مسیح شکوه و جلالی اَیر آبِه،

¹⁴ کن چَمرا اِشتَن جانی آداشَه تا هر آوشرَ چیکا اَمه بِراخمونِه و اِشتَنرا پاجا اَ قامی سِی آکَرِ کن چَی اِشتَن شِن ببون، کن چاکَه کاریرا غَیرَت بِداشتین.

¹⁵ اِم چییون اییلام بِکه؛ و گِردِ اِشتَن زاکیندارینَه، تشویق و توبیخ بکَه. و مَرزِن کَسی بَتِه گِچ بَحیساب بوعرِ.