نامَه تیتوسیرا 1 - کتاب مقدس به زبان تالشي - گویش مرکزی

¹ پولوسی طَرَفیکا، کن خدا وَزییَر و عیسی مسیح رسولَه، کن تَیین آبَه ایمَه تا خدا اینتخاب کردَ آدَمون ایمانی زبق بدَرِم و اَ حَییقتی کن دیندارینَه مطابقَه، بواجم،

² اِم حَییقت زَیرونه زندَگی اومیدینه یَه کن خدایی کن هرگز دِرو نیَدا، اَولیکا اَش اَمه وَعدَ دوعَیه

³ و اَ وَعدَش موناسیبَه وَقتیکا دیار آکَردِش، اَ کلامی اییلام کردِ چَمَه نیجات اَدَر خدا حِکمینَه، چمِن دَست دوعَشه،

⁴ تیتوسیرا، کن اَ ایمانی واتَنَه کن چَمَه گِردی نصیب بَیَه، چمن حَییقیَه خردَنَه: فیض و صلح و سلامتی خدای دَدَ طَرَفیکا و چَمَه نیجات اَدر عیسی مسیح طَرَفیکا تِرا ببو.

ایسبیَه ریشون صِفَتِن

⁵ بَتِه اِمی خاطر کِرتی جزیرَکا آنامَه تا تمون آنِبَه کارون سامون بدَری و هَته کن بته فرمون دامَه، هر شهریکا ایسبیه ریشونی اینتخاب بکری.

⁶ کلیسا ایسبیه ریشیرا نِبایَد چیی ایی چِی زندگیکا ببو کن چَی خونه چَمای ببو، تاکَه ایلَه ژِنی شو ببو، با ایمانه خِردَنون بدارِ تا کَسی نِشا اَوون هرزَگی و نافِرمون بِه خونه متّهم بکَرِ.

⁷ چیرا کن ایلَه ناظیرکن خدا دَستَکَه، چَی زندگی دلَکا نِبایَد چیی ایی چَی چَمای بِه خونه ببو. اَ نِباید یالَه نار و اَخلاقیکا تِند یا عرَخه هَر و یا زوراَواج ببو یا پولی خاطر حرصی ببو،

⁸ بَسکم مِیمان نوازببو و چاکی کردِ رَی بدار و اِشتَن نفسی نَه بیگِرِ و درست کار و موقدَّس و مونَظم ببو؛

⁹ اَ پی اَ موطمَئِنیَه کلامی کن آموج گَته شه کا آچیکِه تا بشا دییَرَ آدَمون دِرستَه تعلیم آموج بدَرِ و اَیِنی کن اِم آموجی زِرَبَرا این نی تَشَر بژَنِه.

¹⁰ اِمی خونه کن دَدارَ واجن و یاغی اِن و حیلَه بازِن وِرینَه، بَخِصوص اَیِنی دلَکا کن سِنَت بِه را ایصرار بَداشتین.

¹¹ کن چَوون گَویی پی دبستِه، اِمی خونه کن اَییِن خانیوادَ اون گِردی یندِکا تاکَه آنَّکرد و ناحَقَه بَرَ خونه اَ چییِنی آموج دَرِن کن نِبایَد بدَرِن.

¹² ایلَه چَوون پیغَمبرونکا واتشَه: «کِرتی آدَمِن گرد دِرواَواج و اَملِکَه آوشَر و لَوَلِرت و تنبَلینَه.»

¹³ اِم راستَه شاهیدی اییَه. پس اَوون بَرک تَشَر بژَن تا ایمانی دلَکا دِرِست ببون.

¹⁴ یهودیون داستانون و چَوون حِکمِن کن حَییقَتیکا دورینَه گوش آنِدَرِن.

¹⁵ پاجا اَ آدَمونرا گِردِ چییِن پاجا اَ، و اَیِنیرا کن بی ایمان و جیفینین، هیچ چیی ایی پاجا نییَه، بَلکَم هِم چَوون فکر جیفینینَه و هِم چَوون ووژدان.

¹⁶ اَیِن ایدعا بَکن خدا آنَّموست، ولی اِشتَن کارونَّه بَی حاشا بَکن. اَیِن نیفرت انگیزینَه و نافِرمون، و هر چاکَه کاریرا نامربوطین.