رومی کلیسارا نامه 8 - کتاب مقدس به زبان تالشي - گویش مرکزیخدا روح دلَکا زندَگی کردِ 1 پس ایسَه اَیِنیرا کن مَسیح عیسا دلَکا هِستین، دِ هیچ مَحکومیَتی نیَه، 2 چون شریعَتی کن زندَگی روحَه، مسیحْ عیسادلَکا، بَشِمَه شریعَتی گِناخیکا و مَرگیکا اَراخِمونیشَه؛ 3 چون اَ چیی ایی کن شَریعَت، اینسانی جندَکی عِجِز گیری خونه نَشایَه اَنجوم دوعِه، خدا اَنجوم داشَه. اَ اِشتَن زوعَه گِناخ کارَ جندَکی شیوار عَندِشَه تا گِناخیرا قِربونی ببو و اِنتَرَکِه اینسانی جَندَکی دِلَکا، گِناخیش محکوم کردَ، 4 تا اَ دِرِسته چیی اِنی کن شَریعَت بَپیشَه اَمَکا اَنجوم ببو. اَمَکا کن خدا روح واتنَه زندَگی بَکَمون، نِه جندکی واتَه چییون سَر. 5 اَیِن کن جیسمانی اینَه، اِشتَن فکرون جیسمانییَه چییون سَردِرِ نَرِن، ولی اَیِنی کن خدا روحِشون هِستَه، اِشتَن فکرون روحانییَه چییون سَردِرِ بَنانَه. 6 چون اَ اینسانی کن اِشتَن فکری جیسمانیَه چییون سَر آرَنا، مردَ یَه، اَمّا اَ فِکر کن خدا روح دوملَه بگَردِستی، سلامتی و زندَگیی اَ. 7 چون اَ کن اِشتَن فکری جندَکی سَر آرَنا، خِدانَه عَدابَت بَکَی، چیرا کن خدا شَریعَتیکا فِرمون نیَبَرد و نیَشا نی بَردِ، 8 و اَیِنی کن جندَک چَوونرا حکم بکَیه، نینَّشا خدا خَش آکَرِن. 9 ولی جندَک شِمَه سَریکا حِکم نییکَرد، بَسکَم خدا روحَه کن شمَه سَردِرِ حِکم بکَیه، اَلبَت اَگَم خدا روح شِمَکا ببو. کَسی مَسیح روح مَدارِ، اَ، مَسیح شِن نیَه. 10 ولی اَگَم مَسیح شِمَه دِلَکارَ، هَر چَنَه شِمَه جَندَک گِناخ کَردِ خونِه مَردَیَه، اَمّا اِمی خونِه کن صالح بَحیساب آمَه ایرون، خدا روح شِمَرا زِندَگیَه. 11 اَگَم روحی کن عیساش مَردَاونکا زندَ آکردَ، شِمَکا ببو، اَ کن مَسیح عیساش مَردَاونکا زندَ آکردَ، اِشتَن روح واسیطنَه کن شمَه دلَکارَ، شمَه فانیَه جندَکون نی زندَگی آرَدا. 12 پس برا اِن، اَمه مَدیونیمون، ولی نِه جندکی مَدیون، تا هنته جندَکی شیوار زندَگی بِدارَم. 13 اِمی خونِه کن اَگَم جندکی واتنَه زندَگی بکَرَ، بَمَردیرون؛ اَمّا اَگَم خدا روح واسیطَنَه، جَنَدَکی کارون بِکِشَه، زندَگی بَکَرون. 14 چون اَیِن کن خدا روح نَه هیدایَت بَبینَه، خدا زوعَه اِنینَه. 15 چیرا کن شِمَه وَزییَر گیری روح پَیدا کَردَرون نی، کن هَنی بِتَرسَه، بَسکَم زوعَه اون مقامیکا، اَگیَه زوعَه گیری روح بَدَست وَردَرن کن چَی واسِطَنَه لَسَّه بَژَرون: «دَدَ، دَدَجان.» 16 و خدا روحْ اِشتَن، چَمه روح خونه شاهیدی دَرِ کن اَمه خدا خِردَنِنیمون. 17 اَگَم خدا خِردَنِنیمون، پس وُرّاث نی هِستیمون، یعنی خدا واریثِن و مَسیح نَه ارثیکا شریکیمون. اِم شرطینَه کن اَمه نی عَذاب بوینَم، تا اَمه نی بَینه شکوه و جلال بیگِرَم. آیندَ شکوه و جلال 18 چمن نَظَرینَه، اِم زَمانَه عذابن، اَ شکوه جَلالی موقایسَه نَه کن اَمَکا دیارآرَبِن، هیچَه. 19 اِمی خونِه کن خیلقَت گِردِ اِشتَن اِشتیاقینَه خدا زوعَه اون اَیر آبِه، مونتَظیرَ. 20 اِمی خونه کن خیلقَت بَشتَنِش باطل آکَردیَه، نِه کن اِشتَن خواستَنَه، بَسکَم کَسی خواستنَه، کن بَی تَسلیمِش آکردیَه، اِم اُمیدینَه کن 21 خیلقَت اِشتَن نی، وَزییَر گیری فیسادیکا بَرَخِستی و خدا خِردَنون پُر شکوه جَلالَه آزادیکا، رَسَت بَبَیَه. 22 چون اَمه بَموستیمون کن گِردِ خیلقَت تا ایسَه هنته زَندِ داجی شیوار، داجیکا بَنالِستی. 23 ونِه تاکَه خیلقَت، بَلکَم اَمه اِشتَن نی کن خدا روح نوبَریمون، اِشتَن دِلیکا بَنالِستیمون، هَه حالیکا کن اِشتیاقینَه زوعَه اون مقامیکا، اَگیَه زوعَه گیری اینتظاریکامون، یَعنی اِشتَن جَندَکون رَخِستِه. 24 اِمی خونِه کن هِم اِمیدینَه نیجات گَتَمون. ایسَه اُمیدی کن بَبیَه ویندِ، دِ اُمید نیَه. چِنتَه کَسی بَشایَه چیی ایی اُمید ببو کن اَی بَویندییَه؟ 25 اَمّا اَگَم چیی ایی اومیدی دارَم کن هَنوزَنی ویندَمون نی، صَبرینَه چَی اینتیظاری بَکَشتیمون. 26 هته نی خدا روح چَمَه عِجِز گیریکا چَمَه کاریَری را بومَه یَه، اِمی خونِه کن نِزنَم پی چِنتَه دِوا بِکَرَم. ولی خدا روح عمیقَه نالِستِه ایی کن نیَیب واتِه، چَمَرا شَفاعَت بَکَی. 27 و اَ کن دِلون دِلَه بَگَردِستیَه، روح فِکری بَموستیَه، چون کن روح، خدا ایرادَنَه موقَدَسونرا شَفاعَت بَکَی. 28 بَموستیمون اَیِنی حَقیکا کن خدا رَی بَداشتینَ و چَی ایرادَنَه خِلِه بَه اینَه، گِردِ چیی اِن چَوون خِیری یَتیرا کار بَکَنه. 29 چون اَیِنی کن خِداشون نارتَر آزنِستَه، چیمی بَه نَه اَیِنِش تَیین کَردَ تا چَی زوعَه شیوار آبون، تا اِنترَکه مسیح، وِرَ برااون دِلَکا اولین خردَن ببو. 30 و اَیِنی کن نارتَر تَیین کَردِشَه نی خِلِه کَردِشَه؛ و اَیِنی کن خِلِش کردَ، صالح بَحیساب وَردِش؛ و اَیِنی کن صالح بَحیسابِش وردَ نی، شکوه وجَلال بَخشِستِش. 31 پس گِردِ اِم چییون نَ کا چِه بَشامون واتِه؟ اَگَم خدا اَمَنَه دَرِ، کیَه کن بِشا چَمَه زِرَبَرا ببو؟ 32 اَ کن اِشتَن زوعَه دَریغ نِداشتِش، بَلکَم بَش چَمَه گِردی راکا فدا کَردِش، بَبیَه گِردِ چییون دستو دیلبازینَه اَمه آنِدَرِ؟ 33 کیَه کن خدا اینتخاب آبَه اون، ایتهام بِژنه؟ خِدایَه کن اَوون صالح بَحیساب وَردَشَه! 34 کیَه کن اَوون مَحکوم بکَرِ؟ مَسیح عیسی کن مَردَ، و نِه تاکَه اِم، بَسکَم ، مَردَاونکا زندَآبه و خدا راستَه بالی وَریکا نِشتَه، هَیَه کن چَمَه گِردیرا شَفاعَت بَکَی! 35 کیَه کن اَمه مَسیح مُحبَتیکا تاک آکَرِ؟ غَرّ یا تَته وَسّه، اَیذَت و آزار یا قحطی، لوت گیری یا خطر یا شمشیر؟ 36 هَتَه کن کیتاو مزموریکا نِوِشتَه آبَه یَه: «اَمه هَمَه روج، اِشتِه خونِه مَردِ را بَشیمون و هِنتَه پَسی شیوار کن سرآبیردِرا بَبَنه، بَحیساب بومَمون.» 37 نِه، چَی واسیطَنه کن اَمَش موحبَت کَردَ، گِردِ اِم کارونکا، اَمه، اَیِنی کا کن پیروزین، کَفاتَریمون. 38 چون یَقین بموستیمون کن نِه مَردِ و نِه زندَگی، نِه فرشتَه اِن و نِه ریاسَتِن، نِه اِم زَمونَه چییِن و نِه آیندَ چییِن، نِه هیچ اینجاری، 39 و نِه برزَ جِگا و نِه دولَه جِگا، و نِه هیچ دیَرَ چیی ایی کن گِردِ دِنیاکارَ، نیَشا اَمه خدا موحبتیکا کن چَمَه خداوند مَسیح عیساکارَ، تاک آکَرِ. |
@ 2024 Korpu Company