رومی کلیسارا نامه 7 - کتاب مقدس به زبان تالشي - گویش مرکزی

شریعتیکا رَخِستِه

¹ برا اِن، مگَم نینَّموست، هنته کَسِنی نَه گَف دَرِمَه کن شَریعَتیکا با خَبَرین، شَریعَت تاکَه تا زمانی اینسانی سَردِرِ حِکم بَکَیَه کن اینسان زِندَیَه؟

² اِمی خونه کن شَریعَتی واتنَه، شو دارَ ژِن تا وقتی کن شو زندَیَه، بَی وابستَیَه. ولی اَگَم چَی شو بِمِرِ، اَ ژِن شرعَا اَیکا بَرخِستی.

³ پس اَگَم اَموقه کا کن چَی شو زِندَیَه، دییَرَ مِردینَه ببو، زیناکار بَبی. اَمّا اَگَم چَی شو بِمِرِ، اِم شَریعَتیکا رَخِستَه یَه، و اَگَم دیَرَ مِردینَه ایزدواج بکَرِ، بَی زینا کار نینَّوات.

⁴ چمن برا اِن، هِنترکِه، شِمَه نی مَسیح جندَکی واسیطنَه شَریعَتی را مَردَ ایرون، تا دیَرَ شَخصینَه وَصلَت بکَرَ، یعنی اَینَه کن مَردَاونکا زندَ آبَه یه، تا خِدارا بَرَ بِدرَم.

⁵ چون زمانیکا کن جندَکیکا زندَگی اَکَریمون، چَمَه نفس کن گِناخینَه پَتلَمه بَه، شریعَت اوون جیکو دَروَری، و چَمَه جندَکی اَعضا، کار اَگِری تا مَرگیرا بَرَ بِدرَم.

⁶ ولی ایسَه، اَمه اَ چیی ایی خونه کن بَیکا ویلاخیستَه بیمون مَردیمون و شَریعَتیکا رَخِستیمون، تا خدا موقدسَه روح نَه، ایلَه تازَ راه دلَکا خیدمَت بِکَرَم، نِه کَنَه راه نَه کن، تاکَه ایلَه نوشتَه یَه.

شریعت و گِناخ

⁷ پس چِه بِواجَم؟ مَگَم شَریعَت گِناخَه؟ هیچ موقِه! اِم حالیکا اَگَم شَریعَت نِبَه، سَر آنِگِنیمون کن گِناخ چِچیَه. اِمی خونِه کن اَگَم شَریعَت واتَش نِبَه «طمَع مَکَ» نَشایمونَه سَر آگِنِه کن طمَع کَردِ چِه چییَه.

⁸ ولی گِناخ شَریعَتی اِم حِکمیکا ایلَه فرصَتی پَیداش کردَ، تا هَر مودیل طَمَع چمن دِلَکا بوجود بوعَرِ. چون جِدا شَریعَتیکا، گِناخ مَردَیَه.

⁹ زمانی اَز شَریعَتیکا جِدا، زِندَ بیمَه؛ ولی وقتی کن شریعتی حِکم آمَه، گِناخ زِندَ آبَه و اَز مَردیم.

¹⁰ هَه حکم کن زندَگی وَعدَش دوعَه به، چمن مَردِ باعیث بَه.

¹¹ اِمی خونِه کن شریعَتی حِکمی واسیطنَه، گَناخ فِرصَتیش پَیدا کردَ و اَینَه بَمنِش گول ژَ و کِشتِش.

¹² پس، شَریعَت موقدسَه و شَریعَتی حِکم نی موقدسَه و دِرِست و چاکَه.

¹³ پس مَگَم اَ چیی کن چاک بَه، چمن مَردِ باعیث آبَه؟ هرگز! بسکم گِناخ اَ چیی کن چاک بَه واسیطَنَه، مَردِ چمن دِلَکا بوجود وَردِشَه تا اِنتَرَکِه آمونِه کن گِناخ، گِناخَه، و شریعَتی حِکمی واسیطنَه دیار آبو کن گِناخی پَلیدگیریی بَرک وِرَ.

¹⁴ چون اَمه بَموستیمون کن شریعت روحانیَه، ولی اَز جسمانیَه اینسانیمَه و هنته وَزییَری شیوار، گِناخی خِرَتَه آبَه ایمَه.

¹⁵ چیرا کن اَز، دِ نِمَموست چِه بَکَمَه، چون اَ چیی کن بَپیمَه، اَنجوم نِمَدا، بَسکَم اَ چیی کن اَیکا بیزاریمَه، اَنجوم آمَدا.

¹⁶ ولی اَگَم اَ چیی کن نِمَپی، اَنجوم دَرِم، پس قِبول بَکَمَه کن شَریعَت چاکَه.

¹⁷ پس اِنتَرَکه، دِ اَز نیمَه کن اَ کاری بَکم، بَسکم اَ، گِناخیَه کن چمن دِلَکارَ.

¹⁸ چون بَموستیم کن چمن دِلَکا، یعنی چمن جندَکی دِلَکا، هیچ چاکَی ایی دَرِ نیَه. اِمی خونِه کن هَر چَنَه چاکَه کارون اَنجوم دوعِه مِیل چمن دِلَکارَ، ولی چَی اَنجوم دوعِه نِمَشا.

¹⁹ چون اَ چاکَه کاری کن اَپیمَه، اَنجوم نِمَدا، بَلکَم بَدَ کاری کن نَپیمَه، یَژَن اَنجوم آمَدا.

²⁰ ایسَه اَگَم کاری بَکَمَه کن نَپیمَه اَنجوم بِدَرِم، پس دِ اَز نیمَه کن اَ کاری بَکَم، بَلکَم چَی اَنجوم آرَدَر اَ گِناخیَه کن چمن دِلَکا دَرِ یَه.

²¹ پس اِم قانونی بَفَهمِسستیم کن وَقتی بَپیمَه چاکی بِکَرم، بَدی دَست آرَسَه.

²² اِمی خونه کن اَز باطِنیکا خدا شَریعَتیکا کیف بَکَم،

²³ ولی دییَرَ قانونی چمن جَندَکی اَعضاکا بَویندیمَه کن اَ، شَریعَتینَه کن چمن عقِل اَی قِبول بَکَی، بَجَنگِستی و بَمن شریعتی گِناخیکا ویلاخنِه، کن چمن جَندَکی اَعضاکا دَرِ.

²⁴ اَخ کن چَنَه بَد بَختَه آدَمی هِستیمَه! کیَه کن بَمن اِم مَردَ جَندَکیکا اَراخِمونِه؟

²⁵ شِکر خدا، چَمَه خداوند عیسی مسیح واسیطنَه! پس اَز اِشتَن عقلینه خدا شَریعَتی وَزییَر بَبیم، اَمّا اِشتَن جندَکینَه گِناخی شریعتی وَزییَریمَه.