رومی کلیسارا نامه 6 - کتاب مقدس به زبان تالشي - گویش مرکزیمَردِ گناخی خونه و زندگی خدا خونه 1 پس چه بِواجَم؟ هَته گناخ کَردِ ایدامَه بِدَرَم تا فیض ایضاف آبو؟ 2 هرگز! اَمه کن گناخی خونِه مَردیمون، چِنتَه بَشامون چَی دِلَکا هَنی زندَگی بِکَرم؟ 3 مَگَم نینَّموست گِردِ اَمه کن مسیح عیسا دِلَکا غسل تَعمیدِمون گتَه، چَی مَردِ دِلَکا تَعمید گَتِمون؟ 4 پس مَردِ دِلَکا تَعمید گَتِه نَه، اَینَه دَفِن آبیمون تا هَتَه کن مَسیح، دَدَ شکوه وجَلالینَه، مَردَاونکا زندَ آبَه، اَمه نی تازَ زندَگی دِلَکا گَل بِژَنَم. 5 پس اَگَم چَی مَردِ شیوارَ مَرگی دِلَکا، بَینَه ایلَه آبَه ایمون، حتما چَی زندَ آبِه شیوار، زندَ آبه کا نی بَینَه ایلَه آبَم. 6 اِمی خونه کن بَموستیمونَه اَ قَدیمَه اینسان کن اَمه بیمون، بَینَه مصلوب آبیمون تا جَندکی گناخ نیفیت آبو و دِ گناخی وَزییَر مَبَم. 7 چون اَ کن مَردَیَه، گناخی دِلَکا رَخِستَیَه. 8 ایسَه اَگَم مَسیح نَه مَردَ ایمونَه، ایمان دارَم کن بَینَه زندَگی نی بَکَمونَه. 9 اَمه بَموستیمون، مسیح مردَاون دلَکا زندَ آبَیه، دِ هرگز نیَمَرد و مَردِ دِ چَی سَریکا اینجاری نیشَه. 10 اِمی خونه کن اَ اِشتَن مَرگینَه، ایکَرَ اوزونیرا گِناخی خونه مَردَ و زندَگی ایکا کن اَ زندَگی بَکَی خِدارا زندَگی بَکَیَه. 11 پس شِمَه نی، پی بَشتَن گناخیرا مَردَ بزنَه، و مسیح عیسا دِلَکا، خِدارا، زِندَ بزنَه. 12 پس مَرزَ گناخ شِمَه فانیَه جَندَکونکا فِرمون بدَرِ، تا چَی خواستَه اونکا ایطاعَت بکَرَ. 13 اِشتَن جَندَکی اَعضا گناخی دَست آنِدَرَ تا نادِرِستی اَساس آبون، بَسکم هِنتَه اَیِنی شیوار کن مَردِ کا زِندَگیرا ویگَردِستَه اینَه، بَشتَن خدا دست آدَرَ تا شمه جَندَکی اَعضا خدا دَستیکا، راستی وسیله آبون. 14 اِمی خونه کن گناخ شِمَه سَردِرِ فِرمون نییَدا، اِمی خاطر کن شَریعَتی بنیکا نیرون بَلکَم فِیضی بِنیکارون. صالِحی وزییَرِن 15 پس چه بِواجَم؟ اِمی خاطر کن شَریعَتی بنیکا نیمون، بَسکم فیضی بِنیکایمون گناخ بکرَم؟ هرگز! 16 مگَم نینَّموست کن وقتی بَشتَن هِنتَه فِرمون اَبَرَ وَزییَرون شیوار، کَسی دست بدَرَم، اَ آدَمی کن اَیکا فِرمون بَبَردیرون، وَزییَر بَبیرون، چِه گناخی وَزییَر، کن چَی آخیر مَردِ یَه، چِه خدا ایطاعَتی وزییَر، کن چَی آخیر صالِح بِحیساب آمِه یَه؟ 17 ولی شکرخدا، هَر چَنَه چیمی بَه نَه، گِناخی وَزییَر بیرون، ولی ایسَه صِدقِه دِلینَه اَ آموجی کا فِرمون بَبَرون کن خدا، شِمَش آدوعَیَه. 18 و شِمَه گناخیکا رَخِستِه نَه، صالِح بِه وَزییَر آبَه ایرون. 19 اَز اینسانی زبانینَه بَشِمنَه گَف بَژَم، اِمی خونه کن اینسانیرون و شمَه جندَک عِجِزَ. هَتَه کن چیمی بَه نَ اِشتَن جَندَکی اَعضا، هنتَه وَزییَری شیوار، ناپاکی و بی قانونی کن روج بَه روج ایضاف آرَبیَه، دَست آدارون، پس ایسَه اَوون صالِح بِه وَزییَریرا آدَرَ کن چَی آخیر قودَّوسیَته. 20 هَنگومی کن گِناخی وَزییَر بیرون، صالِح بِه کا رَخَه بیرون. 21 پس اَموقه، اَ کارونی اَنجوم دوعِه کا کن ایسَه اَوونکا شَرم دارَ، چِه بَرَ ایی بَردِرون؟ اِمی خونه کن اَ کارون اَنجوم دوعِه آخیر مَرگَه! 22 ولی ایسَه کن گِناخیکا رخِستیرون و خدا وَزییَرآبیرون، چَی بَرَ شِمَرا تقدیس بِه اَ، کن آخیر بَسَر زَیرونَه زندَگیرا تَمون آرَب. 23 اِمی خونه کن گناخی مِژد مَرگَه، ولی خدا خَلا، زَیرونَه زندَگی، چَمَه خداوند مَسیح عیسا دلَکارَ. |
@ 2024 Korpu Company