رومی کلیسارا نامه 4 - کتاب مقدس به زبان تالشي - گویش مرکزیاِبراهیم پیغمبر ایمان داشته نه صالح بَحیساب آمه 1 پس اَ چیی ایی خونِه کن ابراهیم پیغَمبَر بَدَست وردِشه، چِه بَبیَه واتِه، اَ کن جندکی لَحاظ، چَمَه بابا بَحیساب آ؟ 2 چون اَگَم ابراهیم اِشتَن اعمالی خونِه صالح بَحیساب آمَه بَه، ایفتخار کَردِرا ایی چیی ایی دارییَه؛ ولی نِه خدا وریکا. 3 اِمی خونه کن توراتیکاشون چِه نوشتَه یَه؟ «ابراهیم بَه خدا ایمانِش وَردَ و اِم، چَیرا صالح بِه، بَحیساب آمَه.» 4 ایسَه اَ کن کار بَکَی، چَی مِژد چَی حَقَّه، نِه کن خَلا. 5 ولی اَ کن کاری نیَکَرد، بَلکَم خِدایی سَر توکل بَداشتی کن بی خدا اون نی صالح بَحیساب بوعَردی، چَی ایمان چَیرا صالح بِه، بَحیساب آ. 6 هَته کن داوود پادیشا نی، اَ کَسی کن خدا، بَی بیدون اَعمال صالح بَحیساب بوعَردی خَسمَند بَموستی، و باتیَه کن: 7 «خَشی اَیِنی حالیرا کن چَوون خَطا اِنِشون بخشِستَه و چَوون گِناخِنِشون پوشامنییَه. 8 خَشی اَ کَسی حالیرا کن خداوند چَی گِناخی چَی حیساب نییَنا.» 9 مگَم اِم خَسمَندییَن، تاکَه اَیِنیرا اَ کن سِنَت بَه این، یا اَیِنیرا کن سِنَت بَه نینَّه را نی، هِستَه؟ چون واتِمونَه کن ابراهیمی ایمان داشته چَیرا صالح بِه بَحیساب آمَه. 10 پس چِنتَرَ چَیرا بَه حیساب آمَه؟ اَموقه کا کن سِنَت آبَه بَه، یا چَی بَه نَه؟ اَلبَت کن سِنَت آبِه کا بَه نَ بَه، نِه چَی بَه دوملَه. 11 ابراهیم سِنَت کَردِ نِشونَش ویگَتَه تا چَی صالح بِه را موهری ببو، کن سِنَت بِه نَه، و ایمان داشتِه خونه چَی نَصیب آبَه. اِنتَرَکِه، اَ گِردِ اَیِنی کن بی اِمکن سِنَت بِبون ایمان بوعَردینَه، دَدَ یَه، تا اَیِن نی صالح بَه حیساب بان. 12 و ابراهیم سِنَت آبه اون دَدَ نی هِستَه، یعنی اِیِنی دَدَ کن نِه تاکَه سِنَت بَه اینه، بَلکَم ایمانی راکا گَل بَژَنِن، هَه راکا کن چَمَه دَدَ ابراهیم نی سِنَت بِ بَه نَ، گَل اَژَنیَه. خدا وَعدَ ویگِتِه ایمان داشتِه واسیطه نَه 13 چون شَریعَتی راه نَه نِبَه کن ابراهیم و چَی اودمیشون وَعدَ دوعَه کن دِنیا واریث بَبینَه، بَسکم اَ صالِح بِه راهکا اَ، کن ایمان داشتِه سَردِرِ آمبَستَه. 14 چون اَگَم اَیِنی کن شَریعَتیکا پیرَوی بَکنَه وارِث بِبون، ایمان داشتِه دَدار آرَبن و وَعدَ هیچ بَرَش. 15 اِمی خونه کن شریعَت خدا غَضَّبی بوعَردی؛ ولی جِگا ایی کا کن شَریعت نیَه، شَریعَتی چاکِنِستِه نی نیَه. 16 اِمی خاطِر، وَعدَ، ایمان داشتِه واسیطَنه آ، تا فیضی سَردِرِ آمبَست ببو و ابراهیمی گِردِ اودومیرا ضیمانت ببو، یعنی نِه تاکَه اَیِنیرا کن شَریعَتیکا ایطاعَت بَکَن، بَلکَم اَینیرا کن ابراهیمی ایمانیکا ایطاعت بَکنَه نی هِستَه، کن چَمَه گِردی دَدَیَه. 17 هَتَه کن کیتاو توراتیکا نِوِشتَه آبه یَه کن: «اَز بَتِه خَیلی قامون دَدَ آکَردَمَه.» وخِدا چَمیکا اِنتَرَ نی هِستَه، خِدایی کن ابراهیم بَش ایمان وردَ، کن مَردَاون زِندَ آرَکَرد و اَ چییِنی کن وِجودِشون نییَه هَستی آرَدا. 18 اَ جِگاکا کن هیچ اومیدی نِبَه، ابراهیم اُمید داشتِه نَه باوَرِش کردَ کن خَیلیون دَدَ آبو، هَتَه کن بَشون واتَه بَه کن: «اِشتِه اودوم اِنتَرَ بَبیَه.» 19 اِبراهیم اِشتَن ایمانیکا سِست آنِبَه، اَموقه کن اِشتَن مَردَ جَندَکی دَرَدِسی، اِمی خونِه کن حِدودِ صَد سال داری و سارا رَم نی خِشک آبَه بَه. 20 ولی اَ خدا وَعدَ سَر، بی ایمانی خونِه چیمه میمَه نِکَردِشَه، بَلکَم ایمانیکا قودور آبهَ، و خِداش شکوه و جلال داشَه. 21 اَ موطمئِن به کن خدا بَشایَه اِشتَن وَعدَ وفا بکَرِ. 22 هِمی خونِه، چَی ایمان داشته «چَیرا صالح بِه، بَحیساب آمَه.» 23 ولی اِم گَف کن «چَیرا بَحیساب آمَه»، تاکَه ابراهیمیرا نِوِشتَه آنِبَه 24 بَسکَم چَمَراشون نی نوشتَه یَه، تا چَمَرا نی بَحیساب با، اَمه کن بَی ایمان دارَم کن چَمَه خِداوندَ عیسی، مَردَاون دلَکاش زندَ آکَردَ. 25 اَ کن چَمه گِناخون خونِه مَرگی تَسلیم آبَه و چَمَه صالح بَحیساب آمِه خونِه، مَردَاونکا زندَ آبَه. |
@ 2024 Korpu Company