رومی کلیسارا نامه 3 - کتاب مقدس به زبان تالشي - گویش مرکزیخدا وفادارَ 1 پس یَهودی بِه فایدَ چِه چیَه؟ ویا سِنَت بِه را چِه اَرزِشی هِستَه؟ 2 خَیلی، هَر لَحاظیکا. اَوَل اِمکن خدا کَلام، یَهودیون دَست اَمانَتِشون دوعَه یَه. 3 اَگَم بَعضی اَوونکا اَمین نِبینَه، چِه پی واتِه؟ چَوون وَفادار نِبِه، خداوندی وَفاداری هیچ آرَکَرد؟ 4 هرگز! حتی اَگَم گِردِ آدَمِن دِرو اَواج بِبون، خدا راستَه واجَه! هَتَه کن داوودی کیتاو مَزموریکا نِوِشتَه آبَه یَه کن: «اِمی خاطِر، وَقتی گَف بَژَش راست باتیش، و وقتی دیوون بَکَش، اِشتِه دیوون کَردِ دِرِستَه.» 5 ولی اَگَم چَمَه ناراستی خدا راستی دیار آرَکَرد، پی چِه واتِه؟ مگَم خدا ظالیمَه اَموقه کن چَمَه سَر غَضَّب بَگَتی؟ اَز اینسانی شیوار گَف بَژَم. 6 هرگز، اِمی خونه کن اَموقه خدا چِنتَرَ اَشایَه دِنیا سَر دیوون بکَرِ؟ 7 «ولی اَگَم چمن دِرو واسیطَنه خدا حَییقَت ویشتَر شِکوه جَلال بَگَتیَه، دِ چیرا اَز هِنتَه ایلَه گِناخکاری شیوار مَحکوم بَبیمَه؟» 8 و چیرا نِواجَم کن: «بِرَ بدی بِکَرَم تا چاکی بِوجود با»؟ هَتَه کن بَعضیِن چَمَه سَردِرِشون بوهتون ژَیَه، و ایدعا بَکَن کن اَمه اِنتَر باتیمون؟ چَوون مَحکومییَت عادیلانَه یَه. هیچ کس صالِح نیَه 9 پس پی چِه واتِه؟ مَگَم چَمَه یَهودیون وَضع غَیرِ یَهودیون کا بِیتَرَ؟ نِه، اصلا! اِمی خونه کن چیمی بَه نَ ایدعامون کَردَیه کن گِرد، یهود و غَیرِ یَهود، هَر دِ گِناخی باری بِنی کاینَه. 10 هَتَه کن موقدسَه نِوِشتَه اون دلَکا نوشتَه آبَیَه: « هیچ کَم صالح نییَه، حتی ایی نفر. 11 هیچ کم اَفَم نیَه، هیچ‌کَم خدا دوملَه نییَگَردِست. 12 گِردی خِداشون پِشت آکردَیه. اَیِن یَندِنَه دَدارَ راهون دوملَه شَه این. نیکوکاری نیَه، حتی ایلَه.» 13 «چَوون لوک هنتَه ایلَه آج آبَه قَوری شیوارَ؛ و اِشتَن زونی، گول ژِ را کار بَگَتین.» «اَفعی زَهر چَوون لِوی بِنیکارَ؛» 14 «چَوون گَو نفرین و تِلَه گَفی نَه پَتلَمَه یَه.» 15 «چَوون لِنگِن خون ویکَردِ را تاویستَه اینَه؛ 16 هَر جِگا ایرا بَشینَه، ویراوِنِستِه و سیا بَختی جِگا بَنان، 17 و اَیِن صلح و سَلامَتی راه آنینَّموست.» 18 «چَوون چَمی دِلَکا خدا تَرس دَرِ نی.» 19 ایسَه بَموستیمون اَ چیی کن شَریعَت باتیَه اَیِنی را یَه کن شَریعَتی بِنی کاینَه و تا هَر گَویی دَبَستَه آبو و گِردِ دِنیا خدا نَکا جواب پس آنَّدا. 20 اِمی خونه کن هیچ اینسانی نیَه کن شَریعَتی اَعمالی اَنجوم دوعِه خونه، خدا چَمیکا صالح بَحیساب با، اِمی خونه کن شَریعَت، گَناخی اَوون آمونِه. خدا صالِح بِه، ایمان داشتِه راه کا 21 ولی ایسَه شَریعَتیکا تاکَه، اَ صالح بِ ایی کن خدا کارَ اَیر آبَه، هَتَه کن شَریعَت و پَیغَمبَرِن چَیرا شاهیدی دَرِن. 22 اِم صالح بِه کن خِداکارَ، عیسای مَسیح کا ایمان داشتِه راه نَه، گردِ اَیِنی نَصیب بَبیَه کن ایمان بوعَرِن. اِمی خونه کن هیچ فرقی نیَه. 23 اِمی خونِه کن گِرد، گناخِشون کردَیه و خدا شکوه و جلالی نَکا کم بوعَردین. 24 و خدا فِیضینَه، کن هنتَه ایلَه خَلا شیوارَ و اَ آزادی بَها واسیطَنَه کن مَسیح عیسا دلَکارَ، صالح بَه حیساب آن. 25 خدا، عیسی مسیحِش هِنتَه گِناخون کَفارَ شیوار آناشَه، اَ کَفّارَ کن چَی خونیَنه و ایمان داشته را کا بِدَست آ. اِم، خدا عیدالَتی آمونِستِه خونه بَه، اِمی خونه کن اَ اِشتَن ایلاهییَه صَبرینَه، اَ گِناخِنی کن چیمی بَه نَه ایتفاق دَگِنِستَه به، نِدیدِش گَتَه. 26 اَ اِنتَه کَردِشَه تا اِشتَن عیدالَتی اِم زَمونَه دوورَکا آمونِه، تا اِشتَن عادیل ببو و اَیینی کن عیسی کا ایمان بَداشتینَه گرد، صالح بَحیساب بان. 27 پس دِ چَمه ایفتخار کردِ، چِه چییَه؟ هیچ ایفتخاری نییَه! چه حیسابینه؟ شَریعَتی اَعمالینه؟ اَلبت کن نِه، بَسکم شریعَتیکا ایمان داشته نَه. 28 اِمی خونه کن اَمه ایتقاد دارَم کن اینسان بی اِمکن شَریعَتی اَعمالی اَنجوم بدَرِ، ایمان داشتِه نَه صالح بَحیساب آ. 29 مَگَم خدا تاکَه یَهودیون خدا اَ؟ مگَم غَیرِ یَهودیون خدا نیَه؟ اَلبَت کن اَ غَیرِ یَهودیون خدا نی هِستَه. 30 اِمی خونِه کن تاکَه ایلَه خدا وِجود بَداشتی، و اِم خدا، اَیِنی کن سِنَت آبَه اینَه ایمان داشتِه سَردِرِ و اَیِنی کن سِنَت آبَه نینَّه نی هَه ایمان داشتِه سَردِرِ، صالح بَحیساب بوعَردیَه. 31 پس مَگَم اَمه اِم ایمان داشتِه نَه، شریعتی نیفیت بَکَمون؟ اَلبَت کن نِه! بَلکَم اَمه شریعَتی آمبَست بَکَمون. |
@ 2024 Korpu Company