رومی کلیسارا نامه 2 - کتاب مقدس به زبان تالشي - گویش مرکزیخدا عادیلانَه دیوون 1 پس تِه اَی اینسانی کن دییَری دیوون بَکَش، هَر کَسی بِبی هیچ رِقی نِداری. چون وقتی کن ایی نَفری دیوون بَکَشَه، بَشتَنِر مَحکوم کَردَرَ؛ چون تِه اَی دیوون اَکَر، تِه نی هَه کاری اَنجوم بَداشَه. 2 اَمه بَموستیمون کن، خدا دیوون کردِ، اَیِنی سَر کن اِنتَرَ کارون بَکَن، حَقَّه. 3 تِه اَی اینسانی کن دییَرَ کَسون سَردِرِ دیوون بَکَشَه و اِشتَن هَه کاری اَنجوم آشَدا، گَمون بَکَشَه کن خدا دیوون کَردِکا بَشَه وَشت؟ 4 یا اِمکن خدا مِرَبانی، تَحَمُلی و چَی یاله صبری گِچ بَحیساب بوعَردیش و نیشَموست کن خدا مِرَبانی اِمی خاطِرَ کن بَتِه توبَه کَردِرا بِبَرِ؟ 5 ولی تِه اِشتِه سرختی و اِشتِه دلی خونه، کن نَپیشَه توبَه بکَرِ، خدا غَضَّبی اِشتَنرا، غَضَّبَه روجیرا جَم آشَکَرد، اَ روجیرا کن چَی دِلَکا خدا عادیلانَه دیوون کردِ دیار آرَبن. 6 خدا «هَر کَمی، چَی اِشتَن کردَ کارون اَندازَ جَزا آرَدا.» 7 خدا، زَیرونَه زندَگی اَیِنی آرَدا کن، چاکَه کارون اَنجوم دوعه کا صَبرینَه، شکوه و جلال و حورمت و زَیرونَه زندَگی دوملَه این؛ 8 ولی یالَه نارِن و اَیِنیرا کن حَییقَتیکا ایطاعَت نینَّکرد، بَسکَم نادِرِستیکا ایطاعَت بَکَنَه، آسرَنگِستِه و غَضَّب ویرَکَرد. 9 هرکَم کن بَدَ کارون اَنجوم بدَرِ، رنج و عَذاب چَی رسَت آرَب، اَوَلیکا یَهود و چَی بَه دوملَه غَیر یهود. 10 ولی اَیِنی کن چاکی بَکَنه، خدا شکوه و جَلال و حورمت و صلح و سلامتی چَوون رَسَت بَبیَه، اَوَل یهود و چَی به دوملَه غَیر یَهود 11 اِمی خونِه کن خدا فَرق نیَه نا. 12 چون گِردِ کَسِنی کن بی موسی شَریعَت گِناخ بَکَنَه، بی شَریعَت نی نیفلَه آنَّب؛ و گِردِ اَیِنی کن شَریعَتی بنیکا گِناخ بَکَن، شَریعَتینَه دیوون بَبینَه. 13 چون اَیِنی کن تاکَه شَریعَتی دَنَّرَست خدا نَظَریکا صالِح نینَّه، بَسکَم اَیِنی صالِح اینَه کن شریعَتی اَنجوم دَرِن. 14 چون وقتی غَیرِ یَهودییِن کن شَریعَت نیشونَه، شَریعَتی اَعمالی اِشتَن غَریزَ واتَنَه اَنجوم دَرِن، اَیِن با اِمکن شِریعَتِشون نییَه، ولی اِشتَن اِشتَنرا شَریعَتینَه. 15 چون اَیِن آمونِن کن شَریعَتی اعمال چَوون دِلیکا نِوِشتَه آبَه یَه، هَتَه کن چَوون وِوژدان نی اِمی شاهیدی دَرِ، اِمی خونه کن چَوون فکرِن یا اَوون محکوم بَکَی یا حتی تَبرَعَه بَکَیَه. 16 اِم، اَ روجیکا ایتفاق دَرَگِنِست کن خدا اَ اِنجیلی واتَنَه کن اَز اییلام بَکَم، اینسانون نونَکِه رازون عیسای مَسیح واسیطَنَه نَه دیوون بکَرِ. 17 ایسَه، تِه کن بَشتَن یَهودی بَموستیش و شَریعَتیکا پِشت آدوعَرَ و اِمی خاطِر کن خدا آشَموست، اِشتَنرا ایفتخار بَکَش، 18 تِه کن چَی ایرادَ بَموستیش و اِمی خونِه کن شَریعَتیکا آموج گَتَرَ، چاکَه چیون اینتخاب بَکَش، 19 و اِطمینانِرَ کن ناوینااون راهنما و ظِلَماتیکا اَنِشون نوریشَه، 20 و جائیلون مربی و خِردَنون موعَلیمیش، تِه، شریعَتی کن، اَلمندی و حَییقَتَه هِستِرَ، 21 پس تِه کن دییَرَ کَسون آموج آشَدا، بَشتَن آموج نیشَدا؟ تِه کن پِتارِستِه زِرَبَرا موعیظَه بَکَشَه، تِه اِشتَن پِنیشَه تارِست؟ 22 تِه کن باتیشَه زینا مَکَه، تِه اِشتَن زنا نیشَکَرد؟ تِه کن بُتونکا نیفرَت بَداشتیش، تِه مَعبَدون پِنِتاری؟ 23 تِه کن شَریعَتی داشتِه خونِه ایفتخار بَکَش، تِه شَریعَتی چاکِنِستِه نَه خدا بی حُرمَتی نیشَکَرد؟ 24 چون هَتَه کن پَیغَمبَرون کیتاویکا نِوِشتَه آبَه یَه: «شِمَه خونِه، غَیر یَهودیون دَلَکا خدا نومی کِفر باتینَه.» 25 سِنَت کَردِ اَموقِعی ارزش بَداشتی کن شَریعَتی اَنجوم بدَرَ، ولی اَگَم شریعتی بچاکنَه، اِمی شیوارَ کن سِنَت بَه نیرون. 26 پس اَگَم اَیِن کن سِنَت بَه نینَّه، شَریعَتی واتَه چییون اَنجوم بِدَرِن، مَگَم سِنَت آبَه کَس، بَه بَحیساب نان؟ 27 پس اَ کن جَندَکیکا سِنَت بَه نی، اَمّا شَریعَتی غَم بَردی، بَتِه مَحکوم بَکَیَه، بَتِه کن نِوِشتَه آبَه حِکمون و هِم سِنَت بِه داری، ولی خدا شَریعَتی پا بِن بَناشَه. 28 چون یَهودی اِم نییَه کن بَه ظاهیر یهودیی آبو و سِنَت بِه کاریی نییَه کن ظاهیری و جَندَکیکا ببو. 29 بَسکم یَهودی هَیَه کن باطِنیکا یَهودی ببو و سِنَت بِه نی، صِدقَه دِلَه کارییَه، کن خدا روح اَی اَنجوم دَرِ، نِه اِم کن ایلَه نوشتَه واسیطَنَه. اِنتَرَ اینسانی، خدا بَی تَریف بَکَی، نِه آدَمِن. |
@ 2024 Korpu Company