رومی کلیسارا نامه 16 - کتاب مقدس به زبان تالشي - گویش مرکزی

سلام و درود

¹ چَمَه خالا فیبی سیفارشی بَشمَه بَکَم. اَ شَهرِ کِنِخریَه کِلیسا پاسَریونکارَ.

² بَی خداوندی دِلَکا، اَتَه کن موقدَسون لایِقَه، قِبول بکَرَ و هر کمکی کن شِمَکا اَپیشَه اَیکا دَریغ مَدارَ، اِمی خونِه کن اَ خَیلیون، حتی بَمن، وِرَ کاریَری آدوعَشَه.

³ پْریسکیلا و آکیلا، چمن همکارِن مسیحْ عیسی دِلَکا، سلام بِدرَ.

⁴ اَیِن اِشتَن جانی چمن خونِه خَطَریکا دَرَفَندِشون، و نِه تاکَه اَز، بَلکَم گِردِ غَیرِ یَهودیون کِلیسا اِن اَوونکا تَشکُر بَکَن.

⁵ هِنتَرَکِه کِلیسا ایی کن چَوون کَکا یندِنَه جَم آنَّب، سلام بدرَ. چمن خاجَتیَه رِفِق اِپینِتوسی سَلام آدَرَ، اَ، اَیِنیکا کن آسیا دِلکا ایمان وَردَشونَه، اولین نفر بَه.

⁶ مَریَمیرا کن شِمَرا وِرَ زحمَت کَشتِش، سلام بِدرَ.

⁷ چمن خیشون، آندرونیکوس و یونیاسی کن بَمِنَه زیندانیکا بینَه، سَلام بدرَ. اَیِن رَسولون دِلَکا، سرشناسین کن بَمِنکا بَه نَ مَسیح کا ایمان دارینَه.

⁸ چمن خاجَتییَه رَفِق خداوندی دِلَکا، آمپْلیاتوسی سلام بدَرَ.

⁹ مَسیح دِلَه هَم کارون اوربانوسی، و چمن خاجَتیَه رَفِق، اِستاخیسی، سَلام بدَرَ.

¹⁰ آپِلیسی کن اِشتَن ایمتحانی مَسیح دِلَکا پس آدوعَشَه، سلام بدَرَ. آریستوبُلوسی کَه آدَمون سلام بِدرَ.

¹¹ چمن خیش هیرودیونی و نارکیسوسی کَه آدَمون کن خِداوَندیکا هِستین، سلام بدرَ.

¹² تْریفینا و تْریفوسا، اَ پاسَرییِنی کن خداوندی خیدمتی دِلَکا زَمَت بکَشتین سلام بدرَ، و چمن اَیلَه خاجَتیَه رَفِق پِرسیسی، کن خداوندیکا بَرک زَمت بَکَشتی، سلام بدَرَ.

¹³ روفوسی کن خِداوَندیکا اینتخاب آبه یَه، و چَی نَنَه کن چمن حَقیکا نی نَنَه گیری کَردَشَه، سلام بدرَ.

¹⁴ آسینکْریتوس، فْلیگون، هِرماس، پاتْروباس و هِرمِس و دیَرَ برا اِنی کن اَوونَّه مَندینَه، سلام بِدرَ.

¹⁵ فیلولوگوس، یولیا، نیریاس و چَی خالا و اولیمپاس و گِردِ موقدّسینی کن اَوونَّه دَرِ اینَه، سلام بدرَ.

¹⁶ یَندِ موقدَسه ماچینِه نَه سلام بِدرَ. مَسیح کِلیسا اِن گِرد، بَشِمَه سلام باتین.

آخِرین سیفارش

¹⁷ برا اِن، بَپیمَه شِمَکا خاشتو خاز بِکَرِم، اَیِنی کا کن جِدایی دَنَّفَند هواسِرون ببو، شِمَه راه دِلَکا مانِع بَنان و آموجینَه کن شِمَه گَتَرونَه مُخالیفَت بَکَنَه، اَوونکا رَت آبَه،

¹⁸ اِمی خونه کن اِنتَرَ آدَمِن چَمَه خداوند مسیح خیدمَت نینَّکرد، بَسکَم اِشتَن اِشکَمشه فکریکان و خاصه گَفینَه و چاپلوسینَه سادَ آدَمون گول بَژَن.

¹⁹ شِمَه فِرمون بَردِ تَریف گَردی دِلَکا گَه به گَه آبَه یَه؛ شِمَه خونِه را وِر خَشیمَه. ولی بَشِمَکا اَپیمَه اَ چیی ایی ناریکا کن چاکَه، اَلمَند، و اَ چیی ایی ناریکا کن بَدَ، سادَ بِبَه.

²⁰ صلح و سلامَتی خدا، خَیلی زو شَیطونی شِمَه لِنگون بنیکا لِرت آرَکَرد. چَمَه خداوند عیسی فِیض شِمَنَه دَرِ ببو.

²¹ چمن همکار تیموتائوس بَشِمَه سلام دَرِ. چمن خیشِن، لوکیوس، یاسون و سوسیپاتِر نی شِمَرا سَلام دَرِن.

²² اَز، تِرتیوس، اِم نامَه اَنِوِس، خداوندی دِلَکا بَشِمَه سلام باتیم.

²³ گایوس کن بَمنکا و اِم جِگا کِلیسا آدَمون گِردیکا مِیمان نوازی کَردشَه، شِمَرا سلام دَرِ. اِراستوس کن شهری خَزانَه دارَ، و چَمَه برا کوآرتوس شِمَرا سلام دَرِن.

²⁴ و چَمَه خداوند عیسای مَسیح فِیض شِمَه گِردینَه ببو. آمین».

²⁵ ایسَه اَ کن بَشایَه چمن اِنجیل و عیسای مسیح موعِیظَه واتَنَه، بَشِمَه آمبَست آکَرِ، یعنی هنتَه ایلَه نونَکه رازی کن دیار آبَه، کن خَیلی وقت بَه نون بَه.

²⁶ اَمّا ایسَه پَیغَمبَرون نِوِشتَه اون واتَنَه، و زَیرونَه خدا حِکمینَه، گِردِ قامونرا دیار آبَه تا اَیِن ایمان بوَعن و ایطاعَت بِکَن،

²⁷ اَ کن تاکَه اَلمَندَ خِدایَه، عیسای مَسیح واسیطَنَه زَیرونَه شکوه و جلال ببو! آمین.