رومی کلیسارا نامه 15 - کتاب مقدس به زبان تالشي - گویش مرکزی1 اَمه کن قودوریمون، پی عِجِزون تحمل بِکَرَم و اِشتَن خَشی دوملَه نِبَم. 2 هر کِرَم اَمَکا پی هر چاکَه چیی ایی کن اِشتَن خَمسوعَه کا بَویندییَه، بَی خش آکرِ تا چَی ایمانی زبق بدَرِ. 3 اِمی خونه کن مسیح نی اِشتَن خَشی دوملَه نِبَه، هَتَه کن داوودی مزموریکا نِوِشتَه آبَه یَه: «اِشتِه چَمای اَکرون چمای، چمن سَر ویرمَه یَه.» 4 چون هر چیی ایی کن گِذِشتَکا نِوِشتَه آبَه یَه، چَمَه آموجیرا بَه تا آمبست گیری نَه و اَ دِلگَررمیی کن موقدسَه نوشتَه اَمه بَبَخشِستی، اُمید بِدارَم. 5 ببو کن، خدایی کن آمبست گیری و دلگرمی آرَدا، بَشمَه عَطا بکَرِ تا هته کن مَسیح عیسا خواستَنَه جورَ، یندِنَه مودارا بکرَ، 6 تا یَندِنه یَکدل و یَک زبان، چَمَه خداوند عیسای مَسیح دَدَ، یعنی خدا پرستش بکَرَ. 7 پس هَته کن مَسیح بَشِمَه قِبول کَردِشَه، شِمَه نی یَندِ قِبول بکَرَ تا خدا شکوه جَلال بدَرَ. 8 چون بَشِمَه باتیمَه کن مَسیح، خدا راستی آمونِستِه را سِنَت آبَه اون پاسَری آبَه تا اَ وَعدَ اونی کن خدا چَمَه بابا اون آدوعَش بَه، تایید بکرِ، 9 و تا غَیرِ یَهودییِن، خدا چَی رَحمَتی خونِه شکوه و جلال بدرِن. هَتَه کن موقدسه نوشته اونکا نِوِشتَه آبَه یَه: «اِمی خاطِر، اِز بَتِه یهودیون دِلَکا ستایش بَکمَه، و اِشتِه نومی کا آواز بَخَندیمَه.» 10 هَنی باتی: «اَی غَیر یهودییِن، چَی قامینَه خَش بِبَه!» 11 و هَنی کیتاو مزموریکا باتی: «اَی گِردِ غَیر یَهودییِن، خداوندی ستایش بکَرَ! ببو کن گِردِ میلَّتِن، بَی شکوه و جلال بدَرن!» 12 و ایکَرَ دییَر اِشَعیای پیغمبَر نی باتی: «یَسا ریشَه بومَیَه، کَسی کن غَیر یهودیون سَر حِکم کَردِرا راست آرَبن؛ غَیر یهودییِن بَی اُمید بَداشتینَه.» 13 ببو، خِدایی کن اومید دَرِ، بَشِمَه خَشیکا و صلح و سلامتی ایی کن ایمانی دِلَکا اَ، پتلَمه بکَرِ، اَنَه کن خدا موقدسَه روح خِنَرینَه، اُمیدیکا کوکورو پَتلَمَه بِبَه. پولوسی خیدمت غیریهودیونرا 14 چمن برا اِن، اَز اِشتَن شمَکا خاطر جَمیم کن شِمَه اِشتَن چاکیکا پتلمَه ایرون، و بَرک اَلمندیرون و بشارون یَندِ آموج دوعِه. 15 ولی چن گلَه موضوع خونه، بَرک جیسارَت کَردِمَه،و شِمَرا نِوِشتِم، تا اَوون شِمَه یاد آرَفَنم اِمی خونِه کن خدا اِم فِیضی بَمن بَخشِستَشَه، 16 کن غَیرِ یَهودیونرا، مَسیح عیسی وزییَر بِبوم و خدا اِنجیلی خیدمت کَردِ خونه کَاهن ببوم، تا غَیرَ یَهودیِن چَاکَه خَلایی خدا دَرگارا بِبون کن خدا موقدسَه روح نَه تقدیس بَیَه. 17 پس اَز مسیح عیسا دلَکا اِشتَن اِم خیدمَتی خونه کن خدا را بَکَم، دلیلی ایفتخار کَردِرا بَداشتیم. 18 اِمی خونه کن جورئَتِم نِکردَ غَیراَز اَ چییی ایی کن مسیح چمن واسیطنَه اَنجوم دَرِ، چیی ایکا گَف بِژَنِم، تا غَیر یهودیون، چمن گَفِن و کارون واسیطنَه، ایمان داشتِه را فِرمون آکَم، 19 اَ اِمش، نِشونَه اون و مُعجیزَ اون اینجاری نَه، یعنی خدا روح خِنَرینَه اَنجوم دوعَشَه، هته کن اورشَلیمیکا تا شهر ایلیریکومیرا شیم، و مَسیح اِنجیلی خیدمتی کامیل اَنجوم آدامَه. 20 اوزون چمن طَمارزو اِم بَه کن جِگا اییکا اِنجیلی موعیظَه بکَم کن مَسیح نومِشون درَستَه مَبو، تا نِکَر دییرَ کَسی هیمی سَردِرِ، بنا سی آکَم، 21 هَتَه کن اِشعَیای پَیغمبَری کیتاویکا نِوِشتَه آبَه یَه کن: «اَیِن کن اَیکا بی خَبر بینَه، بَویندینَه و کَسِنی کن دَرَستشون نِبَه، بَفَهمِستینَه.» 22 هِمی خونِه، چَن کَرَ اَپیم بَه شمَه وَر بام ولی نِبَه. 23 ولی ایسَه کن اِم منطَقَه اونکا، دِ جِگایی چمن کاریرا مَندَ نی، و اِمی خاطِر کن درازَ سالیاریَه اِشتیاق دارِم شِمَه وَر بام، 24 اُمید بَداشتیم وقتی اِسپانیارا بَشیم چمن راه سَریکا بَشمَه بوینم، تا تلَکَه ایی شمَه ویندِ بَه دوملَه، بَمن، چمن سَفرکردِ اَجِگارا کاریَری بدَرَ. 25 ولی ایسَه بَپیمَه اورشَلیمیرا بِشوم تا اَ جِگا موقدسونرا کمک مالی بِبَم، 26 اِمی خونه کن مقدونیه و اَخائیه کِلیسا اِن بَپیشون کن اورشَلیمی دَس دَریسَه موقدسونرا کمک مالی گِرد آکَن. 27 اَیِن اِشتَن بَپیشون اِم کاری بکَن؛ و حَییقتا کن اَیِن اورشَلیمی ایماندارون مَدیون بینَه، اِمی خونِه کن اَگَم غَیرِ یهودیِن، یَهودیونَّه روحانیَه برَکَتونکا شَریک آبین، یهودییِن نی پی مالییَه برَکَتونَّه، اَوون خیدمَت بِکَن. 28 پس، وَقتی کن اِم کاری اَنجوم بِدَرِم و اَ چیی ایی کن جَم آبَه یَه اَوون آرَسونِم، شمَه راه نه اِسپانیا را بَشیم. 29 بَموستیم کن وَقتی شِمَه وَر بام، مَسیح فِرَوونَه بَرَکتینَه بومَمَه. 30 اَی برا اِن، چَمَه خداوند عیسای مَسیح و موحبتی کن خدا موقدسَه روح دلَکارَ، خونه، بَشِمَکا خاشتو خازِمَه کن خدا دَرگاکا مِرا دِوا بکَرَ، و اِم کارینَه چمن خیدمتیکا شَریک بِبَه. 31 تا یَهودیَه بی ایمانون بالیکا سَقَه جان بَرشوم و چمن خیدمَت موقدَسونرا، اورشَلیمی خونه، قِبول ببو. 32 چَی به دوملَه خدا واتنَه خَشینَه شِمَه وَر بام تا شِمَه وَریکا تازَ جان بیگِم. 33 خدا صلح و سَلامتی ، شِمَه گَیردینَه دَرِ ببو. آمین. |
@ 2024 Korpu Company