رومی کلیسارا نامه 14 - کتاب مقدس به زبان تالشي - گویش مرکزی

یَندِ قیضاوت نِکرَ

¹ کَسی کن چَی ایمان ضَعیفَه، اِشتَن جمعیکا راه بدَرَ، ولی نِه اِمی خونه کن چَی عَقیدَ اون خاطر بَینه گَه بَه گَه بدَرَ.

² ایی نَفَری ایمان بَی ایجازَ آرَدا تا هَر غذایی بَرِ، ولی دییَرَ کَس عِجِزَ و تاکَه سبزیجات بَردی.

³ اَ کن هَمَه چیی بَردی نِبایَد اَکَن گِردِ چییون نییردِن گِچ آکَرِ؛ و اَ کن هَمَه چیی نییَردِن نِباید اَ کن گِرد چیی اون بَردی قیضاوت بکَرِ. اِمی خونه کن خدا بَش قبول کردَیه.

⁴ تِه کیشَه کن دییَری پاسَری سَر قیضاوت بَکَش؟ چَی آمبَست مَندِ یا ویگِنِستِه ایمانیکا، چَی اَربابی مَربوطَه. و اَ، آمبَست نی بَمَندیَه چون خداوند بَشایَه اَی آمبَست آکَرِ.

⁵ ایی نفر، ایلَه روجی دییَرَ روجونکا چاکتَر بَموستی؛ ولی دییرَ کَس گِردِ روجون ایی جور بَموستی. هَر کَم پی اِشتَن فِکریکا اِشتَن عَقیدَاون خونه، خاطر جَم ببو.

⁶ اَ کن ایلَه موهیمه روجی ایحترامی غَم بَریدیَه، خداوندی ایحترامیرا اِنتَرَ بَکَی. اَ کن بَردی، خداوندی ایحترامیرا بَردی، اِمی خونِه کن خدا شِکر باتی، و اَ کن نییَرد، اَ نی خداوندی ایحترامیرا اِنتَرَ بَکَیَه و خدا شِکر بَکَی.

⁷ اِمی خونه کن هیچ کِرَم اَمَکا اِشتَنرا زندَگی نِکَرَم و هیچ کِرَم اَمَکا اِشتَنرا نِمِرَم.

⁸ چیرا کن اَگَم زندگی بَکَمون، خِداوَندیرا یَه، و اَگَم بَمَردیمون، اَ نی خِداوَندیرایَه. پس چِه زندَگی بِکَرَم، چِه بِمِرَم، خداوندی شِنیمون.

⁹ اِمی خونه کن مسیح نی هِمی خاطر مَردَ و زِندَ آبَه، تا زِندَ اون و مَردَ اون خداوند ببو.

¹⁰ پس تِه چیرا اِشتَن برا دیوون بَکَشَه؟ و تِه چیرا اِشتَن برا گِچ بَموستیش؟ اِمی خونِه کن گِردِ اَمه خدا دیوون کردِ تختی نَه کا حاضیر بَبیمون.

¹¹ چیرا کن اِشعَیای پیغمبری کیتاویکا نِوِشتَه آبَه یَه: «خداوند باتی: اِشتَن زندَگی سَر قَسَم کن هر زِنگی چمن ناریکا شَت آرَبن و هر زونی بَه خدا ایقرار بَکَیَه.»

¹² پس هَر کِرَم اَمَکا اِشتَن حیسابی، بَه خدا پس آرَدا.

¹³ پس، بِرَ چیمی بَه دوملَه یَندِ قیضاوت نِکَرَم، بَسکم تَصمیم بیگِرَ کن هیچ اَلِسکامونَه سِه ایی یا مانعی اِشتَن برا راکا نِنَرَ.

¹⁴ اَز عیسای خداوندی دلَکا بَموستیمَه و قانع آبَه ایمَه کن هیچ چیی ایی، اِشتَنکا اِشتَنکا جیفینین نیَه. ولی اَگَم کَسی چیی ایی جیفینین باتی، چَیرا جیفینین بَبیَه.

¹⁵ اَگَم اِشتَن هردَ چینَه، اِشتَن برا اَیذَت آشَکَرد، دِ محبَتینَه رفتار نیشَکَرد. اِشتَن هَردَ چیی نَه، اِشتَن برا کن مسیح چَیرا مَردَ، نیفلَه آمَکَه.

¹⁶ پس مَرزَ اَ چیی ایی خونه کن شِمَه بَی چاک بموستیرون، بَد بواجن.

¹⁷ اِمی خونه کن خدا پادیشاهی هَردِ و هِنتِه نیَه، بَسکَم صالِح بِه،صلح و سَلامتی و خدا موقدسَه روح دِلَکا خَشی کَردِ یَه.

¹⁸ هَر کَم اِنتَرَکِه مَسیح خیدمَت بکَرِ، خدا بَی قبول بَکَی و مَردوم نی بَی تاَیید بَکَنَه.

¹⁹ پس بِرَ اَچیی ایی کن صلح و سلامتی و یَندِ ایمانی آمبَست کَردِ باعیث بَبی، دوملَه بِبَم.

²⁰ خدا کاری، هَردَ چی خونِه خَراو آمَکَ! حَییقتن گِردِ هَردَ چیی اِن پاجا اینَه، اَمّا هَر غذایی ایی هَردِ، کن دییَری لِسکیستِه باعیث ببو، نادِرِستَه کاری یَه.

²¹ اِم بِیتَرَ کن گوژد و شَراوی هَردِکا و هَر دییَرَ کاری اَنجوم دوعِه کا کن اِشتِه برا لِسکیستِه باعیث بَبی، رَت آبی.

²² اِشتِه ایمان داشته، اِم موضوعون خونِه، اِشتِه و خدا وَصَطیکا غَم بَه. خَشی اَ کَسی حالیرا کن اَ چیی ایرا کن بَی چاک بَموستی، بَشتن دیوون نیَکَرد.

²³ ولی کَسی کن غذایی هَردِ خونِه چیمَه میمَه بَکَیَه، اَگَم اَی بَرِ محکوم بَبیَه، اِمی خونِه کن ایمان داشته نَه هَردَش نیَه و اَ چیی کن ایمان داشته نَه مَبو، گِناخَه.