رومی کلیسارا نامه 13 - کتاب مقدس به زبان تالشي - گویش مرکزی

صاحیب منصَبونکا فِرمون بَردِ

¹ هَر کَم پی صاحیب منصَبون فِرمون ببو، اِمی خونِه کن هیچ صاحیب منصَبی نییَه کن خدا طرَفیکا آمَه مَبو. صاحیب منصَبِنی نی هِستینه کن خدا طرَفیکا تَیین آبَه این.

² پس اَ کن صاحیب منصَبون زِرَبَرا راست آبو، خدا تَیین کَردَ چیی زِرَبَرا، راست آبَه یَه؛ و اَیِن کن اِنتَرَ بَکَن، دیوون آنَّب.

³ چون اَیِنی کن دِرِست رفتار بَکنه، حاکیمونکا نینَّترسِست، ولی خلاف کارِن اَوونکا بَتَرسِستین. اَپیرَ صاحیب منصَبیونکا مَتَرسی؟ اَ چیی کن دِرِستَه اَنجوم بِدَ کن اِشتِه تَریفی بَکَنَه.

⁴ اِمی خونه کن اَ اِشتِه خِیری خونه خدا پاسَرییَه. اَمّا اَگَم خلافَه کاری اَنجوم بِدَی، بِتَرس، اِمی خونِه کن دَدار شمشیری اِشتَن مینیکا جیبَستش نییَه. اَ خدا پاسرییَه و کسیَه کن خدا خونه تقاص ویرَگت، و خلافکاری سَردِرِ خدا غَضَبّی ویرَکرد.

⁵ پس اینسان پی، نِه تاکَه غَضَبی خونه بَسکَم ووژدانی خاطر فِرمون ببو.

⁶ هِمی خونه را مالیات بَدارون، چون صاحیب منصَبِن اِم چییون کان پاستِه و خدا پاسَری اینَه.

⁷ هَرکَمی حَقی بَی بدَرَ: اَگَم مالیاتَه، مالیات بدَرَ؛ اَگَم خَراجَه، خَراج بدَرَ؛ اَگَم ایحترامَه، ایحترام بِنَرَ؛ و اَگَم حورمتَه، حورمت بکَرَ.

محبتی واسیطنَه شریعتی اَنجوم دوعِه

⁸ هیچ دِینی کَسی کا مَدارَ، جز اِمکن یَژَن یَندِ موحبت بکَرَ. اِمیی خونه کن هَر کم دیَری موحبت بکَرِ، شَریعَتی اَنجوم دوعشَه.

⁹ اِمی خونه کن اِم حِکمِن کن «زینا مکَ»، «آدَم مَکِش»، «مَپِتار»، «طمع مَکَه»، و هر دیَرَ حِکمی کن ببو، گِرد اِم کلامیکا خولاصَه آرَبن کن «اِشتِه خَمسوعَه هِنتَه اِشتَن جانی شیوار، موحبت اَکَن.»

¹⁰ موحبت، اِشتَن خَمسوعَه بَدی نیَکَرد؛ پس موحبت، کامیل شَریعَتی اَنجوم دَرِ.

¹¹ غَیراَز اِم شمَه بَموستیرون کِرَم زَمونَکا زندَگی بَکَرون. ایسَه چَی ساعت آرَستَه یَه کن خاویکا پِبَه، چیرا کن ایسَه اَ زمانی کن ایمان وَردِمونَه مقایسَه کا، چَمَه نیجات گَتِه نِزِک آبَه یَه.

¹² شَوی آخِرَ و روج نِزِکَه. پس بِرَ ظِلَماتی بَدَ کارون کَنار بِنَرَم و نوری زِرِه دَکَرم.

¹³ بِرَ، هَتَه کن روجی رِشونیکا اَمونون شَئنیکارَ دِرِست رفتار بکَرَم. نِه کم، عَیاشی و عَرَقَه هَریکا و زینا، هَرزَگی و ژِژِ و زِرَ کا.

¹⁴ بَلکَم خداوند عیسی مَسیح شخصیَتی، هنته شندِری شیوار دَکَرَ و اِشتَن جندَکی نَفسیرا تدارک مَوینَه تا چَی خواستَه اون اَنجوم بدَرَ.