رومی کلیسارا نامه 12 - کتاب مقدس به زبان تالشي - گویش مرکزیزندَ قربونییِن 1 پس برا اِن، خدا رَحمَتون خونه، بَشِمَکا خاشتو خاز بَکَمَه کن اِشتَن جَندَکون هِنتَه زِندَ قربونی خِدارا، موقدَّس و خدا دل پیستَه، تَقدیم بکَرَ کن اِم شِمَرا روحانَیه عیبادَتَه. 2 و دِ هنتَه اِم دِنیا شیوار مَبَه، بَسکَم اِشتَن فکری تازَ آبِه نَه عَوَض آبَه. اَموقه خدا ایرادَ فَهمِستِه بَشارون؛ خدا دِل پیستَه و کامیلَه ایرادَ. 3 چون فِیضی خونِه کن بَمن عَطا بَه یَه، هَر کِرَمی شِمَکا باتیمَه کن بَشتَن ویشتَر از اَچییی کن هِستیرون، مَزنَه، بَلکَم هَر کَس اَ ایمانی اَندازَ کن خدا بَشِمَه بَخشِستَشَه، دِرِست قیضاوَت بکَرَ. 4 چون هَتَه کن چَمَرا گِردی ایلَه جندک هِستیمون کن وِرَ اَعضاکا سِی آبَه یَه و اِم اَعضا کار یَکسان نیَه، 5 پس اَمه نی کن خَلیی ایمون، مَسیح دِلَکا ایلَه جَندَک هِستیمون و ایلَه ایلَه، یَندِ اَعضا ایمون. 6 فِیضی اَندازَ کن بَمَه بَخشستَه آبَه یَه، موختَلیفَه خَلا اِن ویگَتَمونَه، بِرَ اَوون کار بیگِرَم: اَگَم پیش گویی کردِ اَ، اَی اِشتَن ایمانی اَندازَ اَنجوم بدَرَ. 7 اَگَم خیدمَتَه، خیدمَت کردِرا. اَ کن آموج دَرِ ، آموج بِدَ. 8 اَ کن تشویق بَکَیه، تشویق بکَرِ. اَ کن کمک بکَیه، دستو دیلبازینَه کمک بکرِ. اَ کن رَهبَرَ، اِم کاری غَیرَتینَه اَنجوم بدَرِ. و اَ کن دییَرون سَر رحم و مِرَبانی بَکیَه، خَشینَه اِم کاری بکَرِ. حَییقیَه مسیحیون نوشون 9 موحبَت پی خالیص ببو. بَدیکا رَت آبَه و چاکَه چیکا سَخت آچیکَه. 10 و بِرااون شیوار یَندِ رَی بدارَ. یَندِ ایحترام نوعِه کا، یَندِ نار دَوَزَ. 11 هیچ موقِه شِمَه غَیرَتی خدا خونه ویمَکِشَه؛ روح دِلَکا کولوستار بِبَه و خداوندی خیدمَت بکَرَ. 12 اومیدیکا خَش، و غَرَّ روجونکا صَبور ببَه و اوزون دِوا بکَرَ. 13 موقَدَسَه آدَمون نیازی رَف کَردِ کا سهم بدارَ و مِیمان نواز بِبَه. 14 اَیِنیرا کن بَشِمَه اَیذَت آزار بَکَنَه، برَکت بِپییَه؛ برَکَت بِپییَه و نِفرین نِکَرَ! 15 خَشَه آدَمونَّه خَشی بکَرَ، و اَیِنینَه کن کان بِرَمِستِه، بِبرَمَه. 16 یَندِنَه مودارا بکَرَ! یالَه نار مَبَه، بَسکَم دَس دَریسونَّه، شِه آمِه بکَرَ.هرگز بَشتن اَلمند مَزنَه. 17 هیچ کَمی بدیرا بَدی نِکَرِ. بَسکم اَ چیی ایی کن گِردی چَمیکا حورمت بداشتی، اَنجوم بدَرَ. 18 اَگَم بَبییَه، تا اَ جِگا ایی کن بَشِمَه مَربوطَه، گِردینَه صلح و صَفانَه زندَگی بکَرَ. 19 اَی خاجَتیِن، هرگز تقاص مَویگِرَ، بَلَکم اَی خدا غَضَّبی واگذار بکَرَ. اِمی خونه کن توراتیکا نِوِشتَه آبَه یَه کن: «خداوند باتی: تقاص چمن شِنَه؛ اَز سزا آمَدا.» 20 بر عَسک، «اَگَم اِشتِه غَنیم اَنِشتا یَه، بَی هَرَدَ چی بِدَ! و اَگَم تِشیشَه، بَی آو بِنجامون! اَگَم انترَ بکَری جوری بَی شرمندَ بَکشه کن، هنتَیَه اَسوجونَه پَسنَه اون چَی سَریکا گِرد آشَکَرد.» 21 بدی اِشتِه سَر حریف آمبو، بَسکم چاکی کَردِ نَه بَدی سَر حریف بب. |
@ 2024 Korpu Company