رومی کلیسارا نامه 10 - کتاب مقدس به زبان تالشي - گویش مرکزی1 اَی برا اِن، چمن دلییَه طَمارزو و دِوا خدا دَرگارا یهودیون خونِه اِمَه کن نیجات بیگِن. 2 اِمی خونِه کن چَوونرا بَشامَه شاهیدی دوعِه کن خِدارا غَیرَت دارِن، ولی نِه اَلمند گیرینَه. 3 چون اَ صالِح بِه ایی کن خدا کارَ سَر آنِگنین، و اِمی خاطِر کن اِشتَن صالح بِه ثابیت کَردِ دوملَه بینَه، اَ صالح بِه کن خدا کا بَه، ناریکا، کَلَّه وینِه فَندِشون. 4 اِمی خونه کن مسیح شریعی آخیرَ، تا هَر کَم کن بَی ایمان بوعَرِ، صالح بَحیساب با. 5 چون موسی اَ صالح بِه خونه کن شَریعَتی سَر آمبستَه، اِنتَرَ بنوشتی کن: «کَسی کن اِم حِکمون اَنجوم بدَرِ، چَی واسیطَنَه زندَگی بَداشتیَه.» 6 ولی اَ صالح بِه ایی کن ایمان داشتِه سَر آمبستَه باتی: «اِشتَن دِلیکا مَواج کیَه کن آستامونیرا کَفا بِشو؟ - تا مَسیح ویروَرِ 7 یا «”کیَه کن مردَاون دِنیارا بِن بِشو؟» تا مَسیح مَردَاون دِنیاکا زند آکَرِ. 8 ولی اَ، چِه باتی؟ اِمکن «اِم کَلام اِشتِه نِزِک، اِشتِه گَویکا، و اِشتِه دِلیکارَ.» اِم هَه ایمانی کَلامَه کن اَمه اییلام بَکَمون، 9 کن اَگَم اِشتَن زونینَه ایقرار بِکَری «عیسی خِداوندَ» و اِشتَن صدقِه دلینَه ایمان بِداری کن خدا بَی مَردَاونکا زندَ آکَردِشَه، نیجات بگَتیشَه. 10 چون دِلیکارَ کن آدَم ایمان بوعردی و صالح بَحیساب بومَی، و زونینَه یَه کن ایقرار بَکَی و نیجات بگَتی. 11 هَتَه کن اِشعَیای پَیغمبری کیتاویکا باتی: «هَر کَم بَی ایمان بوعَرِ، سَر اَفکَندَ آنیَب.» 12 اِمی خونِه کن یَهود و یونانی دِلَکا فرقی نیَه، چیرا کن هَه خداوند، گِردی خِداوندَ و گِردِ اَیِنی کن بَی خِلِه بَکَنَه، فِرَوونَه بَرَکت آرَدا. 13 اِمی خونه کن «هَر کَم خداوندی نومی خِلِه بکَرِ، نیجات بگَتیَه.» 14 پس چِنتَه کَسی خِلِه بِکَن کن بَی ایمان وَردَشون نی؟ و چِنتَه کَسی ایمان بوعَرن کن چَی خونِه دَرستَشون نی؟ و چِنتَه دَرَسن، اَگَم کَسی اَوونرا موعیظَه نِکَرِ؟ 15 و چِنتَه موعیظَه بِکَن، اَگَم اَوون مَینِن؟ هَتَه کن اِشعَیای پیغمبری کیتاویکا نِوِشتَه آبَه یَه: «چَدَ اَیِنی کن انجیلی خَشَه خَبری موعیظَه بَکنَه لِنگِن خاصین.» 16 ولی گردِ اَیِن انجیلیشون قِبول نِکردَ، اِمی خونِه کن اِشعَیای پَیغَمبری کیتاویکا باتی: «اَی خداوند، کیی چَمَه پَیغومی باوَرش کَردَ؟» 17 پس ایمان، پَیغومی دَرَستِه کا آ، و پَیغومی دَرَستِه، مَسیح کَلامی راه نَه آ. 18 ولی دَمَپَرسِست: دَنِه رَستِشون؟ اَلبَت کن دَرَستِشون: «چَوون سَس زَمینی سَردِرِ، گِردِ جِگا اونکا گَه بَه گَه آبَه یَه، و چَوون کَلام زَمینی اِم گوشَه تا اَ گوشَه را آرَستَه یَه.» 19 ولی دَمَپَرسِست: ایسرائیلی قام اِشتَن دَرَستَه چییکا، سَر آنِگِنستَه؟ اَوَلیکا، موسی باتی: «اَیِنی واسیطَنَه کن قام بَحیسان نان، بَشِمَه غَیرَتی بَکَمَه؛ و نافَمَه قامینَه، شِمَه غَضَّبی آمَکَرد.» 20 چَی بَه دوملَه، اِشَعیای پیغمبَرجورئتینَه باتی: «اَیِن کن چمن دوملَه نِگَردین، بَمن پَیدا کَردِشون و بَشتَن، اَیِنیرا کن بَمن خِلِه شون کردَ نِبَه، آمونِستِم.» 21 ایسرائیلی قامی خونِه باتی: «هَمَه روج اِشتَن بالون نافِرمون و یالَه نارَ قامی طَرَف دِراز آکَردِم.» |
@ 2024 Korpu Company