رومی کلیسارا نامه 1 - کتاب مقدس به زبان تالشي - گویش مرکزی

¹ مَسیح عیسی وَزییَر، پولوسی طَرَفیکا، کن رِسالَتیرا خِلِه آبَه یه و خدا اِنجیلیرا وَقف آبَه یَه؛

² هَه انجیل کن خدا نارتَر، اِشتَن پَیغَمبَرون واسیطَنَه، چَی وَعدَ، مُوقدَسَه نوِشتَه اون دلَکا آدوعَش بَه،

³ کن چَی زوعَه خونِه اَ، کن جندَکی لَحاظ، داوود پادیشا نَتاجیکا دِنیا دگِنِسته،

⁴ و روح قدوسیَتی لَحاظ، اِشتَن، مَرَدَاون دِلَکا زندَ آبِه نَه، زبقینَه اییلام بَه کن خدا زوعَه یَه، یعنی چَمَه خداوند عیسای مسیح.

⁵ خدا، مسیح واسیطَنه اَمَش فیض دوعَه تا چَی رسولِن آبَم و قامون گِردی راهنمایی بکَرَم کن مسیح نومی سَردِرِ ایمان بوعَرِن و بَیکا ایطاعَت بکَن.

⁶ و اِم شِمَرا نی هِستَه، کن بَشِمَه شون صَلا ژَیَه تا عیسای مَسیح شِن بِبَه؛

⁷ گِردِ اَیِنیرا کن شهر رومیکاینَه و خدا خاجَتی اینَه و اَیِنِشون صَلا ژَیَه تا موقدَسونکا آبون: فیض و صلح سلامتی، چَمَه دَدَ، خدا وَریکا، و خداوند عیسی مسیح طَرَفیکا شِمَرا ببو.

پولوس رومی شِرا خَشی بَکَی

⁸ اَوَلیکا، اِشتَن خدا، عیسای مَسیح واسیطَنَه، شِمَه گِردی خونِه شِکر بکَمَه، اِمی خونه کن شِمَه ایمانی تَریف دِنیا گردِ جگا اونکا گَه بَه گَه بَیه.

⁹ چون خِدایی کن بَی اِشتَن صِدقِه دِلینَه چَی زوعَه اِنجیلی کاریکا خیدمَت بَکَم، مِرا شاهیدَ کن چِنتَه یَژَن چمن دِوا اونکا بَشِمَه، اوزون یاد آمَفَند

¹⁰ و اوزون اِشتَن دِوا اونکا اَپیم بَه کن اَگَم خدا بپیا آخیر بَسَر شِمَه ویندِرا بام.

¹¹ اِمی خونه کن شِمَه ویندِرا خَشیمَه، تا روحانیَه خَلا اون شمَه ایمان داشتِه زبق دوعِه را، شِمَرا بوعَم؛

¹² یعنی تا اَمه یَندِ ایمانیکا دلگَرم آبَم، هِم شِمَه و هِم اَز.

¹³ برا اِن، نَپیمَه بی خَبَر بِبَه کن چَن کَرَ اَپیم بَه شِمَه وَر بام، ولی هَر کَرَ را، ای چیی ایی پیش آمَه. اَپیمَه شِمَه دِلَکا نی تلَکه اَکینی پِگِم، هَتَه کن دییَرَ غَیرِ یَهودیون دِلَکا دورنوستَمه.

¹⁴ اَز بَشتَن چِه یونانیون و چه بَربَرِن، چه اَلمَندون و چِه جائیلون مَدیون بَموستیم.

¹⁵ اِمی خاطِر، بَرک خَشیمَه کن اِنجیلی، بَشِمَرا نی کن رومیکا بَمَندیرون، اییلام بکَم.

¹⁶ اِمی خونه کن اَز اِنجیلیکا عار ندارِم، چیرا کن اِنجیل، هَر کَمی نیجات دوعِه را کن ایمان بوعَرِ، خدا زبقَه، اَوَلیکا یَهود و چَی بَه دوملَه غَیر یَهود.

¹⁷ اِمی خونه کن اِنجیلی دِلَکا، اَ صالِح بِه ایی کن خدا شِنَه دیار آرَبن، کن شِروو کا تا آخیر ایمان داشتِه سَردِرِ آمبستَه. هَتَه کن حَبَقوق پَیغَمبَری کیتاویکا نِوِشتَه آبَه یَه کن: «صالیحَه آدَم ایمان داشتِه نَه زندَگی بَکَیَه.»

خدا غَضَب، گناخ کارَ آدَمیرا

¹⁸ اِمی خونه کن خدا غَضَّب، هَر مودیل بی خدایی و اینسانون ناراستی سَردِرِ کن اِشتَن ناراستینَه حَقیقَتی نیفیت بَکَن، آستامونیکا ویرَرا.

¹⁹ چون اَ چیی ایی کن خدا کا بَبی آزنِستِه چَوونرا دیارَ، اِمی خونه کن خدا اَیِنِش چَوونرا دیار آکَردَشَه.

²⁰ چون خدا اَ صیفَتِن کن نییَب اَوون ویندِ، یعنی چَی زَیرونَه خِنَر و ایلاهییَه ذات، دِنیا خلق بِه شِرووکا، اَ چییِنی کن سی آبَه اینَه دلَکا واضح ویندَنینَه. پس اَیِن دِ هیچ رِقنَه ایی نیشون.

²¹ اِمی خونه کن هرچَنَه خدا آزنِستِشون، ولی بَی هنتَه ایلَه خدا شیوار حورمت ایحترام نِکردِشون، بَلکَم اِشتَن فِکرونکا، دَدار چییونکا ویلاخیستین و ظِلَمات چَوون نافَمَه دِلیش گتَه.

²² اَگَم چِه ایدعا اَکَرینَه کن اَلمَندین، ولی نافَم آبینَه،

²³ و اَیِن زَیرونَه خدا شکوه و جلالی، اَ بوتِنی نَه کن فانییَه اینسان و پرندَاِن و خَیوونِن و خَزَندَاون اَمونینَه، عَوَض آکردِشون.

²⁴ پس خدا نی اَیَنِش چَوون دِلی شَهوَتونکا، جیفینین آهَشتِش، تا اِشتَن دِلَکا اِشتَن جَندَکون بی حُرمَت آکَن.

²⁵ اِمی خونه کن اَیِن اَ حَقیقَتی کن خدا خونِه اَ، دِرو نَه عَوَضِشون آکَردَ و مَخلوقی خالیقی جِگا پَرستِش و خیدمَت کَردِشون، خالِقی کن تا اَبَد پی بَی پرستِش کردِ. آمین.

²⁶ اِمی خاطر خدا نی اَیِنِش چَوون شَرم آوَرَ شَهوَتیکا آهَشتِش. اِمی خونه کن چَوون ژِنِن، طَبیعیَه رابِطَه اون غَیرِ طَیبعیَه رابِطَه اونَّه عَوَض آکَردِشون.

²⁷ هِنتَرَکِه، مِردِن نی ژِنونَّه طَیبعیَه رابِطَه آهَشتِشون، و یَندِ شَهوَتی آراکا سیجیستین. مِرد مِردینَه شَرم آوَرَ کار اَنجوم اَدَری، و اِشتَن بَدَ کارون مکا فاتیشون ویندَ.

²⁸ هَتَه کن خدا آزنِستِه چَوونرا اَرزِشی نِداریَه، خدا نی اَیِنِش، چَوون مِچِمَه فکریکا آهَشتِش تا اِشتَن بَدَ کارون اَنجوم بِدَرِن.

²⁹ اِمِن هَر مودیل نادِرِستی، آوشَر گیری، طمع و بد خواهی کا پَتلَمَه این. اَیِن هَمه مودیل زِرَ، آدَم کِشتِه، ژِژِ، حیلَه و بَد خواهیکا پَتلَمه اینَه. اَیِن غَیبت اَکَر

³⁰ بوهتون اَژَن، خدا غَنیم، پوررو، یالَه نار و قودّینه. آوشَرَ کارون اَنجوم دوعِه را، تازَ راه سَی آنَّکرد و اِشتَن دَدَ نَنَه کا نافِرمونین،

³¹ نافَم، بی‌وفا، بی‌عاطیفَه و بی‌ رحمین.

³² هَر چَنَه خدا عادیلانَه حِکمی بَموستین کن اَیِنی کن اِنتَرَ کارون بَکَنَه مِکافات مَرگَه، نِه تاکَه اِشتَن اَ کارون بَکَنَه، کَسِنی کن اِنتَرَ کارون اَکَرین، تایید بَکَن.