یوحنا موکاشیفَه 9 - کتاب مقدس به زبان تالشي - گویش مرکزی

¹ پِنجومین فِرشتَه اِشتَن زِرناش فو دَکردَ، و اَز ویندمَه کن ایلَه اِسترَ آستامونیکا زَمینی سَردِرِ ویگنستَه. هاویَه چالی اَچَر کن تونِش نییَه، اَشون دوعَه.

² اَ فرشتَه هاویَه چالی بَرَنگاش آج آکَردَ. اَ چالیکا چیی ایی هنته یالَه کوورَ دوو شیوار راست آبه، و آختاو و هوا، اَ چالی دوکا سیا ویبین.

³ چَی بَه دومله اَ دو دلَکا، وَشتَکِن زَمینی سریرا آمینَه و اَیِنِشون هنته زَمینی عقربون شیوار اینجارِشون دوعَه،

⁴ و اَیِنشون واتَه به، نِه زَمینی واشونَّ، و هیچ کَوَ گیاهی و داری صدمَه نِژنن، بَسکَم تاکَه آدَمِنی کن خدا موهر چَوون پوشنو کا نییَه صَدمَه بژنن.

⁵ و اَیِنشون ایجازَ دوعَه تا بی اِمکن کَسی بکِشن، اَ آدَمون پِنج ماه عذاب بدَن. و چَوون عذاب هنته عقربی گَشته موقه عذابی شیوار به.

⁶ اَ روجون دلَکا آدَمِن مَرگی دوملَه بَبینه، ولی بَی پَیدا نینَّکرد؛ مَردِ طَمارزو بکَنَه، ولی مرگ اَوونکا بَوریتییَه.

⁷ اَ وَشتکِن هنته اسبِنی کن جنگِستِه را آمادَ اینَه اَمونین. چَوون کَلَّکا چیی ایی بَه کن هنته طِلِه اینَه تاجی شیوار بَه و چَوون صَفَت هنته آدَمی صَفَتی اَمونیَه.

⁸ چَوون ذِلف هنته ژِنون ذِلفی شیوار بَه و چَوون گازِن شیری گازون اَمونیَه.

⁹ اِشتَن سینَه سَریکا آسونَه سینَه پوش دارینَه، و و چَوون پَر گَتِه سَس هنته اَرَبَه اون سَس و وِرَ اَسبون سَسی شیوار بَه کن جنگِنستِه را تاویستَه اینَه.

¹⁰ چَوون دومِن و نیشِن هنته عقربی دوم و نیشی اَمونیَه، و اِشتَن دومیکا اِم اینجاری دارینَه تا آدَمون پِنج ماه را عَذاب بدَرِن.

¹¹ چَوون پادیشا هاویَه چالی فرشتَه بَه کن عِبرانیون زَبانینَه بَی «اَبَدون»، و یونانیون زبانینَه بَی «آپولیون» یعنی ویراوِن، اَواجینَه.

¹² اَولین «برامِه» گِذَشته. بوین، هنوزَنی دِ گلَه «بِرامِه» پی بان.

¹³ چی بَه دومله شَشومین فرشتَه اِشتَن زرناش فو دَکردَ، و اَز سَسی کن طِله اینه مذبَح چار گلَه شاخیکا، کن خدا ناریکا بَه، بَرمَه درَستِم؛

¹⁴ کن اَ شَشومین فرشتَه ایی کن زِرنا داری، بَش واتَه: «اَ چار فرشتَه کن یالَه رِبار، فوراتی وَریکا اَسیرین، آزاد اَکَن.»

¹⁵ پس، اَ چار فرشتَه کن هِم ساعت و هِم روج و هِم ماه و هِم سالیرا آمادَشون غَم هردَ بَه، آزاد آبین تا آدَمون یَک سوومی بکِشِن.

¹⁶ سوارَ نیظامی تیعداد دِویست میلیون نفر بَه کن چَوون تیعدادی درَستِم.

¹⁷ اِشتَن رویا کا اَسبِن و سَوارون اِنتَرَ ویندِم: اَیِن زرِه اِنی دکَردَشون به کن چَوون رنگ، آرا سِر گیری و آبی کَو گیری و گوگردی زردی داری. اَسبون کلَه شیری کلَّه اَمونیَه و چَوون گَویکا آرا و دو و گوگرد بَرَوَزییَه.

¹⁸ اِم سِه گلَه غَر، کن آرا و دو و گوگرد بَه و چَوون گَویکا بَرَوَزییَه، یَک سووم آدَمِنِشون کِشتَه.

¹⁹ اَسبون اینجار چَوون گَویکا و دومیکا بَه. اِمی خونه کن چَوون دوم هنته نَلَتی کلَّه اَمونیَه کن صَدمه اَژَنیَه.

²⁰ اَیِنی کن اِم سِه گله غَرّونکا نیفلَه آبَه نِبین، نِه اِشتَن بالی کردَ کارونکاشون توبَه کردَ. نِه پَریانون پرستش کردِکا دست پِگَتِشون و نِه طِلِه این و نِقرَ این و برنجیی و سِه و چوو اَ بوتون پرستش کردِکا کن نِه بَویندین و نِه بَشان دَرَستِه و نِه پیردِ بَشان.

²¹ هنته نی اِشتَن آدَم کِشتِه کا و جاوودو گریکا و بی عیفتیکا و پِتارِستِکا نی توبَشون نِکردَ.