یوحنا موکاشیفَه 8 - کتاب مقدس به زبان تالشي - گویش مرکزی

هفتومین موهر

¹ هَنگومی کن وَرَ هَفتومین موهرِش چاکنِسته، حِدود نیم ساعت آستامونیکا سکوت برقرار آبه.

² اَموقه، اَ هَف گلَه فرشتَم ویندَ کن خدا حِضوریکا پا مندین، و اَوون هف گلَه زِرناشون دوعَه.

³ و دییَرَ فرشتَه ایی آمَه کن طِلِه اینَه مَنقالی اِشتَنَه داری، و قِربونه جِگا وریکا پا بِند آبَه. اَشون وِرَ بوخور دوعَه تا اَوون گردِ موقدسَه آدَمون دِوانَه، طِلِه اینَه قِربونه جِگا سَریکا، تختی نَکا تقدیم بکرِ.

⁴ بوخوری دو موقدسه آدَمون دِوا نَه، اَ فرشتَه بالیکا تا خدا حِضوریکا کفا شَه.

⁵ چَی بَه دوملَه فرشتَه بوخوری مَنقالی پِگتشَه و و قربونَه جگا آرا کا پتلَمه آکَردِش و زَمینی سَردِرِ ویداشتِش. اَموقه گِرَ خونَه سَس بَه، و برقی کن آستامونیکا اَژَنیَه و بومَه لَرزَ آمه.

هفت گِله زرنا

⁶ اَموقه اَ هَف گلَه فرشتَه کن اَ هف گلَه زرنا دارینَه، حاضیر آبین تا اَوون سس دَروَرِن.

⁷ اولین فرشتَه اِشتَن زِرناش فو دَکَردَ، و ایکَرَ ایی تَرک و آرا کن خونینَه یَندِ گنَه بَه زَمینی سَردِرِ وارِسته و زَمینی یَک سووم سیجیستَه و یَک سِووم دارِن سیجیستین و کَوَ سَوزَ اِن گِرد سیجیستین.

⁸ دِوومین فرشتَه اِشتَن زرناش فو دَکردَ، و ایی چیی ایی کن هنته آرا گتَه کوهی شیوار بَه، دَیرا دلَکا ویگنِستَه و دَیرا یَک سووم خون آبَه.

⁹ و یَک سِووم دَیرا مووجودِن مَردینَه و یَک سووم کَشتییِن نیفیت آبین.

¹⁰ سوومین فرشتَه اِشتَن زرناش فو دَکَردَ، و یالَه اِسترَ ایی هنته کولوستارَ مشعلی شیوار آستامونیکا، یَک سِوومه رِباررِن و خونیون سَردِرِ ویگنِستَه.

¹¹ اَ اِسترَ نوم «اَفسَنتین» بَه، و یَک سووم آوِن اَفسَنتینینَه تِل آبین. و خَیلی آدَمونکا اَ تِل آبَه آوون خونه مَردینَه.

¹² چارومین فرشتَه اِشتَن زرناش فو دَکَردَ، و آختاوی یَک سووم، و مانگی یَک سووم و اِسترَ اون یَک سووم، ضربَه گنِستینَه، اَنَه کن چَوون نوری یَک سووم تاریک آبَه. و روجی یَک سووم بی نور مندَ و شَوی یَک سووم نی هَتَه آبَه.

¹³ چَی به دومله دیَشتِم، و درَستِم ایلَه عوقاب هَته کن آستامونیکا کایبَه پَر گَتِه، لَسَّنه سَس آداشَه: «بِرامِه، بِرامِه، بِرامِه زَمینی سری آدَمون حالیرا، اِمی خونه کن دِ چی ایی نِمندَیه اَ سه گلَه فرشتَه اون زِرنا سَس، راست آبو.»