یوحنا موکاشیفَه 5 - کتاب مقدس به زبان تالشي - گویش مرکزیطومار و وَرَ 1 اَ موقه اَ تختی سَر اَنِشی راسته بالیکا ایلَه طومارِم ویندَ کن چَی ناریکا و پِشتیکاشون نوشتَه بَه، و هف گلَه موهرینَه موهر وموم آبَه بَه. 2 و قودورَ فرشتَه ایی ویندمَه کن تَتَّه لَسَّنه ایلام اَکَریَه: «کییَه کن موهرون چاکنستِه و طوماری آکَردِ لَیاقتی بدارِ؟» 3 و هیچ کَم نِه آستامونیکا، نِه زَمینی سَردِرِ، و نِه زَمینی بنیکا طوماری آکَردِ یا بَی دیشتِه اینجاری نِداری. 4 و اَز بِرامِه اَکَریمَه و اَبرَمیمه، اِمی خونه کن هیچ کَسی پَیدا آنِبه کن طوماری آکَردِ و یا بَی دیشتِه لَیاقتی بدارِ. 5 اَموقه ایلَه اَ پیرونکا بَمِنش واتَه: «مَبرَم. بوین، اَ شیر کن یهودا قامی شِنه، و داوودی نَتاجیکارَ، پیروز آبَه یَه، تا طوماری و چَی هف گله موهری آکَرِ.» 6 و تختی وسطیکا و اَ چار گلَه زندَ مخلوق و اَ پیرون دلَکا، ایلَه وَرَ ویندِمه کن هنته ایله قربونی شیوار بَه و هف گلَه شاخ و هف گلَه چَم داری کن خدا هف گلَه روح بینه، کن زَمینی گردِ جگا اونرا رونَه آبین. 7 اَ وَرَ شَه و طوماری اَ تختی سَر اَنِشی راستَه بالیکا ویگَتِش. 8 طوماری ویگَتِه بَه دوملَه، اَ چار گلَه زندَ مخلوق و بیستو چار گلَه پیر، اَ وَرَ پا بنیکا، خاکی سَر بَرگنستین. اَیِن هر کِرَم اِشتَن بالیکا ایلَه سازچنگ و طلِه اینَه گولَه اِنی دارین، کن بوخوریکا کن هه موقدسَه آدَمون دِوا بَه، پَتلمَه به. 9 و اَیِن تازَ سِرودی اَخونینَه کن اَواجیَه: «تِه اَ طوماری ویگَتِه و اَ موهرون چاکنسِه لَیاقتی داری، اِمی خونه کن تِه قربونی آبیشَه، و اِشتِه خونینَه آدَمون، هر طایفه و زبان و مردوم و میلَّتیکا، خِدارا خِریرَ؛ 10 و چَمَه خِدارا، اَوونکا پادیشاهیِن و کاهینون آکَردِر، و اَیِن زَمینی سَردِرِ سلطنت بَکنَه.» 11 چَی بَه دوملَه دَیَسیم کردَ و برکَه فرشتَه اون سَسِم درَسته کن اَ تخت و اَ زندَ مخلوقِن و اَ پیرون دوورِشون کردَ به. چَوون تیعدا کاولَه کاولَه و هَزاران هَزار گِلَه بینه. 12 و اَیِن لَسَّنه اِنتَرَ اَواجین: «اَ قربونی آبَه وَرَ خِنَر و ثیروت و حیکمت و اینجار، و حورمت و شکوه و جلال و برَکتی تقدیم بِه لَیاقتی بَداشتی.» 13 چَی به دوملَه درَستِم هر مخلوقی کن آستامونیکا و زَمینی سَردِرِ و زَمینی بنیکا و دَیرا کارَ، و هر چیی ایی کن چَوون دلَکارَ، اَواجینَه کن: «اَ تختی سَر اَنِشیرا و اَ وَرَ را، ستایش و حورمت و شکوه و جلال و زبق تا ابد و تا ابد چَوونرا با.» 14 و اَ، چارزندَ مخلوق واتِشون: «آمین»، و اَ پیرِن صفَتینه زَمینی سَردِرِ ویگنِستین و بَی پرستش کردِشون. |
@ 2024 Korpu Company