یوحنا موکاشیفَه 3 - کتاب مقدس به زبان تالشي - گویش مرکزی

مسیح پیغوم، ساردِسی کلیسا را

¹ «ساردِسی کلیسا فرشتَرا بنوِس: «اَ کن خدا هف گلَه روح و هف گلَه اِسترَ دارِ، انترَ باتی: اِشتِه کارونکا باخبَریمه. تِه اِشتِه زندَ بِه خونه سَرشناسیشَه، ولی مَردَایش.

² پِب و اَ چیی انی کن کا مَردِ، زبق آدَ. اِمی خونه کن چمن خدا وَریکا اِشتِه کارون کامیل نِویندِم.

³ پس اَ چیی ایی کن ویگَتَرَ و دَرستَرَ، یاد آرَفن؛ اَوون غَم بَه و توبَه اَکَن. اَگَم پِمَبی، هنته پتارچی شیوار آم و تِه نیشَموست کن چِه ساعَتیکا اِشتِه زرَبَرارا بومَمَه.

⁴ «اِم حالینَه، هنوزَنی بعضیون سارِدسیکار هِستَه کن اِشتَن شندرِشون کثیف آکردَ نی و اَیِن ایسبیَه شندرینَه بَمِنه گَل بژَن، اِمی خونه کن لَیاقَتِشون هِسته.

⁵ هر کَم پیروز آبو، هنتَرَ، ایسبیَه شندِر دَرَکرد و اَز هرگز چَوون نومی زندَگی دَفتریکا پاکییَه آنِمَکرد، و چمن دَدَ و چَی فرشتَه اون حِضوریکا چَی نومی خِلِه بَکَم.

⁶ اَ کن گوش دارِ دَرَسه کن خدا روح کلیسا اون چِه باتیَه.

مسیح پَیغوم، فیلادِلفیَه کلیسا را

⁷ «فیلادِلفیَه کلیسا فرشتَرا بِنوِس: «اَ کن حَقَّه و اَ کن قودّوسَه، اَ کن داوودی کلیدی بَداشتی، اَ کن آج آرَکَرد و دِ هیچ کَم نییَشا دبَستِه، و اَ کن درَبَست و هیچ کَم نییَشا آج آکَرِ، اِنتَرَ باتی:

⁸ اِشتِه کارون بَموستیم. بوین، ایله آج آبه بَرنگایی اِشتِه نَکا آنوعَمه کن هیچ کَم نییَشا اَی دَبَستِه. بَموستیم کن عِجِزیش، ولی چمن کلامی کاش غَم هردِ و چمن نومی حاشار کردَر نیی.

⁹ بوین، اَیِنی نَه کن شَیطونی عیبادَت گا شِنینَه و بَشتن یهودی بَموستین ولی نینَّه، بسکَم دِروو باتین. دَیَس، اَوون دیم پِمَنا تا بان و اِشتِه پا بِن بَرگنن، تا سَر آگنن کن اَز، بَتِه رَی بَداشتیم.

¹⁰ اِمی خونه کن تِه چمن کلام کن آمبَست گیری خونِه اَ، غَمِر هردَیَه، اَز نی وَرداورد بِه ساعَتیکا، اَ ساعت کن گردِ دِنیا کا بومیَه تا زَمینی سَردِرِ آدَمون وَرداورد بکرِ، بَتِه غَم بَردیمه.

¹¹ «خَیلی زوو آم. اَ چیی ایی کن بداشتیشَه، آمبَست غَم بَه تا کَسی اِشتِه تاجی بَتکا آمَبَرِ.

¹² هر کم پیروز آبو، بَی ایلَه سِتون چمن خدا معبدیکا آمَکرد، و دِ هرگز اَ جِگا آنییَه هَشت. چَی سَریکا اِشتَن خدا نومی و اِشتَن خدا شَهری نومی بَنوشتیمَه، یعنی تازَ اورشَلیم کن خدا طَرَفیکا و آستامونیکا اَیر آرَب، و چمن تازَ نومی چَی سَردِرِ بَنوِشتیمه.

¹³ اَ کن گوش دارِ درَسه کن خدا روح کلیسا اون چِه باتیَه.

مسیح پَیغوم، لائودیکیه کلیسا را

¹⁴ «لائودیکیَه کلیسا فرشتَرا بِنوِس: «اَ کن آمین هِستَه، اَ اَمینو و حییقیَه شاهید، اَ کن خدا خیلقتی سرچشمَه یه، انترَ باتی:

¹⁵ اِشتِه کارون بَموستیمه؛ بَموستیم کن نِه سَرینیشَه و نِه تَتیش. اَی کاش کن سرین یا تَت بِبیش.

¹⁶ ولی اِمی خونه کن نِه سَرینیشَه و نِه تَت، بَلکَم ولَرمیش، ایله توو شیوار بَتِه اِشتَن گَویکا فِر آمَدا.

¹⁷ اِمی خونه کن باتیشَه: ”دولت مَندیمه؛ مالو اموال گِرد آکَردمه و چیی ایرا دَس دَریس نیمَه.“ ولی سَر آگنه نیشه کن، بدبخت، گیدلی، ذلیل، کور و سِلَندَ ایش.

¹⁸ بته اَندرز بَکم کن بمِنکا خالیصه طِله کن آرا کا برشَیَه بخِری تا دولتمند آبی؛ و ایسبیَه شندِرون، تا دَکَری و اِشتِه شرم آورَ سلندَ گیری دَپوشامنی؛ و زَمات، تا اِشتِه چمون سَردِرِ پِسونی تا بوینی.

¹⁹ «اَز اَینی کن اَوون رَی بداشتیم تشَر بژَم و چَمای بَکَم. پس غَیرَتی سَر بِه و توبَه اَکَن.

²⁰ بوین، اَز برَنگا پِشتیکایمَه و کایمَه برنگا کوستِه. اَگَم کَسی چمن سسی درَرَست و چمن نَکا برنگا آکَرِ، اَز دلَرا بومَمَه وبَینه سور بَردیم و اَ نی بَمِنه.

²¹ «هر کم پیروز آبو، اِمی بَی آمَدا تا بمِنه تختی سَریکا بنشِه، هته کن اَز پیروز آبیم و اِشتَن دَدَ نَه، چَی تختی سَردِرِ نِشتیم.

²² اَ کن گوش دارِ درَسه کن خدا روح کلیسا اون چِه باتیَه.»