یوحنا موکاشیفَه 22 - کتاب مقدس به زبان تالشي - گویش مرکزیزندگی رِباری آو 1 چَی بَه دوملَه اَ فرشتَه، زندَگی آوی رباری بَمن آمونِستِشَه کن هنته بلوری شیوار شفاف بَه و خدا و وَرَ تختیکا شِرشِر دَرَرای 2 و شهری مَیدونی وسَطیکا دَرَیوَرییَه. رباری دِ طرَفیکا، زندَگیی، دار بَه کن دانزَ مودیل میوَ اَدَریَه، یعنی هر ماه ایی مودیل میوَ اَوَرییَه. و چَی لیوِن میلَّتونرا شفا بَه. 3 و دِ هیچ لَنَتی اَ جِگاکا نِبَه. بسکم خدا تخت و وَرَ تخت اَ جگا کا بَمندی و چَی پاسَرییِن بَی بَپَرَستینَه. 4 اَیِن چی صفتی بویندینه. چَی نوم چَوون پوشنوکا بمندییَه. 5 و دِ شَوی نییَه. اَیِن آختاو یا چِرا نوری نَپیشونَه، اِمی خونه کن خداوند خدا چَوون نور آرَب. و اَیِن تا ابد و تا ابد سلطنَت بکَنه. عیسی بومَیه 6 فرشتَه بَمِنِش واتَه: «اِم گفِن راستینَه و بَبی بَی ایتماد کردِ. خداوند، پَیغَمبرون روحون خدا، اِشتَن فرشتَه عندِشه تا اَ چیی ایی کن پی زوو ایتفاق دگنِه، اِشتَن پاسَرییون آمونِه.» 7 «و دَیِس، خَیلی زوو اَز بومَمَه. خَشی اَ کَسی حالیرا کن اِم پیشگویی کلامی کیتاوی غَم برِ.» 8 اَز، یوحنا، هه ایمَه کن اِم چییون ویندَمه و درستَمه، و چَوون ویندِ درَستِه بَه دوملَه، اَ فرشتَه ایی کن اِمِنِش بَمن آمونِستَه، لِنگون نَکا برگنِستیم تا بَی پرستش بکَم. 9 ولی اَ بمِنِش واتَه: «اِنتَرَ مکه! اَز نی هنته تِه و اِشتِه برا اون شیوار، یعنی پَیغمبَرِن، و اَیِنی کن اِم کیتاوی کلامی اَنجوم دَرِن، هَم خیدمتیم. خدا پرستش بکَه.» 10 اَ بَمن واتِشه: «اِم کیتاوی پیشگویی کلامی موهر موم مَکَه اِمی خونه کن اَ وقت نِزِکه. 11 بَرزِن بد کارَ آدَم، اِشتَن بدی کردِ ایدامَه بدَرِ و فاسیدَ آدَم، هنترَکِه فیساد بکرِ؛ صالحه آدَم اَ چیی ایی کن دِرِسته اَنجون بدَرِ و موقدسَه آدَم، هنترَکه موقدَّس بومونِه.» 12 «بوین، اَزخَیلی زوو بومَمَه و اَ پاداشی کن پی بدَرِم بَشتنه بوعردیم تا هرکَمی چَی کردَ کارون طبق بَی عَوَض آدَرِم. 13 از ’الف‘ و ’ی‘، اوّل و آخر، شروع و پایان هِستیمَه.» 14 خَشی اَیِنی حالیرا کن اِشتَن رَدا بَشوشتین تا اِم حقّی بدارن کن زندَگی داریکا بَرِن و بشان شهری دروازَاونکا شهری دِلَه دَشِه. 15 عِسبَه اِن و جاودوگرِن و بی عیفتِن و آدَمَه کِشِن و بوت پرستِن و گردِ اَیِنی کن دِرو رَی بَداشتینَه و دِروو اَنجوم دَرِن، بِرن بمندینَه. 16 «اَز، عیسی، اِشتَن فرشتَه شِمَه وَر عندِمه تا اِم چییون کلیسا اونرا شاهیدی بدَرِ. اَز داوودی رگو و ریشَه و صِبَه اِسترَ ایمَه کن دتاوِستییَه.» 17 خدا روح و وَیو باتینَه: «بِه!» هَر کمی کن اَی دَرَرَست بواجِه: «بِه!» هَر کمی کن تشیشَه با؛ و هر کَمی کن بَپیشَه، زندَگی آویکا بی امکن چیی ایی بدَرِ ویگِرِ. 18 هر کَمی کن اِم کیتاوی پیشگوی کلامی دَرَرَست هوشدار دَرِم کن اَگَم کَسی چیی ایی بَی ایضاف آکَرِ، خدا، غَرِّنی کن اِم کیتاویکا نوشتَه بَه یَه، چَی سَردِرِ بوعَردیَه. 19 و اَگَم کَسی اِم کیتاوی پیشگویی کلامیکا چیی ایی کم آکَرِ، خدا بَی زندَگی داریکا و موقدسَه شهریکا، کن چَوون خونه، اِم کیتاویکاشون نوشتَه یَه، بی نَصیب بَکَیَه. 20 اَ کن اِم چییون خونه شاهیدی دَرِ باتیَه: «یقین، اَز خیلی زوو بومَمَه.» آمین. اَی خداوند عیسی، بِه! 21 خداوند عیسی فیض شمَه گِردینَه دَرِ ببو. آمین. |
@ 2024 Korpu Company