یوحنا موکاشیفَه 21 - کتاب مقدس به زبان تالشي - گویش مرکزی

تازَ آستامون و تازَ زمین

¹ چَی به دوملَه تازَ آستامون و تازَ زمینِم ویندَ، اِمی خونه کن اَوّلنَه آستامون و اَوّلَنَه زمین نیفیت آبَه بین و دِ دَیرایی وِجود نِداری.

² و تازَ و موقدَسه شهر، یعنی تازَ اورشَلیمِم ویندَ کن خدا وَریکا آستامونیکا کایبَه ویرمِه، و هنته وَیو ایی کن اِشتَن شو را بَشتَنِش وَج آکَردیَه شیوار، خاص آبَیَه.

³ و تختیکا، تَتَّه لَسَّه ایی دَرَستِمه کن اَواجیَه: «بوین، خدا منزل آدَمونَّه دَرِ. واَ، اَوونَّه بمَندیه؛ و اَیِن چَی قام بَبینَه، و خدا اِشتَن اَوونَّه بَبییَه و چَوون خدا بَبیَه.

⁴ اَ چَوون چَمیکا هر اَسِرگی پاکیَه آرَکَرد. و دِ مرگ نییَه؛ و دِ هیچ عازیَه و برامِّه و داجی نینَّه، اِمی خونه کن اَوَّلنَه چییِن نیفیت آبَه این.»

⁵ چَی بَه دوملَه اَ کن تختی سَر نشت بَه واتِش: «بوین اَز، گردِ چییون تازَ آمَکَرد.» و هَنی واتِشَه: «اِمون بنوِس اِمی خونه کن اِمِن راستَه گَفینَه و بَبی اَوون ایتماد کردِ.»

⁶ و هَنی بَمِنِش واتَه: « اَنجوم بَه! از ’الف‘ و ’ی‘ و اوّل و آخِریمَه. هَر کَمی کن تِشیش ببو، اَز زندَگی آوَ خونیکا، بی اِمکن چیی ایی بدَرِ، بَی آمَدا.

⁷ هر کَم پیروز ببو، اِمی اِرث بَبَیه، و اَز چَی خدا بَبیمه و اَ چمن زوعَه بَبیَه.

⁸ ولی تَرسو اِن و بی ایمانِن و فاسیدِن و آدَمَه کِشِن و زینا کارِن و جاودوگرِن و بُت‌ پرستِن و گِردِ درواَواجون رَسَت، کولستارَ دَیراچَه و آرا و گوگرد، بَبیَه. اِم دوومین مَرگَه.»

تازَ اورشلیم

⁹ چَی بَه دوملَه ایلَه اَ هَف گلَه فرشتَکا کن هَف گلَه پَتلَمه قَدرَ، هف گلَه آخِرَ غَرّیکا دارینَه، آمه و بَمِنش واته: «بِه! اَز وَیو، یعنی وَرَ ژِنی بَتِه آمونِم.»

¹⁰ و اَ، بَمِنِش خدا روح دلَکا یالَه برزَ کوهی تِکیرا بردِشه و موقدسَه شهر اورشَلیمیش بَمن آمونِستِش کن خدا وَریکا آستامونیکا کایبَه ویرمِه.

¹¹ خدا شکوه و جلالی دارییَه و هنته گرون و کم یابه جواهیری شیوار شپَق اَژَنیَه، یَشمی شیوار و بلوری شیوار شفاف بَه.

¹² ایله یال و دِرازَ دیواری کن دانزَ گلَه دروازَ دارییَه کن دانزَ گلَه فرشتَه چَی دروازَاون سَریکا مند بینَه، هِستِش بَه. و هر کِرَمی اَ دروازَاون سَردِرِ، بنی ایسرائیلی دانزَ طایفَه نومِشون نوشتَه بَه.

¹³ سه گلَه دروازَ مشرقی طرَف، سه دروازَ شمالی طرَف، سه گلَه دروازَ جنوبی طرَف و سِه دروازَ مغربی طرَفِشون نوعَه بَه.

¹⁴ و شهری دیوار دانزَ گلَه هیم داری کن چَوون سَریکا وَرَ دانزَ گلَه رسولی نومشون نوشتَه به.

¹⁵ و اَ فرشتَه ایی کن مِنَه گَفِش ژَ، ایلَه میتراکَرَ چوو شیوا، طِلِه کا اِشتَنَه پِرِش بَه تا شهر و چَی دروازَاِن و دیواری اندازَبژنِه.

¹⁶ شهری شِکل مربع بَه و چَی درازی و وِشایی برابر بَه. فرشتَه شهرِش اَ چو نَه اندازَش گَتَه کن چی اندازَ دو هَزار و چار صَد کیلومتر بَه، چَی درازا و وشاییی و بلندی برابر به.

¹⁷ فرشتَه شهری دیواری اندازَ ژشه کن اینسانی قیاسینه شِصت و پِنج متر بَه، کن فرشتَه قیاس نی هِم به.

¹⁸ شهری دیوار یشمیکا سی آبَه بَه، و شهر خالیصَه طِلِکا سی آبَه بَه و هنته شیشَه شیوار شفاف بَه.

¹⁹ شهری دیواری هیمِنِ هَمَه مودیل جواهیرینه خاص آبه بَه. اولین هیم یَشمیکا بَه، دِوومین هیم لاجوردیه یاقوتیکا، سوومین هیم ایسبیَه عقیقیکا بَه، چارومین هیم زومورودیکا،

²⁰ پِنجومین هیم سِرَ عقیقیکا بَه، شَشومین هیم آتَشینَه عَقیقیکا، هفتومین هیم زبَرجَدیکا، هشتومین هیم کَوَ یاقوتیکا، نَهومین هیم زردَ یاقوتیکا بَه ، و دَهومین هیم سبزَ عقیقیکا، یانزَهومین هیم فیروزکَا، و دانزَ هومین هیم میشینَه یاقوتیکا بَه.

²¹ شهری دانزَ گلَه دروازَ، دانزَ گلَه مروارید بینَه، هر کِرَم دروازَاونکا ایلَه مرواریدیکا سی آبه بَه. و شهری جَدَ اِن خالیصَه طِلِه کا سی آبه بَه و هنتَه شیشَه شیوار شفاف بَه.

²² شهری دلَکا معبَدی نِویندِمَه، اِمی خونه کن موطلقَه قادِرَ خدا خداوند و وَرَ، چَی معبَد هِستینَه.

²³ اَ شهر آختاو و مانگ نَپیش بَه تا بَی رِشون آکرَ اِمی خونه کن خدا شکوه و جلال اَی نور آرَدا و وَرَ چَی چِرا اَ.

²⁴ و چَی نوریکا میلَّتِن گَل بَژَن و زَمینی سَردِرِ پادیشاهِن، اِشتَن جلالی اَ جِگارا بوعَردینَه.

²⁵ چَی دروازَاون هرگز روجیرا دَنینَّبَست، و اَجِگا هرگزشِو آنییَبِن.

²⁶ و میلَّتون شکوه و جلال و حورمت اَ جِگارا بوعَردینَه.

²⁷ ولی هیچ جیفینینَه چیی ایی و هیچ کَسی کن چَی کارِن و نیفرت انگیز و دِروو کا ببو، هرگز چَی دلَرا نییَش، بسکم تاکَه اَیِنی کن چَوون نوم وَرَ زندگی دفتریکا نوشتَه بَیَه، چَی دلَرا بَشینَه.