یوحنا موکاشیفَه 20 - کتاب مقدس به زبان تالشي - گویش مرکزی

هَزار سال سلطنت

¹ چَی بَه دوملَه ویندمَه کن ایلَه فرشتَه کن هاویه چالی اَچَری اِشتَنَه پِرِشَه، کا آستامکونیکا ویرمِه، و ایله یالَه زِنجیلی اِشن بالیکا دارِ.

² فرشتَه اَ قدیمیَه نلَتی، اَژدِخاش، کن هه ابلیس یا شَیطونَه، گَتِشه و اَسیرِش کردَ.

³ و بَش هاویه چالیکا ویَرفَندَ و بَرَنگاش موهر موم کردَ تا اَ هَزار سالی تَمون آبِرا دِ آدَمون گول مَژَنه. و چَی به دوملَه پی تلَکه زمانی آزاد آبو.

⁴ چَی بَه دومله تختِنی ویندِمه کن دیوون کردِ زاکینی، چَوون سری اَنِشی دوعَشون بَه. و آدَمون جانی ویندِمه کن چَوون کلَّه عیسی مسیح را شاهیدی دوعِه خونه و خدا کلامی شاهیدی دوعِه را، چَوون تنیکا جدا آبَه بَه. و کَسِنی ویندمه کن اَ اَشیا و چی موجَسمَشون پرستش نِکردَ، و چَی نشونَه اِشتَن پوشنو و اِشتَن بالیکا قِبولشون نِکردَ. اِمِن هَنی زندَ آبینَه و مَسیح نَه هَزار سال سلطنشون کردَ.

⁵ اِم اولَین، مردَاون دِنیاکا زندَ آبِه بَه. و تا اَ هَزار سالی تَمون آبِرا، دِ مَردَاِن زندَ آنِبین.

⁶ اَ کن اَولین، زندَ آبِه کا رَست بَداشتی موبارک و موقدَسه. دِوومین مردِ، چَوون سَردِرِ هیچ خِنَری نِدارِ بَسکَم اَیِن خدا و مسیح کاهینِن آنَّب و هَزاران سال بَینَه سلطنت بَکنَه.

شَیطونی شکست دوعِه

⁷ هنته کن اَ هَزار سال تَمون آبو، شَیطون زیندانیکا بَرَخِستی

⁸ و بِرِن آ تا قامِنی کن زَمینی سری چار گوشَکا مندین گول بژَنِه. یعنی جوج و ماجوجی کن چَوون تیعداد دَیرا فوشی اندازَیَه و اَوون جنگِستِرا گِرد آرَکَرد.

⁹ و اَیِن زَمینی سَری ایسبیتیکا نَرا شین و موقدسَه آدَمون اردوگا، و اَ خاجَتیَه شهرِشون موحاصیرَ کردَ. ولی آستامونیکا آرا ویبَه و اَیِنِش ویبَردَ.

¹⁰ و اِبلیسِش، کن اَیِنِش گول ژَ به، هه جِگا ایرا کن اَ اَشیا و دِروعَه پَیغَمبریشون ویرفندَ به، دَیراچَه ایکا کن آرا گوگِردینَه پَتلمَه به ویرَفندِشون، اَیِن تا ابد تا ابد عذاب بَکشتینه.

یاله ایسبیَه تختی ناریکا دیوون کردِ

¹¹ چَی به دوملَه ایلَه یالَه ایسبیَه تختی کن ایی نفر چَی سَریکا نِشت بَه ویندِمه. آستامون و زمین چَی حِضوری خونه اَوریجینَه و جِگایی چَوونرا نِبَه.

¹² مردَ اون، چِه یال و چِه گِچ، ویندِمَه کن اَ تختی نَکا پا مَندبین. و دفتَرِن آج آبین. چَی به دومله ایلَه دییَرَ دفتَری نی آج آبَه کن زندَگی دفتَر بَه. مَردَاِن اَ چیینی کن دفتَرونکا نوشته بَه، اِشتَن کردَ کارون طبق دیوون آبین.

¹³ و دَیرا مردَاِنی کن اِشتَن دلَکا داری پس آداشَه؛ مرگ و مردَاون دِنیا نی اِشتَن مردَاِنِشون پس دوعَه، و هَر کَم اوونکا اِشتَن کردَ کارون خونه، دیوون آبَه.

¹⁴ و چَی به دوملَه مرگ و مردَاون دِنیاشون آرا گته دَیراچَه دلَکا ویرَفندِشون. آرا گته دَیراچَه، اِم دِوومین مرگَه.

¹⁵ و هر کَمی کن چَی نوم زندَگی دَفتَریکاشون نوشتَه نِبَه، آرا گته دَیراچَه کاشون ویرَفندَ.