یوحنا موکاشیفَه 2 - کتاب مقدس به زبان تالشي - گویش مرکزی

مسیح پیغوم اَفِسُسی کلیسا را

¹ «اَفِسوسی کلیسا فرشتَرا بِنوِس: «اَ کن هَف گلَه اِسترَ اِشتَن راستَه بالیکا دارِ و هف گلَه چراغدانی وسَطیکا گَل بژَی، اِنتَرَ باتی:

² اِشتِه کارون بَموستیم و اِشتِه عذابونکا و آمبست بِه کا باخَبَریمَه. بَموستیم کن نیشَشا آوَشرون تاو وَردِ و اَیِنی کن بشتن رسول بَموستین ولی نینَّه، ورداورد کردَرَ و سَر آگِنَه ایشَه دِروو اَواجین.

³ بَموستیم کن صبرینَه، چمن نومی خونه تاو وردَرَ و تحمل بَکش و ویختَه نیشَه.

⁴ «ولی بَتِکا اِم شَکایَتی دارِم کن اِشتَن اوّلنَه موحبت کن داریشَه، آهَشتَرَ.

⁵ یاد آرَفَن کن کرَم جِگاکا ویگِنِسته ایشَه. توبَه بکَه و کارِنی اَنجوم بدَ کن اَوَّلنَکا اَنجوم اَدَریشَه. اِمی خونه کن اَگَم توبَه نِکَری، اِشتَن بومَمَه و اِشتِه چراغدانی چَی نوعه جِگاکا پِمَگَت، مَگَم اِم کن توبه بکری.

⁶ ولی اِمیلَه چاکیر هِستَه، هَتَه کن اَز نیکولاییون کاولَکا بیزاریمَه، تِه نی اَوونکا بیزاریشَه.

⁷ «اَ کن گوش دارِ درَسِه کن خدا روح، کلیسا اون چه باتیَه. هر کَم پیروز آبو، اِمی بَی بَبَخشِستیمه تا زندَگی، داری میوَکا کن خدا بهشتی دلَکارَ بَرِ.

مسیح پَیغوم، اِسمیرنا کلیسا را

⁸ «اِسمیرنا کلیسا فرشتَرا بِنوِس: «اَ کن اوّلَه و اَ کن آخیرَ، اَ کن مَردَ و زندَ آبَه، انترَ باتی:

⁹ اِشتِه عذابونکا و دَس دَریسیکا باخَبریمَه، ولی تِه دولتمندیشَه. و اَ آدَمون ایفترا گَتِکا باخبَریمه، کن باتین یهودی اینَه ولی نینَّه، بَسکم شیطونی عیبادتگا اینَه.

¹⁰ اَ عذابی کن هِم زودیون بَکَشتیشَه کا، مترس. بوین، ابلیس، شمَه دلَکا، بعضیوون ورداورد کردِ خونه بشِمه زیندان درَفندییَه و دَه روج عذاب بَبَرون. تِه تا مَردِ موقه وفادار بومون، کن اَز زندَگی تاجی بَتِه آمَدا.

¹¹ «اَ کن گوش دارِ درَسه کن خدا روح کلیسا اون چه باتیَه. هر کم پیروز آبو، دِوومین مرگی دلَکا، غَرّی چَی سَر نیام.

مسیح پیغوم، پِرگامومی کلیسا را

¹² «پِرگامومی کلیسا فرشتَرا بنوِس: «اَ کن دِ دَمو تیرینجَه شمشیر دارِ، انترَ باتی:

¹³ بَموستیم کِرَم جگاکاشَه، اَ جِگا ایکا کن شَیطونی پادشایی تختَه. اِم حالینَه بَرک چمن نومی دَچِیکه ایشَه، حتی چمن اَمینَه شاهید، آنتیپاسی کِشته روجیکا کن اَشون شمَه دلَکا کن شَیطونی مندَ جگا اَ کِشتِشون، ایمانی کن بَمن داریشَه حاشا نِژِرَ.

¹⁴ «ولی اَز، تلَکه شَکایتی بَتِکا دارِم. اَ جگا کا کَسِنی هِستِرَ کن بَلعامی آموجیکا دچِکستَه این؛ هه کن بالاقیش آموج دوعَه تا ایسرائیلی قامی ناریکا سِه ایی ببو کن ویگنستِه باعیث بَبی، تا هردَ چییِنی کن بوتِنِشون تقدیم کردیَه بَرِن و بی عیفتی بکَن.

¹⁵ هنته نی، کَسِنی هِستِرَ کن نیکولاییون آموجیکا دَچیکه اینَه.

¹⁶ پس توبَه اَکَن. اَگَم نِه، خَیلی زو اِشتِه وَر بومَمَه و اِشتَن گَوی شَمشیرینَه چَوون زِربرا بَجَنگِستیمَه.

¹⁷ اَ کن گوش دارِ درَسه کن خدا روح کلیسا اون چِه باتیَه. هر کَم پیروز آبو، اَ نون آکردَ ”مَنّا“ بَی آمَدا، و بَی ایسبیَه سِه ایی آمَدا کن چَی سَریکا تازَ نومی نوشتَشونه، کن غَیراَز چَی ویرَگِر، دِ دییرَ کَسی بَی آنییَموست.

مسیح پِیغوم، تیاتیرا کلیسا را

¹⁸ تیاتیرا کلیسا فرشتَرا بنوِس: «خدا زوعَه کن چَمِن هنتَه کولوستارَ آرا شیوار بمَندی و چی لنگِن هنته شَپَق اَژَنه برنجی شیوارین، انترَ باتی:

¹⁹ اَز اِشتِه کارونکا، اِشتِه موحبت و وفاداریکا، و اِشتِه خیدمت و آمبست گیریکا باخبَریمه، و بَموستیم کن، اِشتِه آخرین کارِن، اوَّلنَه کارونکا ویشتَرَ.

²⁰ ولی اِم شَکایتی بَتِکا دارِم کن، اَ ژِنیرا کن چَی نوم ایزابِلَه و بَشتن پَبغمبر باتی، راحت بَگَتیش. هه کن اِشتَن آموجینه چمن پاسَرییون گول بَژَی تا بی عیفتی بکَن و بوتون تقدیم بَه هردَچییونکا بَرِن.

²¹ بَی موهلَتِم دوعَیه تا توبَه بکَرِ، ولی اَ نَپیشَه اِشتَن بی عیفتیکا توبَه بکَرِ.

²² بوین، اَز بَی آزاری آمَکَرد و لِفو جیگاکا دمَفَند و اَیِنی کن بَینه زینا اَکَرینَه برکَه یالَه غَریکا ویلاخنِم، مَگَم اِمکن اِشتَن کردَ کارونکا توبَه بکَن.

²³ و چَی خِردَنون نیفلَه آمَکرد. اموقه کلیسا اِن گرد بموستینه کن اَز فکرون ودِلون بگَردِستیم و هرکِرَم شمَکا چَی کردَ کارون طبق، عوَض آمَدا.

²⁴ ولی بقیَه اِ شمَه کن تیاتیرا کا بمندیرون، شِمَرا کن اِم آموجیکا دَنِچِکستیرون و اَ چیی اِنی کن بعضی ” شَیطونی عمیقَه نونَکه رازِن” باتینه، آموجِرون گتَه نیَه، اِمی باتیمَه کن اِمیکا ویشتَر شمَه دوشیکا بار نِمَنا.

²⁵ تاَکه اِمکن، تا چمن آمِه، اَ چیی ایی کن دارَکا، آمبَست آچیکَه.

²⁶ «هر کَم پیروز آبو و تا آخیر چمن کارون اَنجوم بدَرِ، بَی گردِ میلَّتون سَردِرِ حکم کردِ زاکینی آمَدا،

²⁷ «و ”آسونَه چَلیکینه چَوون سَردِرِ حکم بکَیَه؛ اَوون هنته سفالَه خِمی شیوار ویرَنجنِه،“ درِست هته کن اَز اِشتَن دَدَکا زاکین ویگَتَمه.

²⁸ و اَز بَی صِبَه اِسترَ آمَدا.

²⁹ اَ کن گوش دارِ درَسه کن خدا روح کلیسا اون چِه باتیَه.