یوحنا موکاشیفَه 19 - کتاب مقدس به زبان تالشي - گویش مرکزیخشی، آستامونیکا 1 اِم چییون بَه دوملَه، سَسی درَستِمه کن هنته یالَه جماعَتی آستامونیکا جِکَّله اَکَرین؛ و لَسَّه اَدَرینَه: «هَلِلویا! نیجات و شکوه و جلال و زبق چَمَه خدا شِنه، 2 کن چَی دیوون کردِ حَقَّه و عَدلَه. اِمی خونه کن اَ یالَه فاحیشَه سَر دیوون کردِش، اَ فاحیشَه کن اِشتَن بی عیفَّتینه زمینِش فاسید آکَردَ، و خدا اِشتَن پاسَریون خونی تقاصی اَیکاش گَته.» 3 و اَیِن هنی لَسَّه آداشون: «هَلِلویا! اَ یالَه شَهریکا تا ابد و تا ابد دوو راست آرَب.» 4 واَ بیستو چار گلَه پیر و اَ چار گلَه زندَ مخلوق صَفتینه برگِنِستین و خدا کن تختی سَر نِشت بَه، پرستِش کردِشونه و لَسَّه آداشون: «آمین. هَلِلویا!» 5 اَموقه تختیکا سَسی راست آبَه کن اَواجیَه: «چَمَه خدا ستایش بکَرَ، اَی گِردِ چَیی پاسَریی اِن، اِی کَسِنی کن بَیکا بتَرسِستیرون، گِچیکا تا یال.» 6 چَی به دوملَه سَسی کن هنته یالَه جماعَتی خَرا خِلِه سَسی شیوار، وِرَ آوون شِر شِر دَرمِه سَسی شیوار، و یالَه گِرَ خونَه سَسی شیوار بَه درَستِم، کن اَواجیَه: «هَلِلویا! اِمی خونه کن چَمه خدا، خداوند، اَ موطلقَه قادِرَخدا، سلطنت بَکَی. 7 بِرَ خَش آبَم و خَشی بکرَم، و بَی شکوه و جلال بدَرَم، اِمی خونه کن اَ وَرَ وَیواَوَری موقِه آرَستیَه، و چَی وَیوو بَشتَنِش آمادَ آکَردیَه؛ 8 ایله نازِکه شندِر کتانه پارچَه کا کن شپَق اَژَنیَه و پا جا اَ بَشون دوعه یه تا دَکرِ.» اِمی خونه کن اَ نازِکه کتان، موقدسَه آدَمون صالِحَه اَعمالَه. 9 واَ فرشتَه بَمِنِش واتَه: «اِمی بنوِس، خَشی اَیِنی حالیرا کن اَ وَرَ وَیوو اَوَری سوریراشون صَلا ژَیَه.» و واتشه: «اِمِن خدا حَییقیَه کلامینَه.» 10 چَی بَه دومله چَی پابِن برگِنِستیم تا بَی پرستِش بکَم. ولی بَمِنش واتَه: «انترَ مکه! اِمی خونه کن اَز تِنَه و اِشتِه برا اونَّه کن عیسی شهادتیکا آچیکه این، هم خیدمتیم. خدا پرستش بکَه!» اِمی خونه کن عیسی شهادت، پیشگویی روحَه.» اَ کن ایسبی یَه اَسبی کا دنشته یَه 11 چَی بَه دوملَه ویندِمه کن آستامون آج آبه و بوین، ایلَه ایسبیَه اسب! ایی نفر چَی سَریکا نشته کن چَی نوم وفادار و حقَّه. اَ، عادیلانَه دییون بَکَی و بَجَنگِستی. 12 چَی چَمِن کولوستارَ آرا اَمونیَه و چَی کلَّکا وِرَ تاج نابَه. و ایله نوشته آبه نوم داری کن غَیراَز اَ، کَسی نَزنییَه. 13 و خونَه کوعَه ردایی دَکردَش به و چَی نومی «خدا کلام» اَواجینَه. 14 آستامونی لشکَرِن کن ایسبیَه اسبون سَردِرِ نِشت بینَه و نازِک و پاجا و ایسبی و گِرونَه کتانَه شندِرِشون دَکَردَ بَه، کایبین چَی دوملَه آمِه. 15 و تیرینجَه شمشیری چَی گَویکا بِرِن آی، تا بَینه میلّتون بژنه. «آسونَه چَلیکینَه چَوون سَر حِکومت بَکَیه.» اَ، موطلقَه قادِرَ خدا قَضَّب و غرَصی اَنگِری، شراوَ حووضیکا پا پِکو بَکی. 16 و چَی ردا و رونَه کَشیکاشون ایله نوم نوشتَه یَه: «شاهون شاه و خداوندون خداوند.» 17 چَی بَه دومله ایلَه فرشتَم ویندَ کن آختاویکا مند بَه و تَتَه لَسَّه نَه گردِ پرندَ اِنی کن آستامونیکا پَر اَگِرینَه سَس آداشَه و واتِش: «بِرَ؛ خدا یالَه سوریرا جَم آبَه 18 تا پادیشا اِن و فرماندَ اِن و قودورون گوژدیکا بَرَ، و اَسبِن و چَوون سَریکا اِنِشون گوژدیکا، و اینسانون گِردی، چِه وزییَر ببو و یا آزاد، گِچ تا یال، چَوون گوژدیکا بَرَ.» 19 و اَ اَشیا و زَمینی اَ شاهِن و چَوون لشکِرِنِم ویندَ، کن جَم آبَه بین تا اَ سوارینَه و چَی لَشکَری زِرَبرارا بجنگِن. 20 ولی اَ اَشیا ویلاخیسته و بَینَه اَ دِروَعه پیغمبَر کن اَشیا ناریکا نشونه اِن و موعجیزَ اون اَیر آرَکری تا اَیِنی گول بژنه کن اَ اَشیا نشونِشون قِبول کردَ و چَی موجسمَه اَپَرستینَه. اَیِن، هردِگِلَه زِند زندَ، دَیراچَه ایکا کن آرا کا کن گوگردینه کولوستار بَه ویرفندِشون. 21 و چَوون بقیَه، شمشیرینَه کن اَ اسبی سَر اَنِشی گَویکا بِرِن آی، مردین و گردِ پرندَاِن، بَشتَنِشون چَوون گوژدینَه سیر آکَردَ. |
@ 2024 Korpu Company