یوحنا موکاشیفَه 18 - کتاب مقدس به زبان تالشي - گویش مرکزیبابِلی ویریستِه 1 چَی بَه دوملَه، دییَرَ فرشتَه ایی ویندِمه کن کایبَه آستامونیکا ویرمِه. و اَ، برکَه یالَه زاکینی داری و زمین چَی شِکوه جَلالی خونه نورانی آبَه. 2 اَ تَتَه لَسَّنه جِکَّلَه آداشَه کن: «ویریستَه، یالَه بابل ویریستَه! اَ، پَریانون کَه جِگا آبَه یه، و هر نا پاکَه روحون مندَ جِگا اَ، و هر نا پاکَه پرَندَایی خومَه و هر نا پاکَه اَشیایی لونه یَه کن نا پاک و نیفرَت اَنگیز. 3 اِمی خونه کن میلَّتِن گِرد اَ هرزَگی و هوا و هَوَسی شَراویکا هِنتِشون. و زَمینی سَردِرِ شاهِن بَینَه زینا کردِشون، و زَمینی سری تاجیرِن چَی وِرَ تجَمّولاتیکا ثیروتمند آبینَه.» 4 چَی به دوملَه دییَرَ سَسی آستامونیکا درَستِمه کن واتِش: «اَی چمن قام، اَ شَهریکا برِن بَروعَه، نِکَرِ چَوون گِناخونکا شریک آبَه، نِکَرِ چَوون غَر، شمَه سَردِرِ نی با! 5 اِمی خونه کن چَی گِناخِن یَندِ سَر جَم آبَه اینَه و فَلَکیرا آرَستَه این، و خدا چَی خَطا اون یاد آرَفندَشه. 6 هَته کن اَ دییَرَ کسونَّه رفتارِش کردَیه، بَینه رفتار بکرَ. دِ برابرِ چَی کَردَ کارون عَوَض، بَی بدَرَ. چَی سِی آکردَ شراوَ قَدرَ دلَکا، دِ برابر بَی بدَرَ. 7 هه اندازَ کن بَشتَنِش شکوه و جلال دوعَشه و تجَمولاتیکا زندگی کردَشَه، هه اندازَ عذاب و عازییَه بَی بدَرَ. اِمی خونه کن اَ اِشتَن دلیکا باتیَه کن: اَز هنته ایلَه مَلَکه شیوار بَنشتیم. ”اَز ویوَ نیمَه و هرگز عازیَه نِمَکرد.“ 8 اِمی خاطِرَ کن ایی روجی دلَکا چَی غرِّن چَی سَردِرِ بومَن، مرگ و برامِه و قحطی. و آرا دلَکا بَسیجیستییَه. اِمی خونه کن خداوند خدایی کن بَی دیوون بَکَیَه، قادِرَ.» 9 و زَمینی پادیشا اِن کن اَینَه زینا کردِشون و بَینَه تَجمّولاتیکا زندَگی کردِشون، چَی سیجیستِه دوو بِوینن، چَیرا بَبِرَمِستینه و بِرامِه و عازیَه بَکَن. 10 اَ عذابی کن اَ کا کَشتِه تَرسیرا، دور بَمندین و باتین کن: «برامِه، برامِه، اَی یالَه شهر، اَی قودورَ شَهر، اَی بابل! اِمی خونه کن ایی ساعَتَیکا اِشتِه دیوون کردِ آمَه!» 11 و زَمینی تاجیرِن چَی خونه بَبِرَمِستینَه و عازیَه بَکن، اِمی خونه کن دِ کَسی چَوون باری نِخِرِ، 12 یعنی چَوون طِلِه و نِقرَ و جواهیرات و مِرواریدون بار؛ چَوون سِرَ اَرغوانیَه ابریشَم و گِرونَه پارچَه اون بار؛ موختلیفه عَطرینَه چوو اِن و موختلیفه غَبون بار، و موختلیفه عاجِن و موختلیفَه گِرونَه چو اَ غَبِن و چَوون مِس و آسون و مَرمَرینَه بار؛ 13 دارچین و اَدویَه و خوشبو اَ بوخور و مُر و کُندوری بار؛ شراو و زَیتونَه روعَن و چاکَه آردَ و گندِمی بار؛ و چَوون سیا مالِن و پَسِن و گلَّه اِن و اسبِن و اَرَبَه اِن؛ و وَزییَرِن، یعنی آدَمون جانی. 14 اَیِن باتینَه: «اَ میوَ کن اِشتِه جان چَیرا طَمارزو اَداریَه، بالیکا بَرشَه یَه. اِشتِه تجّمولات و شوکت هیچ برشَیَه و دِ هرگز بَدَست نیشَوَرد.» 15 و اِم بارون، تاجیرِن کن بَینه ثیروَتمند آرَبینه، اَ عذابی کن اَ اَکَشیَه تَرسیرا، دوریکا بمَندین و بِرامِه بَکَن و عازیَه بَگتینَه و 16 باتینه کن: «برامِه، برامه، اَی یالَه شهر، کن سِرَ اَرغوانی و نازِکه پارچَه اون دَرَکَریشه، طِلِه و جواهیر و مِرواریدینه خاص آرَبیشه! 17 اِمی خونه کن ایی ساعتیرا اِشتِه دارایی هیچ آبَه.» و ناخودا اِن و دیرا نوردِن و ملَوانِن و گِردِ اَیِنی کن چَوون کاسبی دَیرا کارینَه بَه، دوریکا پا بمندین. 18 و وقتی آرایی کن بَی بَسوتیَه دوو بَویندین، جِکَّله بَژَن کن: «کِرَم شهر، اِم یاله شهری شیوار بَه؟ 19 و اِشتَن کَلَّکا خاک دنَّکرد و برامِه بَکَن و عازیه نَه جکَّلَه بَژَن کن: «برامِه، برامِه، اَ یالَه شهریرا، اَ شهر کن گردِ کَشتی دارِن، چَی ثیروتیکا پولدار آبین، اِمی خونه کن اَ، ایی ساعَتَه ویریستَه! 20 اَی آستامون چَیرا خَشی بکَه، اَی موقدسَه آدَمِن و رسولِن و پَیغمبَرِن، چَیرا خَشی بکرَ، اِمی خونه کن خدا شمَه قیصاصی اَیکا گتَشَه.» 21 چَی به دوملَه ایلَه قودورَ فرشتَه ایی، ایلَه یالَه سِه ایی کن آستاوَ سِه شیوار بَه، پِگَتِشَه و دَیراکا ویرَفندِش و واتِش: «اَ یالَه شهر، بابل، اِنتَرَ بکش بکشینه ویرَریستَه، ودِ هرگز هیچ نشونَه ایی اَیکا پَیدا آنییَب. 22 چیمی بَه دومله نِه موطرِبن و نِه چنگ نوازون سَس، و نِه لَلَه و زرنا اَژَنون سَس، بَتِکا دَنینَّرَست. دِ هیچ چیلینگر و هیچ چیلینگری اِشتِه دِلَه کا پیدا آنییَب. و دِ هیچ آستاوی سَس، بَه تِه کا دَنینَّرست 23 دِ هیچ سو اَ چِرایی بَتِکا دَنییَه تاوِست، دِ هرگز بَتکا هیچ وَیو و بَگی سَس بِرِن نیام. اِمی خونه کن اِشتِه تاجیرِن زَمینی سَریکا یالَه آدَمِنی بینَه، و اِشتِه جاودو خونه قامِن گِرد گمراه آبین. 24 اِمی خونه کن چَی بالِن موقدسَه آدَمِن و پَیغبَرون خون، و گِردِ اَیِنی کن زَمینی سَردِرِ کِشتَشونَه خونینَه، جیفینین بَه.» |
@ 2024 Korpu Company