یوحنا موکاشیفَه 17 - کتاب مقدس به زبان تالشي - گویش مرکزی

یالَه فاحیشۀ و اَشیا

¹ چَی بَه دوملَه ایلَه اَ هف گلَه فرشتَکا کن اَ هف گلَه قدرَ دارین، نَه آمَه و بَمِنِش واتَه: «بِه تا اَ یالَه فاحیشَه سَر دیوون کردِ کن وِرَ آوون سَردِرِ نشتَیَه بَتِه آمونم.

² اَ کن زَمینی پادیشا اِن بَینَشون زینا کردَ و زَمینی سَردِرِ اَمونِن چَی زینا شراویکا مست آبین.»

³ اَ فرشتَه بَمِنِش خداروح نَه ایلَه وَیاوونیرا بردِش. اَ جِگاکا ایلَه ژِن کن ایلَه سِرَ اَشیا سَریکا نشت بَه و اَ اَشیا تَنیکا کِفرَ نومینَه پَتلمَه بَه و هف گلَه کَلَّه و دَ گِلَه شاخ دارییَه، ویندِمَه.

⁴ و اَ ژِن سِرَ اَرغوانییَه شندِریش دَکردَ بَه و طِلِه و جواهیر و مِرواریدینه خاص آبَه به، و ایلَه طِلِه اینَه قدرَ ایی کن چَی زینا ناپاکیونکا و زشتیونکا پتلَمه بَه اِشتَنَه پِرِش بَه.

⁵ و ام مرموزَ نوم چَی پوشنوکا نوشته بَه: «یاله بابل، زَمینی سَری زِشتییِن و فاحیشه اون نَنَه.»

⁶ و ویندِمه کن اَ ژِن موقدسه آدَمون خونینَه و اَیِنی کن عیسی خونه شهید آبَه بینَه خونینَه، مست بَه. اَ ژنی ویندِکا بَرک حَیرون آبیم.

⁷ ولی فرشتَه بَمِنِش واتَه: «چِه خونه حَیرون آبیشَه؟ اَ ژِنی رازی و اَ اَشیا کن هَف گلَه کلَّه و دَگِلَه شاخ بداشتی و اَ ژِن کن چَی سَریکا دنِشتَه رازی، اَز تِرا باتیمَه.

⁸ اَ اَشیا ویندِر کن مَند بَه، ایسَه دِ نییَه، خَیلی زوو هاویه چالیکا بِرِن آ و نیفلَه آبِرا بَشی. زَمینی سَردِرِ اَمونونکا، اَیِنی کن دِنیا خلق بِه بَه دوملَه چَوون نومی زندَگی دفتَریکاشون نوشتَه نییَه، اَ اَشیا ویندِکا حَیرون آنَّب، اِمی خونه کن اَ مَند بَه، ایسَه دِ نییَه، و بومَیَه.

⁹ «اِم اَلمندَ عقلی بَپیشَه. اَ هف گِلَه کلَّه، هف گلَه کوهینَه کن اَ ژِن چَوون سَریکا نِشته.

¹⁰ کن هَف گلَه پادیشا نی هِستینه کن اَوونکا پِنج نفر نیفلَه آبَه این و اَ، آخِرین گلَه هَنوزَنی آمَه نی؛ وقتی کن با، پی بومونِه، ولی تلکَه زمانی.

¹¹ اَ اَشیا کن مند بَه و ایسَه دِ نییَه، هَشتومین پادیشا اَ. اَ، هَه هَف گله شِنَه و نیفلَه آبِه را بَشیَه.

¹² «اَ دَ گلَه شاخِر کن ویندَ، دَ گِلَه پادیشا اینَه کن هنوزنی اِشتَن پادیشا ایرا آرَستَه نینَّه. ولی قرارَ اَ اَشیا نَه، یَک ساعَتیرا پادیشا اون زاکینی بیگِن.

¹³ اَیِن گِرد ایلَه فکر دارِن و اِشتَن زبق و زاکینی اَ اَشیا آنَّدا.

¹⁴ گردِ اَیِن اَ وَرَ نَه جنگِستِه خونه راست آنَّب، ولی وَرَ چَوون سَردِرِ پیروز آرَب، اِمی خونه کن اَ خداوندون خدا و پادیشا اون پادیشا اَ و اَیِنی کن بَینه دَرِ این، اَیِنین کن صَلا ژَشه و اَوون اینتخابِش کردیَه و چَی وفادارَ پیرووِنین.»

¹⁵ و اَ فرشتَه بَمِنِش واتَه: «اَ آوِن کن ویندِرَ اَ فاحیشَه چَوون سَریکا نشته، اَیِن هَه میلَتِن و جماعَتِن، قامِن و زَبانِن هِستینَه.

¹⁶ اَ اَشیا و اَ دَگلَه شاخ کن ویندِر، فاحیشَکا بیزار آنَّب. اَیِن بَی تاکَه آنَّهَشت و لوت وَر آنَدا. چَی گوژدی بَردینَه و بَی آرا دلَکا بَسوتینَه.

¹⁷ اِمی خونه کن خدا چَوون دِلیکاش نوعَیَه کن چَی خواستَه اَنجوم بدَرِن و هم فکر ببون، و تا اِشتَن پادیشا ایی قودرتی اَ اَشیا دَست آدَرن، تا خدا کلام اَنجوم ببو.

¹⁸ و اَ ژِن کن ویندِرَ، هَه یالَه شَهرَ کن زَمینی پادیشا اون سَردِرِ حِکومت بَکَی.»