یوحنا موکاشیفَه 15 - کتاب مقدس به زبان تالشي - گویش مرکزی

هفت گِله فرشتَه هفت گِله غَرّینه

¹ اَموقه ایلَه بَرکَه یالَه عَجیبَه دییَرَ نشونَه ایی آستامونیکام ویندَ، هف گلَه فرشتَه بَه کن اَوونَّه هف گلَه غَر دَرِ بَه، اَیِن آخِرین غَرِّن بینَه، اِمی خاطر کن اَوونَّه خدا غَضَّب تَمون آرَبیَه.

² و چیی ایی ویندِم کن هنته شیشَه اینَه دَیرا اَمونیَه کن آرانَه یَندِ گنِستَه ببو، و کَسِنی شیشَه اینه دَیرا وَریکا پامَندَکَر ویندِم کن اَ اَشیا و چَی موجسمَه سَر و چَی نومی شومارَ سَردِرِ پیروز آبَه بینَه. اَیِن اِشتَنَه چَنگَه سازِنی دارین کن خدا اَیِنِش دوعَه بَه.

³ و اَیِن، خدا پاسَری، موسی سِرودی و اَ وَرَ سِرودی اَخونینَه و اَواجینَه: «اِشتِه کارِن بَرک یال و عَجیبینه، اَی خداوند، موطلقَه قادِرَ خدا، چَنَه اِشتِه راهِن عادیلانَه و حَقّینه، اَی گردِ میلَّتون پادیشا.

⁴ اَی خداوند، کییَه کن بَتِکا متَرسِه، و اِشتِه نومی شکوه و جلال آنِدَرِ؟ اِمی خونه کن تِه، تاکَه تِه قدّوسیشَه. میلَّتن گِرد بومَنه و اِشتِه حِضوریکا بَتِه پرستش بَکَن اِمی خونه کن اِشتِه عادیلانَه کارِن دیار آبَه اینَه.»

⁵ چَی بَه دوملَه ویندِمَه کن شهادتی اَوالَه موقدسَه جگا، آستامونیکا آج آبَه.

⁶ و هف گلَه فرشتَه کن هف گلَه غَرّی اِشتَنَه دارین، اَ موقدسه جِگاکا بِرِن بَرمین. و اَ فرشتَه اون شندِر پاجا اَ کتانَه پارچَه کا بَه و شَپَق اَژَنیَه و ایلَه طِلِه اینَه سَرِخ، اِشتَن سینَکاشون پِپِشتَه بَه.

⁷ و ایلَه اَ چار گلَه زندَ مخلوقیکا، هف گلَه طلِه اینَه قَدرَش، کن خدا غَضَّبیکا کوکورو بَه اَ هف گلَه فرشتَش دوعَه، خدایی کن تا ابد و تا ابد زندَیه.

⁸ و اَ موقدسه جگا، خدا شکوه و جلال و خَنَرینَه، دوو کا پتلَمه آبَه و هیچ کَم نَشایَه دِلَه دَرمِه تا وقتی کن اَ هَف گلَه فرشتَه هف گلَه غَر، تَمون آرَبیَه.